Home nasional Alkatiri Triste Xanana la Partisipa Komemorasaun Loron Veteranus

Alkatiri Triste Xanana la Partisipa Komemorasaun Loron Veteranus

1465
0
SHARE
Eis Komandante da luta Kay Rala Xanana Gusmao koalia hela ho eis fundador RDTL Mari Alkatiri. Photo: Espesial

By: Hortencio SANCHES

THETIMOR-NEWS.com, DILI – Primeiru Ministro (PM) Mari Alkatiri iha komemorasaun loron nasional Veteranus hatete, sente triste tanba iha komemorasaun ne’e, laiha prezensa husi nia Irmao Kay Rala Xanana Gusmao.

“Ohin 3 Marsu hanesan loron Veteranus, iha loron ida ohin ita hatene katak sinas 77 ba 79 baze apoiu rahun komite sentral kuaze 90% mate hotu tanba ne’e iha 1 to 3 Marsu 1983 ita nia maun Kay Rala Xanana Gusmao hanesan membru Komite Sentral FRETILIN lidera reorganizasaun luta Timor – Leste ho nia lideransa mak halo primeiru konferensia FRETILIN hodi kria komite Revolusionaria do Rezistensia Nasional hahu politika hodi hakuak ema hotu hodi kontra okupasaun Indonesia iha momentu ne’eba Xanana Gusmao sai hanesan komisariu nasional FRETILIN no komandante FALINTIL, ohin loron ida ne’e hau sente triste mos uitoan tanba iha komemorasaun ida ne’e hau nia irmao Xanana laiha ne’e maibe ita hotu hatene katak nia ba halo hela servisu importante nasaun nian iha liur,” Dehan PM Alkatiri iha komemorasaun loron Veteranus iha Palacio do Governo, Sabado (03/03/2018).

Lider Jerasaun tuan ne’e dehan, komandante FALINTIL ne’e la marka prezensa tanba ema hotu hatene oras ne’e daudaun nia sei halo hela servisu importante iha rai liur hodi luta ba soberania Tasi Timor nian, tanba ne’e maski nia la marka prezensa maibe povu no lider hotu sente katak nia sempre iha nafatin.

Nia haktuir, liu husi konferensia nasional FRETILIN ne’ebe halo husi lideransa Xanana Gusmao iha 83 hatudu katak luta armada iha Timor – Leste sei moris nafatin hodi fo informasaun ba sira ne’ebe mak halao servisu iha rai liur hodi luta kontra okupasaun Indonesia.

“Ita hotu hatene katak, ita nia luta ida ne’e, hasoru inimigu ida ne’ebe bo’ot liu ita, forsa liu ita, hau atu dehan deit Nicolau Lobatu nia liafuan ne’ebe nia koalia ho Portuges maibe hau tradus fali ba tetun, “ita povu ida ki’ik, fraku maibe ita hatene ita sei manan” ohin loron ita manan duni,” dehan PM Alkatiri.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here