Home dezenvolvimentu FRETILIN Vota Kontra Proposta Alterasaun Lei Atividade Petroliferas

FRETILIN Vota Kontra Proposta Alterasaun Lei Atividade Petroliferas

283
0
SHARE
Vise Prezidente Bankada FRETILIN Francisco Miranda Branco. Photo: Media/Bankada FRETILIN

By: Hortencio SANCHES

THETIMOR-NEWS.com, DILI – Bankada FRETILIN iha Parlamentu Nasionál vota kontra proposta alterasaun ba Lei No. 13/2005, kona ba Atividades Petrolíferas, ne’ebé deputadu balu husi bankada CNRT, PLP, KHUNTO, PD no UDT/Frente Mudansa hato’o.

Tanba ne’e, Vise-Prezidente Bankada FRETILIN, Francisco Miranda Branco hatete, proposta alterasaun ba lei ne’e sei enfrakese ita-nia prosesu transparénsia iha governasaun, liuliu iha setór petróleu.

“Transparénsia signifika governasaun ne’ebé nakloke, responsável, no onestu. Iha ita-nia sosiedade, governante sira iha obrigasaun atu loke informasaun ba sidadaun sira, e Kámara de Kontas garante kumprimentu ba obrigasaun ida ne’e e mantén responsabilizasaun husi governu,” dehan Branco liu hosi Komunikadu Imprensa ne’ebe THETIMOR-NEWS assesu, Kinta (15/11/2018).

Branco esplika. “Ita hotu-hotu bele haree momoos katak intensaun ba alterasaun artigu ida ne’e mak atu taka governu nia atividade ba sidadaun sira, liuliu kona-ba oinsá governante sira utiliza Povu nia osan.”

Bankada FRETILIN mós nota ho preokupasaun inabilidade husi proponente sira atu esplika objetu husi proposta alterasaun ida ne’e.

“Proponente sira la fó esplikasaun ida satisfatória kona-ba definisaun balu iha sira nia proposta. Sé mak ‘outras pessoas coletivas públicas’? Sé mak ‘entidades integralmente detidos ou controlados por estes’?” kestiona Francisco Branco. “Ami preokupa, e sidadaun hotu-hotu tenke mós preokupa, katak interpretasaun sira ne’ebé la loos sei loke dalan konflitu interese e aproveitamentu ba rekursus Estadu nian hodi benefisia ema ka grupu balu nia interese.”

Alterasaun ba Lei no. 13/2005 mai iha ámbitu akordu entre Xefe Negosiadór Xanana Gusmão ho ConocoPhillips atu sosa Timor-Leste nia partisipasaun iha esplorasaun mina ho gás iha Greater Sunrise (GSR). Iha dia 28 de Setembru, ConocoPhillips konkorda atu fa’an sira nia partisipasaun 30% iha GSR ba Timor-Leste. Infelizmente, selebrasaun ba akordu ne’e la la’o tuir lei ne’ebé vigora, prinsipálmente Lei no. 13/2005 artigu 22 e proponente sira husu proposta alterasaun ne’e prodús efeitu hahú husi dia 27 de Setembru.

“Proposta alterasaun ba lei ida ne’e atu halo legál buat ne’ebé laiha kabimentu legál. Sira viola tiha lei, sira halo sala tiha, depois sira dehan lei mak sala, entaun tenke troka lei. Tuir loloos ita muda uluk lei antes ita halo kompromisu ruma lori Estadu nia naran,” Francisco Branco esplika.

Branco konklui hodi hatete, “alterasaun ba lei ida ne’e reprezenta pontu ida baixu tebetebes iha ita-nia istória hanesan nasaun independente. Ohin, ema balu ne’ebé proklama nia an hanesan reprezentante Estadu nian, asina akordu ida sein koñesimentu husi órgaun soberania país nian, depois buka dalan atu legaliza ninia hahalok. Ema balu, ohin, perverte tiha ona interese nasionál.”

 Editóra: Agida DOS SANTOS I COPPYRIGHT THETIMORNEWS © 2018

LEAVE A REPLY

Please enter your comment!
Please enter your name here