Home nasional PR Rona Lider Igreja Nia Hanoin ba OJE 2019

PR Rona Lider Igreja Nia Hanoin ba OJE 2019

122
0
SHARE
Prezidente Republika Francisco Guterres Lu-Olo. Photo: Media /PR

By: Hortencio SANCHES

THETIMOR-NEWS.com, DILI – Ohin tama loron datoluk Prezidente Repúblika (PR) Francisco Guterres Lú Olo rona hanoin husi entidade oioin. Ba loron ne’e, Prezidente Repúblika rona  konfisoensrelijioza no Camara Comercio e Industria Timor-Leste nia hanoin kona-ba Lei Orsamentu Jerál Estadu 2019.

Konfisoen relijioza ne’ebé reprezenta husi Bispu Dioseze Dili no Baucau, Asembleia de Deus, Igreja Protestante Timor-Leste, Konsellu Nasionál Islam Timor-Leste no Budha louva inisiativa Prezidente Repúblika hodi rona konfiesoens relijioza nia hanoin kona-ba asuntu nasionál, Orsamentu Jerál Estadu 2019.

Bispu Dioseze Dili Dom Virgilio do Carmo da Silva  hateten katak povu hein mudansa polítika bele mosu no oinsá líder sira bele tur hamutuk atu serbisu ba bem-estar povu ninian tanba ne’e presiza iha diálogu husi parte hotu-hotu atu rezolve problema polítiku.

“Estadu presiza halo esforsu makaas liután ba iha area edukasaun, saúde, empregu no agrikultura ne’ebé liga ho povu nia moris,” dehan D. Virgilio ba Jornalista hafoin remata sorumutu ho PR Lu-Olo iha Palacio Prezidensial Bairu Pite, Kinta (10/01/2019).

Alende ne’e, Prezidente Konsellu Nasionál Islam Timor-Leste Ahmad Ali Alayudi informa ba Prezidente Repúblika katak Orsamentu Jerál Estadu importante no presiza halo diversifikasaun ekonomia iha area produtivu sira atu labele depende nafatin ba sasan importadus husi rai-li’ur.

Nune’e, Bispu Dioseze Baucau Dom Basílio do Nascimento hateten katak Orsamentu hanesan fuan  ne’ebé sirkula ran ba isin lolon tomak hodi fó moris  maibé iha tempu hanesan ema tenke fó fila fali nia kontribuisaun ba estadu. Estadu presiza haree fila fali saida mak nesesidade no prioridade no halo distribuisaun rasionál atu povu hotu-hotu, liuliu iha area interior bele hetan benefísiu.

Iha enkontru seluk ho Xefe Estadu, Prezidente Camara Comercio e Indústria Timor-Leste Oscar Lima hamutuk ho nia estrutura hato’o opiniaun kona-ba Orsamentu Jerál Estadu ba povu nia moris no informa kona-ba esforsu atividade ekonómiku iha area produtiva ne’ebé emprezariu timoroan sira halo tiha ona maibé presiza intervensaun estadu nian hodi insentiva inisiativa atu aumenta produsaun nasionál.

Hafoin simu Lei Orsamentu Jerál Estadu ho montante $ 2.1 biloens husi Parlamentu Nasionál iha 24 dezembru 2018 Prezidente Repúblika sei iha loron tolunulu atu estuda molok deside. Orsamentu Jerál Estadu tinan ne’e boot liu kompara ho tinan anterior sira  tanba iha aumentu $650 miloens ba sosa asoens partisipasaun husi kompania Conoco Philips no Shell.

Prezidente Repúblika sei estuda Lei Orsamentu Jerál Estadu 2019 no kontinua rona opiniaun husi entidade oinoin hahú husi 7 to’o 10 janeiru 2019.  Opiniaun sira ne’ebé hato’o husi entidade oioin sei tulun  Prezidente Repúblika atu bele tetu ho di’ak liután molok foti desizaun.

Editóra: Agida DOS SANTOS I COPPYRIGHT THETIMORNEWS © 2018

LEAVE A REPLY

Please enter your comment!
Please enter your name here