Home internasional Hafoin Asian Games, Imelda Hakarak Tan Reprezenta TL iha Olympic Games

Hafoin Asian Games, Imelda Hakarak Tan Reprezenta TL iha Olympic Games

541
0
SHARE
Imelda Felicyta Ximenes Belo mak atleta Swimming feto Timor - Leste ne'ebe sei partesipa iha eventu Asian Games. Photo: TTN/Evangelisto Santos

By: Hortencio Sanches

THETIMOR-NEWS.com, DILI – Mundu desportu iha loron hirak tan nia laran hot-hotu sei konsentra nia matan hotu ba eventu desportu internasional Asian Games 2018 ne’ebe sei halao iha Jakarta-Palembang, Indonesia hahu 18 Agostu ate 2 Setembru 2018.

Timor-Leste ne’ebe geografikamente iha teritoriu continental Azia nian mos sei partisipa ba festa desportu komunidade Azia nian ne’e.

Uniku uituan iha Asian Games tinan ne’e, tamba iha tan modalidade foun tolu ne’ebe Timor-Leste mos sei haruka nia atleta ba compete hanesan Futebol, Tiru no nani (swimming).

Imelda Felicyta Ximenes Belo mak atleta Swimming feto Timor – Leste ne’ebe sei partesipa iha eventu Asian Games. Photo: TTN/Evangelisto Santos

Maibe hosi modalidade 3, Imelda Felycita Ximenes Belo ho idade tinan 20, uniku atleta hosi modalidade nani mak sei compete mesak.

“Orgullu bele reprezenta Timor-Leste,” komentariu Imelda wainhira dada lia ho thetimor-news.com iha sesaun treinu ne’ebe halao iha Piscina JL Vila Aimutin, Dili, semana ida liu ba.

Nudar federasaun foun iha Timor-Leste, Imelda kontinua hetan konfiansa hosi nia federasaun hodi reprezenta Timor-Leste iha festa desportu nivel Azia ne’e hodi hatudu ba komunidade internasional katak Timor-Leste mos dadauk ne’e iha ona nia atleta nani.

“Iha Asian Games, ami kontinua haruka Imelda ba, tamba uniku atleta ne’ebe ami iha no iha ona esperensia internasional mak nia mesak det, maski internasionalmente sedauk iha prestasaun,” dehan Laurentino Guterres, Prezidenti Federasaun Nani foin lalais ne’e.

Atleta Imelda halo hela nia aktividade treinu nani hodi partisipa iha eventu internasional Asian Games ne’ebe sei halo iha Jakarta-Palembang Indonesia. Photo: TTN/Evangelisto Santos

Maski ho limitasaun fatin treinu hanesan piscina ne’ebe la tuir standar no ekipamentu ne’ebe menus, nia kontinua optimista katak sei compete hodi hatudu rezultadu diak ba Timor-Leste.

“Hau nia target hakarak hadia hau nia tempu uluk hau compete iha SEA Games Malaysia iha tinan kotuk liu ba. Iha Asian Games, hau sei halo ida ne’e no hatudu ba mundu katak Timor-Leste mos bele ona,” dehan oan hosi Sergio Gusmao de Freitas Belo ho Odete da Silva Ximenes ne’e.

Atleta ne’ebe uluk mehi hakarak sai dotora, maibe dadauk ne’e sai fali atleta nani, estuda hela nudar estudante enjineria iha Universidade Nasional Timor Lorosa’e (UNTL), iha mehi bo’o seluk ne’ebe hakarak kompleta ninian prezensa uha eventu desportu nivel altu hanesan olimpik games.

“Hau nia mehi agora mak, depois compete iha Asian Games, hau hakarak reprezenta tan Timor-Leste iha jogos olimpiku,” dehan Imelda ne’ebe mos hetan ona oportunidade hosi nia federasaun treinu tinan ida iha Phuket, Thailandia ne’ebe treina hosi treinador hosi Espana, Miguel Lopes.

Editor: Evangelisto MEILANA I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here