Home dezenvolvimentu FRETILIN Husu PM Taur Tau Atensaun Lais ba Assuntu Ratifikasaun Tratadu FM

FRETILIN Husu PM Taur Tau Atensaun Lais ba Assuntu Ratifikasaun Tratadu FM

230
0
SHARE
Vise Prezidente Bankada FRETILIN Francisco Miranda Branco. Photo: Media/Bankada FRETILIN

By: Hortencio SANCHES

THETIMOR-NEWS.com, DILI – Bankada FRETILIN iha uma fukun Parlamentu Nasional (PN) husu ba Governu ne’ebe lidera hosi Primeiru Ministru Taur Matan Ruak atu toma inisiativa no atensaun makas hodi halo ratifikasaun tratadu Fronteira Maritima entre Timor – Leate no Australia ne’ebe assina ona iha New York tinan kotuk.

 Vise Prezidente bankada FRETILIN Francisco Miranda Branco afirma, “Bankada FRETILIN fó-alerta ba VIII Governu hodi husu, Primeiru-Ministru Taur Matan Ruak tenke tau-matan lalais ba asuntu importante ida ne’e. Ita luta ona tinan naruk atu alkansa objetivu ida ne’e, tanba ita hakarak defende ita-nia soberania. Agora atu to’o ona pasu ida importante liu, entaun ita labele la book-an nafatin.”

Lia hirak ne’e hato hosi deputadu Francisco Branco liu hosi Komunikadu Imprensa ne’ebe THETIMORNEWS assesu, Sesta (30/11/2018).

“Iha dia 6 marsu tinan ida ne’e, governu Timor-Leste ho Austrália asina ona tratadu kona ba Fronteira Marítima iha Tasi Timór entre Timor-Leste ho Australia hafoin Komisaun Konsiliasaun ramata ninia misaun. Tratadu fronteira marítima entre rai rua, nune’e sei substitui tratadu sira seluk ne’ebé halo entre Timor-Leste ho Austrália kokna ba fahe riku soin hotu-hotu iha tasi laran no tasi okos,” esplika Baranco.

Atu tama iha vigór, tratadu ne’e tenke hetan ratifikasaun iha Parlamentu Nasionál Timor-Lete, tuir Konstituisaun RDTL artigu 95, alínea 3.f, no Parlamentu Federal Australia.

“Maske ita hotu-hotu kompriende katak tratadu ida ne’e importante tebetebes ba ita nia Estadu, fulan 8 hafoin asinatura ba tratadu ne’e iha New York, governu seidauk toma inisiativa ruma atu hahú prosesu ratifikasaun. Enkuantu ita hein, iha loron-28 fulan-Novembru tinan-2018, Austrália hahú ona sira nia prosesu ratifikasaun iha Parlamentu Federal,” dehan Deputadu ne’e.

Bankada FRETILIN hanoin katak prosesu ratifikasaun ida ne’e presiza diskusaun kle’an kona-ba substánsia husi tratadu refere, ne’ebé governu presiza fo esplikasaun no informasaun sira hotu relevante ba Parlamentu Nasionál.

“Nudár órgaun Estadu ho kompeténsia atu ratifika tratadu internasionál sira inklui kona-ba ita-nia fronteira, Parlamentu Nasionál presiza iha asesu ba dokumentus relevante sira hotu atu estuda didi’ak dokumentu sira ne’e antes halo desizaun ba kestaun importante kona ba ita nia independénsia no soberania.” dehan deputadu Branco.

Deputadu ne’e afirma, diskusaun laos ba deit membru Parlamentu maibe tenke nakloke mos ba kompetente tomak.

“Tan ne’e Governu presiza haruka lalais mai Parlamentu atu Parlamentu bele konvoka diskusaun ida inkluzivu, no rona ema hotu-hotu.” dehan deputadu ne’e.

Nia esplika, tratadu refere la hanesan tratadu CMATS hodi loke dalan ba rai rua halo negosiasaun foun.

“Tratadu ida ne’e la hanesan ho tratadu CMATS, ne’ebé loke dalan ba ita halo negosiasaun foun. Tratadu ida ne’e sei taka odamatan ba negosiasaun ka disputa sira seluk, karik iha tempu ikus mai ita kompriende hikas katak tratadu ne’e la justu. Bainhira ita asina no ratifika tratadu ne’e, ita tenke simu konsekuénsia hotu. Tan ne’e ita presiza iha diskusaun kle’an.” dehan lider FRETILIN ne’e.

“Atu loron ruma ita lebele hatudu liman ba malu, mai ita hotu tuur hamutuk hodi haree desizaun ida ne’e. Desizaun ne’ebé ita foti tenke refleta ita-hotu nia konsiénsia no diak duni ba interese ita nia povu no Nasaun nian. Tan ne’e, ita labele hein tan e prosesu tenke hahú agora kedas.”

Bankada FRETILIN, nudár reprezentante Povu nian iha Parlamentu Nasionál sei halo esforsu tomak atu asegura interese Povu ho Estadu nian iha tratadu ida ne’e. Bankada FRETILIN iha mós fiar katak envolvimentu sosiedade tomak nian iha diskusaun ida ne’e mak dalan ne’ebé loos liu atu asegura ita-nia interese. Bankada FRETILIN prontu atu kolabora iha prosesu tomak iha asuntu importante ida ne’e.

Maibé prosesu ne’e tenke transparente no sosiedade no Povu tomak tenke hetan oportunidade husu esklaresimentu.

Governasaun ne’ebé di’ak, ne’ebé sustentável, tenke liu husi prosesu transparente no involve konsulta no debate públiku kle’an.

LEAVE A REPLY

Please enter your comment!
Please enter your name here