Home dezenvolvimentu EUA Kontinua Apoiu Demokrasia iha Timor – Leste

EUA Kontinua Apoiu Demokrasia iha Timor – Leste

286
0
SHARE
Embaxadora EUA akompaina husi Forsa Marino EUA koalia hela konaba prosesu halo konstrusaun eskola ensino Bazico 1,2,3 Liquica Vila. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Estadus Unidus Amerika (EUA) kontinua apoiu demokrasia ne’ebe daudauk ne’e buras tebes iha Timor – Leste liu hosi eleisaun ne’ebe lao justu tebes.

 “Governu Estadus Unidus ne’ebé sempre apoia eleisaun demokrátika iha Timor-Leste husi 2002, sei kontinua promove prosesu eleitoral tomak ba eleisaun antesipada 2018,” Dehan Embaixadora EUA iha Timor-Leste Kathleen M. Fitzpatrick liu hosi komunikadu imprensa ne’ebe THETIMOR-NEWS assesu, Tersa (24/04/2018).

Apoiu husi Misaun EUA nian iha Timor-Leste, mai hosi Ajensia Amerikana ba Dezenvolvimentu Internasional (USAID), Ministériu Negosiu Estranjeiru EUA no ajensia seluk ne’ebé sei foka liu ba fortalesimentu partidu polítiku sira no instituisaun gestor eleisaun nian, apoia observasaun ba eleisaun no promove atividade edukasaun sívika no edukasaun votante.

“Eleisaun ne’ebé Livre, justu no transparente sei ajuda harii fiar entre Timoroan sira ho sira nia Governu.” Dehan Embaixadora EUA ne’e.

Nia dehan apoiu EUA nian ba Timor – Leste atu lori nasaun ne’e ba futuru ne’ebe diak no demokrasia bele forte liu iha nasaun ne’e.

“Ami nia apoia ajuda lori nasaun ne’e ba futuru ida ho auto-sufisiensia, instituisaun demokrátika sira ne’ebé forte no populasaun ne’ebé saudavel no prosperu,” dehan Kathleen.

USAID oforese ona apoia ba International Republican Institute (IRI) atu haruka observador internasional nain 18 iha eleisaun antesipada.

Ekipa Observador Internasional inklui IRI nia membru konsellu administrasaun, funsionariu IRI, eis Embaixador ba Banku Dezenvolvimentu Asia no membru husi Partidu Liberal Australia.

Igreija Katólika nia  Observatorio da Igreja Para os Assuntos Sociais (OIPAS) simu mo’os apoiu husi EUA hodi haruka observador nasional ida ba sentru votasaun ida husi sentru votasaun 885 iha Timor-Leste durante loron eleisaun.

USAID mo’os apoia IRI nia observador internasional tolu no OIPAS nia observador nasional hodi observa kampaña eleitoral. Hanesan iha eleisaun presidensial no parlementar 2017 nian, Misaun EUA nia funsionariu sei sai mos observador iha eleisaun ida ne’e.

Antes eleisaun, partidu polítiku no koligasaun sira simu mo’os apoiu husi EUA inklui formasaun hodi dezenvolve mensajen kampaña bazeia ba problema real sira no enkoraja feto no joven sira nia partisipasaun. Hafoin eleisaun, apoiu governu EUA nian sei kontinua atu ajuda haforte Parlementu Nasional nia rekursu umanu, kapasitasaun institusional, promove atividade deputadu sira no oferese apoiu tékniku ba forum Feto Parlementar.

EditórA: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here