Home dezenvolvimentu Governasaun AMP Sei Kria Empregu ba Joven

Governasaun AMP Sei Kria Empregu ba Joven

1664
0
SHARE
Prezidente AMP Kay Rala Xanana Gusmao hatudu hela manual programa AMP nian ba militante sira. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Bloku Aliansa Mudansa ba Progresu (AMP) liu hosi lider masimu Kay Rala Xanana Gusmao promote, bainhira povu fo fiar kaer Governu ba tinan lima, sei loke empregu ba joven no dudu ekonomia iha nasaun laran.

“Joven iha Timor – Leste agora daudaun hamutuk 62%, tanba ne’e, bainhira AMP kaer ukun sei kria kampu traballu ba Joven, dudu mos ekonomia hodi ida ne’e mak hau defende bebeik Greater Sun Rise (GSR) tenke dada mai Timor –Leste. Se dada ba Australia fo servisu deit ba ema ita hein simu osan deit, ida ne’e estadu riku, maibe povu kiak nafatin,” dehan Xanana Gusmao ba militante no simpatizante AMP no komunidade Dom Aleixo ne’ebe partisipa iha Mini Kampana AMP, iha kampu futebol Comoro, Kampu Baru, Dili, Sexta (27/08/2018).

Lider Kay Rala Xanana Gusmao. Photo: TTN/Hortencio Sanches

Hare’e ba realidade progresu ne’ebe Timor – Leste durante ne’e seidauk atinji, los objetivu lider ne’e esplika, estadu sei fraku tanba sei iha faze konstrusaun. Maibe, tenke hametin nafatin ba oin hodi asselera dezenvolvimentu.

“Ohin loron ema balun dehan tinan 10 la halo buat ida, sim hau konkorda, maibe sira sa’e kareta ho vidru metan deit mak halo sira nia matan la hare’e saida mak halo ona ne’e,” dehan Xanana.

Tanba ne’e nia dehan, tinan ida ne’e AMP la halimar no la koalia barak tenke bo’ok daudaun ba ekonomia atu nune’e bele fo garantia ba povu nia moris.

Lider Karismatiku Xanana Gusmao koalia ho lian makas hodi husu ba Joven sira tenke estuda makas atu nune’e bele hetan futuru ne’ebe diak. Photo: TTN/Hortencio Sanches

“Agora tenke dudu ekonomia, bainhira estadu la hanoin atu dudu ekonomia mak nasaun sei la lao ba oin. Ida ne’e mak hau dehan kria empregu ba ita nia joven sira,” dehan eis Komandante Supremu FALINTIL ne’e.

Alende ne’e, nia husu ba Joven sira tenke estuda makas atu nune’e bele sai fini ne’ebe diak iha futuru. Bainhira sai hanesan lider bele iha hanoin ne’ebe diak oinsa atu lori nasaun ne’e ba oin.

“Joven sira rona ba, buat sira ne’ebe hau koalia ne’e, tau ba imi nia ulun, to’o imi nia tempu sai hanesan ami tenke hamrik hamutuk oinsa atu hanoin saida ba rai ida ne’e no povu nia moris atu nune’e bele sai unidade ida ne’ebe metin,” dehan ema numeru ida iha AMP ne’e.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here