Home nasional EA 2018, FRETILIN No 4 – AMP 8

EA 2018, FRETILIN No 4 – AMP 8

542
0
SHARE
Prezidente Tribuna Rekursu Deolindo dos Santos ho nia Staf dada hela sorteu ba partidu politiku sira ne'ebe atu kompete iha eleisaun antesipada. Photo: Espesial

By: Hortencio SANCHES

THETIMOR-NEWS.com, DILI – Rezultadu hosi sorteu ne’ebe Tribunal Rekursu (TR) halo  ba Partidu Politiku 8 ne’ebe fiksu ona atu partesipa iha Eleisaun Antesipada (EA) 2018 Partidu Zigante FRETILIN hetan No. 4 no koligasaun AMP 8.

Iha rezultadu Sorteu hatudu, Partidu Esperansa da Patria (PEP) tur iha No. 1, Partidu Demokratiku (PD) 2, Partidu Republikanu (PR) 3, Frente Revolucionaria Timor – Leste Independente (FRETILIN) 4, Koligasaun Movimentu Sosial Demokratiku (MSD) 5, Movimentu Dezenvolvimentu Nasional (MDN) 6, Forum Dezenvolvimentu Demokratiku (FDD) 7 no Aliansa Mudansa ba Progresu  (AMP) 8.

Iha Partidu 8 ne’e, koligasaun 4 no ne’ebe avansa mesak 4, koligasaun mak hanesan FDD kompostu hosi, Ferente Mudansa, UDT, PDN, ho PUDD, AMP CNRT, PLP  no KHUNTO, MSD PST, PSD, CASDT no PDC, MDN APMT, UNDERTIM, MLPM no PLPA.

Partidu avansa mesak mak hanesan FRETILIN, PD, PR no PEP.

Hare ba rezultadu Sorteu ne’ebe halo ona, Militante FRETILIN Teotonio Amral hatete, sente kontente tebes ho numeru ne’ebe mak FRETILIN hetan no nia parte garante FRETILIN sei  manan maioria iha eleisaun hodi ukun Timor –  Leste sai Buras liu.

“Hanesan militante hau sente kontente ho numeru ne’ebe FRETILIN hetan liu hosi dada rifa ohin ne’e, fiar katak FRETILIN sei manan duni iha eleisaun ida ne’e,” dehan Teotonio ba THETIMOR-NEWS Merkadu Comoro, Tersa (03/04/2018).

Nia dehan so FRETILIN deit mak iha vontade no planu ne’ebe diak hodi lori nasaun ne’e ba oin. Tanba ne’e nia husu ba povu hotu iha  Timor – Leste tenke tau konfiansa ba FRETILIN atu manan maioria iha eleisaun.

Iha sikun seluk, Militante AMP hosi partidu CNRT Maria da Consecao hatete, ho numeru ne’ebe AMP hetan fiar katak AMP sei manan iha  eleisaun hodi kaer  Governu  da Ualu nian  durante tinan lima.

“No.  AMP nian 8 signifika AMP manan maioria ona iha tinan ida ne’e, VIII Governu Konstitusional AMP mak sei forma, hau fo hau nia votus konfiansa ba AMP atu manan, hau vota ba AMP tanba maun bo’ot  Xanana no Taur Matan Ruak,” dehan Maria.

Enkuantu, iha eleisaun Jeral 2017 partidu hamutuk 21 mak kompete maibe  rezultadu ikus hatudu partidu 5 mak konsege hakat liu bareira 4% hodi tama ba PN.

Partidu hirak ne’e mak hanesan FRETILIN  hetan kadeira 23, CNRT 22, PLP, 8, PD 7no KHUNTO 5.

Hare ba Partidu 5 ne’e, laiha ida manan maioria hodi forma Governu, nune’e partidu maioria simplis FRETILIN halo negosiasaun ho partidu hat seluk maibe to ikus konsege hamutuk deit ho PD hodi forma VII Governu Konstitusional Primeiru Ministru (PM) lidera hosi Mari Alkatiri.

Maski  Governu lao ona maibe  partidu ne’ebe tama iha koligasaun Governu kadeira iha PN hamutuk 30 no Opozisaun 35, hare ba opoziosaun iha liu forsa politiku sira ho inisiativa halai hamutuk hodi forma Aliansa Maioria  Parlamentar (AMP) kompostu hosi bankada CNRT, PLP no KHUNTO.

Bainhira AMP hamrik ona fo ameasa bo’ot ba VII Governu atu lori Programa ba aprezenta iha PN, to ikus AMP konsege vota kontra duni programa no orsamentu ne’ebe aprezenta hosi Governu.

Tanba ne’e, impase politiku mosu makas iha  PN, Prezidente Republika  hanesan orgaun ne’ebe as liu iha instituisaun hotu iha Timor – Leste foti dezisaun hodi dizolve PN iha Fevreiru 2018  liu ba hodi konvoka eleisaun Antesipada.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here