Home divertementu IllasTimoroan Hare Hosi Arte Fotografia

IllasTimoroan Hare Hosi Arte Fotografia

392
0
SHARE
Imajen ne'e mak REKREATIF aprezenta iha feria Photo Bangkok2018 iha Thailand ho tema Face of Timor - Leste.

THETIMOR-NEWS.com, DILI – REKREATIF (Rede Kreatividade Fotografu) Timor-Leste, hetan konvite husi Bangkok Art and Culture Center (BACC) hodi partisipa iha Post-Repost-Share Exibition as part of Photo Bangkok 2018. Programa ne’e nudar eventu ida hodi fahe esperiensia kona ba arte fotografia nian. Programa exibisaun fotografia ne’e, halao tinan tolu dala ida, iha Bangkok, Thailandia.

Imajen ne’e mak REKREATIF aprezenta iha feria Photo Bangkok2018 iha Thailand ho tema Face of Timor – Leste.

Iha 2015, Bangkok Art and Culture Center (BACC) servisu hamutuk ho organizasaun kultural no parseria ba galeria sira, organiza ba dala uluk festival fotografia Bangkok 2015, ho objetivu atu kria oportunidade no halo expansaun ba artista Thai sira iha arte ba cena do mundo (world scene) nian.  Iha exibisaun lubuk ida husi artista kunhesido iha regional no internasional, no mos husi atividades edukasional husi distrito oi-oin iha Bangkok. Susesu husi festival ne’e maka enkoraja Bangkok Art and Culture Center (BACC) no Photo Bangkok hodi kontinua festival ne’e, no hahu estabelese papel fotografia nian iha arte kontemporaria no kultura, iha sira nia sosiedade agora.

Post-Repost-Share Exibition ne’e halo exibisaun fotografia husi Nasoens Sudeste Asiatiku, hanesan exibisaun importante ida husi Photo Bangkok 2018 nian. Sai hanesan kurador ba eventu ne’e mak Doutora Toeingam Gubtabutra (Thailandia) no Sr. Angki Purbandono (Indonesia), nebe halo survei ba relasaun kontemporaria entre: fotografias no hare nain sira, iha dekade 21. Situasaun ida nebe media sosial muda ona maneira ema utiliza sira nia kamera, maneira oinsa sira aprezenta sira nia fotografia, no maneira hare fotografia.  Post-Repost-Share Exibition Photo Bangkok 2018 ne’e, hahu iha 5 de Julho to’o 9 de Setembro de 2018.

Iha Timor-Leste kurador nain rua ne’e  sente surpreza, tamba sira konsege hasoru fotografu sira iha REKREATIF no fotografu nain rua Antonio Gonsalves no Lirio da Fonseca. Arte fotografu nebe Timor oan sira aprezenta, kurador nain rua ne’e konsidera hanesan “diamante”. Maiske, sira laiha meius oi-oin hanesan: edukasaun formal, nao formal, exebisaun, no iha rasik galeria, hodi bele dezenvolve liu tan sira nia talentu iha arte fotografu, maibe sira nia fotografia diak no selesionadu hodi ba halo exebisaun iha “Photo Bangkok 2018” hamutuk ho artista senior sira husi rai seluk.

Alein de fotografia Timor oan nian selesionadu ba exibisaun “Photo Bangkok 2018”, REKREATIF reprezenta husi Sr. Hipolito da Silva Baptista no Henriqueta M. da Silva hetan konvite hodi ba koalia iha eventu fahe esperiensia artista nian iha dia 6 Jullho 2018, iha Bangkok Art and Culture Center (BACC), Thailandia. Painelista Timor oan, hamutuk ho artista senior: Che’ Ahmad Azhar, husi Malaysia) no Chua Chye Teck (husi Singapura), fahe esperiensia ho tema “Cities and People”. Esperiensia fotografu Timor nian ba ho tema “Faces of Timor-Leste” ka “Ilhas oi-oin husi Timor-Leste”.

Fotografia husi ilhas (oin) ema Timor oan 18 (sanulu resin walu) nian maka selesionadu hodi ba halo aprezentasaun iha eventu ne’e. Fotografia hirak ne’e, inspira husi situasaun Timor nian nebe ho: historia (background) diferente, sosiedade mista ho rasa oi-oin, no liafuan no dialetiku oi-oin. Fotografia hirak ne’e enkoraja Rekreatif:          1) oinsa atu hatene orijin husi sosiedade Timor-Leste nian liu husi ilhas (oin); 2) oinsa atu hatene troka ka interasaun entre komunidade ninia efeitus no impaktu ba orijin no identidade sosiedade Timor-Leste nian; 3) atrai ema atu kontinua halo peskiza klean hodi dokumenta hanesan historia; no 4) produz livro ida hanesan “katalog” kona ba sosiedade mista iha Timor-Leste.

Fotografia hirak nebe aprezenta iha eventu ne’e reprezenta 1) desendente Timor oan husi diaspora hanesan desendente: Chineses, Portuguese, Indonesio, Africano, Iemenita (Arabico) no sst; no mos 2) desendente orijin husi Mambae no Makasae.  Iha aprezentasaun ne’e, sei hamosu duvidadas kona ba orijin lolos Timor oan nian, tan laos deit hetan influensia husi diaspora liu husi koloanialismo Portugal, Igreja Katolika no okupasaun Indonesia, maibe, antigamente hetan influensia mos husi kultura Melanesia no Austronesia.  Nune’e, interesante duni atu kontinua halo peskiza, tamba ita bele mos buka hatene ita nia orijin liu husi ilhas diferente husi Timor oan sira.

Aprezentasaun ne’e hetan apresiasaun bot husi komisaun organizadora sira no publiku iha Bangkok. Reasaun husi kurador Doutora Toeingam Gubtabutra no Angki Purbandono, artista fotografu senior husi Malaysia no Singapura, mak komprometidu atu ajuda REKREATIF hodi desenvolve talentu Timor oan nian iha arte fotografu. Sira hakarak mos kontribui ba halo dokumentasaun kona ba historia no beleza Timor-Leste nian liu husi arte fotografu nian. Sr. Joaquim Amaral, Ambasador Timor-Leste nian ba Thailandia, apresia no orgulho mos tamba Timor primeira vez hola parte iha exibisaun internasional ne’e. Ambasador ne’e mos falisita kualker apoiu nebe sei fornese husi komunidade arte fotografu iha Bangkok ba desenvolvimentu talentu Timor oan nian no ba dokumentasaun historia no beleza Timor-Leste nian.

Ho eventu ne’e, istimula liu tan REKREATIF atu kontinua promove kunhesimentu kona ba arte fotografia ba juventude sira, no kontribui ba produz no promove fotografia kona ba dezenvolvimentu no beleza Timor-Leste nian liu husi eventu oi-oin kona ba arte fotografu. Hein katak inisiativa ne’e bele hetan apoiu no atensaun husi entidades relevante sira.

LEAVE A REPLY

Please enter your comment!
Please enter your name here