Home dezenvolvimentu Luta Fulan 6 iha Rai Liur, Xanana Fila Mai TL

Luta Fulan 6 iha Rai Liur, Xanana Fila Mai TL

1954
0
SHARE
Xefe Negosiador Prinsipal Fronteira Maritima Kay Rala Xanana Gusmao akompaina husi eskoltu nain 2 tun husi aviaun bainhira fila husi servisu durante fulan 6 iha rai liur kona ba Fronteira Maritima Timor - Leste nian. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Durante fulan nen, Xefe Negosiador Prinsipal Fronteira Maritima Kay Rala Xanana Gumão hela iha rai liur hodi luta ba soberania Timor – Leste nian kona ba lina maritima entre Timor – Leste no Australa nune’e bele hatene lolos fronteira tasi keta-ketak husi nasaun rua ne’e.

Iha negosiasaun ne’ebe lider lutador ne’e halo konsege hetan duni rejultadu ne’ebe diak tanba lina fronteira tasi entre Timor – Leste no Australia define lolos tuir lei internasionais ne’ebe akordu assina ona iha Nova Iorke Estadus Unidus Amerika (EUA) 6 Marsu foin lalais ne’e, sasin ba asina akordu rai rua ne’e direitamente husi Sekretariu Jeral ONU Antonio Guterres.

Tanba ne’e, ohin Domingu 11 Marsu 2018, lider istoriku ne’e to ona iha Timor – Leste ho Aviaun Sriwyjaya mais ou menus 1:30 oras Timor – Leste nian.

Bainhira lider ne’e to iha Aeroportu Internasional Nicolau Lobatu Dili simu direitamente husi eis Prezidente Republika Taur Matan Ruak ho nia espoza membru Governu balun, organizasaun veteranus balun no lider partidus politiku balun ho sira nia militante.

Hafoin ne’e, eis Prezidente RDTL 2002-2006 ne’e akompaina husi ema barak ne’ebe hein iha Aeropotu  ne’e hodi hakat liu ba sede Partidu Aliansa Mudansa ba Progresu Bairus dos Grilus Dili.

Iha Diskursu lider ne’e hatete, ema hotu hatene lina tasi Timor – Leste ho Australia los no hotu ona maibe funu seidauk remata no sei luta nafatin hodi hadau riku soin Timor – Leste nian iha tasi laran.

“Povu tomak tenke fiar ba Maromak iha leten as ba sei fo tulun ba ita hotu, fiar ba ita nia rai lulik fatuk lulik, fiar mos ba ita hotu ne’ebe hamrik iha ne’e, ita nia luta ba lina tasi hotu ona maibe funu ba hadau rikusoin mak seidauk remata,” dehan Xanana Gusmão iha konferensia imprensa ne’ebe halo iha sede Partidu Aliansa Mudansa ba Progresu (AMP) Bairu dos Grilos Dili.

Alende ne’e, nia kontente tebes ho povu Timor – Leste ne’ebe hatudu maturidade diak tebes maski iha impase politiku maibe lamosu konflitus hanesan 2006 ne’ebe povu barak sai vitima.

“Durante hau iha liur, bainhira iha aviaun laran simu mensajen husi ema balun dehan programa Governu nian la pasa hamutuk ho orsamentu mos la passa, maibe hau atu halo nusa hau iha hela aviaun laran ne’e, maibe hau iha aviaun leten hateke tun mai Timor laiha ahi nia suar hanesan 2006, entaun hau toba deit iha aviaun laran tanba povu matenek hotu ona no kompriende lolos valor demokrasia,” dehan aman ba nasaun ne’e.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here