Home nasional PD Helena Bainhira Apoiu AMP

PD Helena Bainhira Apoiu AMP

2947
0
SHARE
Lider Partidu Demokratiku (PD) Adriano Nacimento. Photo Espesial

By: Hortencio SANCHES

THETIMOR-NEWS.com, DILI – Membro CPN Partidu Demokratiku (PD) Adriano Nacimento hatete, bainhira PD fo ona apoiu ba Aliansa Mudansa ba Progresu (AMP) mak sira sei Hela deit naran alias ‘Helena’ tanba partidu refere lakon ona identidade.

“Antes kampaina ona ne’e PD labele apoiu sira, kuandu apoiu ne’e signifika katak halo hamutuk ho sira, se PD apoiu ona ba sira signifika PD la vota ona ba nia an rasik, ho FRETILIN deit mos ami lao keta-ketak sa tan ba hamutuk fali ho AMP, kuandu PD fo nia votus ba AMP mak PD hela deit ona naran ona, nune’e mak kampaina ne’e ita labele apoiu malu,” dehan Adriano ba Jornalista iha Palacio do Governo Dili, Tersa (06/03/2018).

Nia esplika, PD lao mesak hanesan dalan alternativa ida hodi husu ba militante tomak tenke vota ba PD iha eleisaun.

Tanba ne’e, agora daudaun PD prepara hela lista kandidatura membru Parlamentu Nasional nune’e bele aprezenta ba Tribunal Rekursu iha tempu besik.

“Agora PD mos prepara hela materia ukun ninian, se bainhira manan karik saida mak PD sei halo hodi oferese ba nasaun ida ne’e, tan ne’e mak loro-loron ami diskuti konaba  materia ukun ninian tinan lima oin mai se PD manan karik saida mak atu bele halo,” dehan Adriano.

Nune’e iha tempu badak, sira nia parte sei halo konferensia ida atu bele aprova materia hirak ne’ebe daudauk ne’e sira diskuti.

Antes ne’e, Portavoz AMP hanesan mos Prezidente Partidu Libertasaun Popular (PLP) Taur Matan Ruak deklara no husu ba PD atu fo apoiu ikus ba lider karismatiku Kay Rala Xanana Gusmao tanba agora nia iha idade ne’ebe bo’ot liu ona.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here