Home dezenvolvimentu MOP Halao Audensia Publiku ho Komisaun E no C iha PN

MOP Halao Audensia Publiku ho Komisaun E no C iha PN

32
0
SHARE
Ministru Obras Publiku, Salvador Pires. Photo: Spesial

By: Hortencio SANCHES

THETIMOR-NEWS.com, DILI – Ministru Obras Públikas (MOP), Salvador Eugénio Soares dos Reis Pires, iha halo audénsia públika ho Komisaun C ne’ebé toma konta ba Finansas Públiku no komisaun E ne’ebé toma konta ba Infraestrutura iha Parlamentu Nasionál (PN).

Audensia Publiku ne’e halo iha Parlamentu Nasional Tersa (27/11/2018).

Iha audénsia públiku ne’e, Ministru informa kona-ba planu no programa ne’ebé mak Governu liuhosi Ministériu Obras Públikas (MOP) sei hala’o iha tinan 2019 nia-laran.

Durante audénsia públika ne’e deputadu sira husu kona-ba ezekusaun Orsamentu Jerál Estadu (OJE) 2018 nian liuliu ba MOP. Deputadu sira levanta mós preokupasaun kona-ba bee-moos, eletrisidade no kualidade estrada sira, inklui atendimentu ba situasaun emerjénsia nian liuliu servisu Institutu Jestaun Ekipamentu (IGE). Nune’e deputadu sira husu ba Governu liuliu MOP hodi tau atensaun ba problema ne’ebé mak populasaun sira infrenta.

Husi preokupasaun hirak ne’e Ministru hatán katak, ezekusaun orsamentu husi MOP daudauk ne’e atinji ona pursentu 83. Kona-ba projetu 142 ne’ebé mak iha kontratu prosesu pagamentu la’o ona bazeia ba realizasaun fíziku tuir pedidu pagamentu no projetu sira ne’ebé mak seidauk iha kontratu sei hein rekomendasaun husi Komisaun Inkéritu Parlamentár (KIP).

Kona-ba bee-moos nian, Governu kontinua halo esforsu hodi halo melloramentu ba kanalizasaun sira. Aliende ne’e iha ona planu mestri hodi dada bee-moos husi munisípiu Ermera, postu administrativu Gleno no Railaku nian mai Dili hodi fornese ba komunidade, nune’e mós iha fatin balun ne’ebé Governu identifika ona hodi implementa projetu kona-ba bee-moos nian.

Enetertantu kona-ba eletrisidade, Governu sei halo esforsu hodi hadi’a sistema fornesimentu enérjia eletrisidade, sei sosa tan prepagu hodi monta iha kliente Eletrisidade Timr-Leste (EDTL), nune’e bele kontribui ba reseitas estadu nian. Nune’e mós Governu sei tau prioridade ba suku sira ne’ebé seidauk asesu ba enérjia eletrisidade.

Ministru hatete, iha Governu Konstitusionál daualu (VIII) iha programa importante ida mak programa hametin governasaun iha área infraestrutura, tanba ne’e, Governu liuhosi MOP hanoin hametin baze legál no estabelese regulamentu, lisensiamentu no mekanizmu operasionál, padraun no armoniza kualidade konstrusaun hodi hametin fiskalizasaun ho efetivu.

Aliende ne’e, IGE hanesan Instutu Públiku ne’ebé tutela ba MOP, preparadu hodi atende situasaun emerjénsia sira .

Audénsia públika ne’e sei hala’o hahú iha loron 19 to’o loron 30 fulan-Novembru tinan ida-ne’e. Hafoin audénsia públika, komisaun C ne’ebé trata asuntu Finansas Públiku sei aprezenta relatóriu no pareser.

Iha loron 10 to’o 12 fulan-Dezembru, sei halo diskusaun iha generalidade no halo aprovasaun, no diskusaun no votasaun finál sei hala’o iha loron 13 to’o 28 dulan-Dezembru tinan ida-ne’e.

Tuir kalendáriu hafoin halo aprovasaun OJE 2018 iha Parlamentu Nasionál, PN sei haruka ba Prezidente Repúlika (PR) Francisco Guterres Lu-Olo iha loron 2 fulan-Janeiru liu ba.

LEAVE A REPLY

Please enter your comment!
Please enter your name here