Home nasional Forma Governu, Xanana: AMP la Presiza Koliga ho Partidu Seluk

Forma Governu, Xanana: AMP la Presiza Koliga ho Partidu Seluk

1881
0
SHARE
Prezidente AMP Kay Rala Xanana Gusmao. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Tuir Rezultadu provizoriu Eleisaun Antesipada ne’ebe publika sai hosi Sekretariadu Tekniku Administrasaun Eleitoral (STAE) liu hosi apuramentu municipal hatudu katak partidu Aliansa Mudansa ba Progresu (AMP) sai hanesan vensedor ho kadeira hamutuk 34.

Tanba ne’e, Prezidente AMP Kay Rala Xanana Gusmão hatete, sira nia parte iha ona posibilidade hodi forma mesak VIII Governu tanba tuir lei.

“Iha Parlamentu, iha 65 kadeiras, 33 signifika maioria, tan ne’e ami iha 34 entaun bele mesak forma ona Governu,” dehan Xanana liu hosi konferensia  imprensa ne’ebe halo iha sede nasional AMP Bairos dos Grilhos Dili, Tersa (15/05/2018).

Lider ne’e dehan, bainhira AMP halo koligasaun kuandu rezultadu eleisaun partidu refere hetan deit kadeira 32 mai kraik.

“Ami koligasaun tia ona, ami manan maioria absoluta tia ona ne’ebe ami atu halo saida tan. Karik ami hetan 32 kadeira ne’e ami presiza tan kadeira no halo koligasaun tan,” dehan Xanana.

Maski AMP seidauk prense kriteria dois tersu iha Parlamentu Nasional tanba tuir lei atu priense dois tarsus tenke iha kadeira 43 nune’e bele asegura bainhira Prezidente Republika veta orsamentu ne’ebe aprezenta.

Nune’e, lider ne’e esplika, “Prezidente Republika atu veta orsamentu tenke iha razaun fundamentais bainhira ami halo violasaun ba lei ruma, ne’ebe hau sente katak Lu-Olo sei hanoin didiak no hau mos ba apoiu nia ba sai hanesan Prezidente Republika laos atu sai Prezidente FRETILIN, tan ne’e nia tenke hatudu mai ami nain rua hanesan nia prezidente ba povu tomak no labele hatudu fali frakeza hodi roman tuir fali FRETILIN hodi funsiona nafatin nudar Prezidente FRETILIN”.

Nia hatutan, Lu-Olo atu hola dezisaun ruma hodi veta orsamentu ne’ebe sira aprezenta tenke tenke hare didiak no fo razaun ne’ebe fundamental hanesan Prezidente Republika

“Sistema Prezidensial ne’e mak laiha Primeiru Ministru ne’ebe Prezidente Republika ba iha ne’eba ne’e repezenta hanesan Prezidente partidu nian, Ami hein katak Lu-Olo sei la monu ba tentasaun dalaruma ita nudar  ema umanu bele monu ba tentasaun,” dehan Xanana.

Enkuantu, iha formasaun Governu da-ualu lider ne’e hatete, sira nia parte seidauk koalia hodi deside se los mak atu asumi pasta hanesan Primeiru Ministru.

“Kona ba Primeiru Ministru ami seidauk koalia,” dehan Xanana.

Iha rezultadu provizoriu ne’ebe publika hosi STAE hatudu katak, AMP mak sai hanesan partidu vensedor ba eleisaun antesipada ho kadeira 34, FRETILIN 23, PD 5 no FDD 3.

AMP Vensedor iha eleisaunn ne’e ho votus hamutuk, 308.548 (49.59%), FRETILIN 212.702 (34.18%), PD 49.591 (8.03%) no FDD 34.235 (5.50%).

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here