Home dezenvolvimentu Dezenvolvimentu Infraestrutura Kontinua Sai Programa Prioridade ba VIII Governu

Dezenvolvimentu Infraestrutura Kontinua Sai Programa Prioridade ba VIII Governu

32
0
SHARE
Primeiru Ministru (PM) Taur Matan Ruak. Photo: media/AMP

By: Hortencio SANCHES

THETIMOR-NEWS.com, DILI – VIII Gvernu ne’ebe lidera hosi esis Prezidente Republika 2012-2017 Taur Matan Ruak kompromete kontinua tau prioridade hodi dezenvolve area infranstrutura atu sai diak liu iha nasaun ne’e.

Tanba ne’e, iha nia mandatu sei la fo lisensa projetu ba konstrusaun sira bainhira laiha ligasaun nesesariu servisu baziku sira.

“Governu ida ne’e labele kontinua tan fó lisensa ba  projetu ka konstrusaun sira bainhira laiha ligasaun nesesária ho servisu báziku sira. Nune’e, ami mós lakohi atu diskrimina projetu boot no ki’ik sira, atubele harii uma sosiál ba família sira ne’ebé presiza liu ka inagura empreza ki’ik ka média husi emprendedór timoroan, ne’ebé ami konsidera iha valór no direitu hanesan, atu simu servisu públiku Estadu nian,” dehan Xefi Governu Taur Matan Ruak iha nia diskursu bainhira diskute programa governu, iha Parlamentu Nasional, Kuarta (25/07/2018).

Nia dehan, Iha tempu hanesan, laiha sentidu, hodi kontinua  hadi’a sidade no emprendimentu sira ne’ebé laiha ordenamentu, bainhira laiha asesu ba estrada, transporte, abastesimentu ka komunikasaun nesesária ba ita-nia moris no ba ita-nia atividade sira.

“Daruak, ami sei Kontinua Dezenvolve iha Infraestrutura sira,  ne’ebé investe la’os de’it iha konstrusaun ba estrada, ponte, portu, aeroportu sira, maibé mós ba utilizasaun, konservasaun, manutensaun no reparasaun di’ak iha tempu loloos,  hodi garante katak prazu utilizasaun iha tempu ne’ebé kumpre no, karik  bele hanaruk tanba monitorizasaun no akompañamentu,” dehan Taur.

Hare ba dezenvolvimentu infraestrutura pilar importante iha nasaun ne’e, Taur esplika “Infraestrutura importante tebes ba dezenvolvimentu ekonómiku no sosiál, ho eskala no kustu asosiadu ba implementasaun iha rede infraestruturál gasta ona 3,062 biliaun iha kapitál dezenvolvimentu husi tinan 2007 to’o 2017, hanesan dezafiu boot ida atu sustenta produtividade, hodi kria serbisu empregu no ba dezenvolvimentu iha setór privadu iha nivel nasionál.”

Nune’e, planeamentu, orsamentasaun, monitorizasaun no avaliasaun hanesan parte importante iha estratéjia.

Iha tempu badak, Governu sei halo levantamentu detalladu liuhusi infraestrutura no projetu sira ne’ebé maka la’o hela, hodi avalia fila-fali, koriji no estrutura fila-fali planu infraestrutura, halakon asimetria diferensa no taka lakuna falta hirak ne’ebé maka sei eziste iha país ne’e.

Enmuantu, sei tau prioridade mos atu kapasita rekursu umanu hodi halo knar diak iha area hirak ne’ebe temi.

“Ami mós sei presiza profesionalizmu barak ba rekursu umanus no ba empreza kontratada sira iha setór ne’e, atu hetan rezultadu ne’ebé di’ak liu iha planeamentu, monitorizasaun, inspesaun no fiskalizasaun no mós kualidade, sustentabilidade no ponderasaun ne’ebé di’ak liu ba kustu benefísiu sira,” dehan Nia.

Entretantu, Iha misaun ne’e,  sei implementa kolaborasaun ida ne’ebé estreita ho organizasaun espesializada sira auditoriál sosiál nian,ne’ebé eziste iha sosiedade sivil.

“Ami sei kontinua atu investe iha planu infraestrutura ne’ebé orienta ona ba mobilidade rede estrada, transporte sira, ba moris-di’ak sidadaun sira nian bee, saneamentu, eletrisidade no telekomunikasaun sira), ba prestasaun servisu enerjia, meteorolojia, servisu postál nian sira, ba estabelesimentu Timor-leste ida ne’ebé modernu, dezenvolvidu no prósperu,” nia dehan.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here