Home dezenvolvimentu Xefi Estadu Rona Opiniaun Hosi Banku Sentral ba OJE 2019

Xefi Estadu Rona Opiniaun Hosi Banku Sentral ba OJE 2019

164
0
SHARE
Prezidente Republika halo hela sorumutu ho ekipa hosi Banku Sentral Timor - Leste hodi rona hanoin atu foti dezisaun ba OJE 2019. photo: Media PR

By: Hortencio SANCHES

THETIMOR-NEWS.com, DILI – Prezidente Republika (PR) Francisco Guterres Lu-Olo hafoin foti desizaun ba Orsamentu Jeral Edtadu (OJE) 2019 sei rona opiniaun no hanoin hosi entidade hotu iha Timor – Leste.

Tanba ne’e, PR Lú Olo kontinua rona hanoin husi Banku Sentral Timor-Leste nu’udar parte ida hodi estuda Lei Orsamentu Jerál Estadu 2019.

Iha loron dahaat konsultasaun Prezidente Repúblika ho entidade oioin, Governadór Banku Sentral Timor-Leste Abrão Vasconcelos apresia Xefe Estadu tanba ba dahuluk konvida institusaun ne’e hodi hato’o opiniaun kona-ba Orsamentu Jerál Estadu.

“Banku Sentral Timor-Leste esplika kona-ba situasaun makro ekonómiku no ninian previzaun ba 2019 no 2020. Banku Sentral Timor-Leste hateten Orsamentu Jerál Estadu 2019 nu’udar orsamentu ida ne’ebé boot kompara ho tinan anterior sira, ho montante $1.2 biloens,” dehan Abrao Vasconcelho ba Jornalosta hafoin remata sorumutu ho PR Lu-Olo iha Palacio Presidensial Bairu Pite, Kinta (10/01/2019).

Levantamentu husi Fundu Petrolíferu ba tinan fiskál 2019 hamutuk  $1.8 biloens no Orsamentu Jerál Estadu 2019 sei foti liu Rendimentu Sustetavel Estimadu.

Xefe Kasa Sivil Francisco Maria de Vasconcelos hafoin enkontru informa katak Banku Sentral Timor-Leste  bainhira halo previzaun ba Fundu Petrolíferu iha proposta inísiu Orsamentu Jerál Estadu 2019 seidauk kontempla osan ba sosa asoens partisipasaun husi kompania Shell tanba proposta ne’e hatama ikus.

Banku Sentral Timor-Leste fó hanoin atu hotu-hotu tenke tau matan ba sustentabilidade Fundu Petrolíferu. Desde Orsamentu Jerál Estadu 2019 sempre foti liu Rendimentu Sustentavel Estimadu tanba ne’e Banku Sentral Timor-Leste sujere atu bele haree fila fali regra ida ne’e ho didi’ak.

Estadu Timor-Leste iha dependénsia boot ba Fundu Petrolíferu no la dun iha opsaun barak ba finansiamentu Orsamentu Jerál Estadu 2019 tanba reseitas domestikas ne’ebé sei ki’ik tebes no dalan seluk liu impréstimu. Tanba ne’e, Banku Sentral Timor-Leste husu atu estadu halo esforsu hodi investe makaas iha setór produtivu atu sai fontes prinsipál seluk ba finansiamentu Orsamentu Jerál Estadu. Banku Sentral Timor-Leste husu atu estadu bele uza Fundu Petrolíferu ho prudente atu bele garante ninian sustentabilidade ba jerasaun agora no futuru.

Timor-Leste rasik nu’udar membru fundadór Fundu Soberanu ka koñesidu liu ho Santiago Principles tanba ne’e presiza estadu atu promove prátika investimentu prudente hodi nafatin garante sustentabilidade.

Hafoin simu Lei Orsamentu Jerál Estadu ho montante $ 2.1 biloens husi Parlamentu Nasionál iha 24 dezembru 2018 Prezidente Repúblika sei iha loron tolunulu atu estuda molok deside. Orsamentu Jerál Estadu tinan ne’e boot liu kompara ho tinan anterior sira tanba iha aumentu $650 miloens ba sosa asoens partisipasaun husi kompania Conoco Philips no Shell.

PR sei estuda Lei Orsamentu Jerál Estadu 2019 no kontinua rona opiniaun husi entidade oinoin hahú husi 7 to’o 10 janeiru 2019. Opiniaun sira ne’ebé hato’o husi entidade oioin sei tulun Prezidente Repúblika atu bele tetu ho di’ak liután molok foti desizaun.

Editóra: Agida DOS SANTOS I COPPYRIGHT THETIMORNEWS © 2018

LEAVE A REPLY

Please enter your comment!
Please enter your name here