Home Uncategorized Manan Brunei 3-2, TL Hakat ba AFF Championship 2018

Manan Brunei 3-2, TL Hakat ba AFF Championship 2018

162
0
SHARE

By: Evangelisto SANTOS

THETIMOR-NEWS.com, DILI – Timor-Leste iha jogu daruak kualifikasaun ASEAN Football Federation (AFF) 2018, maski lakon 0-1 hosi uma nain Brunei Darussalam, hakat nafatin ba AFF Championship tamba manan aggregate 3-2.

Henrique da Cruz, Avansadu Timor-Leste ne’ebe hatama golu 2 iha jogu home kontra Brunei. Photo: AFF

Jogu ne’ebe halao iha Sultan Hassanal Bolkiah Stadium, Sabadu (08/09/2018), todan liu ba Brunei tamba atu hakat hosi kualifikasaun ne’e, tenki manan Timor-Leste ho golu rua. Maibe, Timor-Leste rasik persiza deit empata.

Golu Brunei nian hatama hosi Mohamad Najib Tarip iha minutu 75’, hafoin aproveita bola kabesa hosi nia maluk ne’ebe ho sem guarda, Najib ho kalma suta bola tama ba baliza Timor-Leste.

Timor-Leste iha jogu ne’e mos hetan oportunidade osan mean barak, maibe laiha ida mak rezulta golu.

Rofinu Gama, avansadu Timor-Leste hetan guarda metin hosi jogador Brunei wainhira joga iha home nian. Photo: AFF

Golu 3, Timor-Leste nian antes ne’e iha jogu home ne’ebe uza KLFA Stadium iha 1 Setembru 2018 hatama hosi Henrique da Cruz iha minutu 28’ no 32’. Nune’e mos Avansadu AS. Ponta Leste, Silveiro Garcia konsege taka vitoria Timor-Leste nian ho nia golu iha minutu 90+1.

Iha AFF Championship 2018, Timor-Leste sei hamutuk ho Indonesia, Thailandia, Filipina no Singapura iha Grupu B. Entertantu iha Grupu A Malaysia hamutuk ho Vietnam, Myanmar, Laos no Kambodia.

Treinador Timor-Leste, Norio Tsukitate (kamija metan) ho Kapitaun Selesaun Timor-Leste Jorge Sabas hasai foto hamutuk ho treinador no kapitaun Brunei iha konferensia imprensa antes jogu second leg nian. Photo: AFF

Jogu dahuluk Timor-Leste nian sei kontra Thailandia iha 9 Novembru, vs Indonesia (13/11), vs Filipina (17/11), no ikus kontra Singapura (21/11).

Kontra Thailandia no Filipina, Timor-Leste sei joga iha nia uma rasik. Maibe foin dadauk, iha jogu home versus Brunei, Timor-Leste joga iha KLFA Stadium, Kuala Lumpur, Malaysia.

Selesaun Timor-Leste dadauk ne’e treina hosi treinador Japaun, Norio Tsukitate. Selesaun ne’e mak foin lalais ba joga iha Asian Games 2018 iha Jakarta, Indonesia.

Editóra: Agida DOS SANTOS I COPPYRIGHT THETIMORNEWS © 2018

 

LEAVE A REPLY

Please enter your comment!
Please enter your name here