Home dezenvolvimentu Arão: AMP Manana Sei Halo Auditoria Internasional ba Aktividade VII Governu

Arão: AMP Manana Sei Halo Auditoria Internasional ba Aktividade VII Governu

3201
0
SHARE
Prezidente PPN Arao Noe. Photo:TTN/Hortencio Sanches

By: Hortencio SANCHES

THETIMOR-NEWS.com, DILI – Aliansa Mudansa ba Progresu (AMP) liu hosi deputadu Arao Noe Amaral hatete, bainhira sira hetan vitoria iha eleisaun antesipada sei halo uluk auditoria internasional ba aktividade ne’ebe durante fulan nen VII Governu halo.

Tanba sira nia  parte hare no rona informasaun, VII Governu ne’ebe lidera husi Primeiru Ministru (PM) alkatiri ho nia membru sira viola ona lei barak hodi halo planu tuir hakarak laiha kordenasaun ho Parlamentu Nasional.

“Durante ne’e, ami hakarak halo audensia ida ho Ministru Planu Finansas no Ministru Administrasaun Estatal, hodi hetan informasaun kona ba gasta osan duadesimu ba eleisaun antesipada ne’ebe governu utiliza ami detekta katak, kontra lei artigu 31, lei alterasaun finanseira, sira dehan osan ne’e 5 miloens mak uza ba eleisaun, hakarak hatene osan ne’e foti hosi ne’ebe tanba rejime duadesimu ne’e laiha fatin para ba halo eleisaun nian,” dehan Arao Noe ba Jornalista iha sala bankada CNRT Parlamentu Nasional, Kuarta (28/02/2018).

Nia hatutan, Governu de Direitu tenke halo tuir lei ne’ebe mak vigora ona iha nasaun RDTL ne’e no labele foti dezisaun tuir Governu nia hakarak hodi viola lei ne’ebe iha.

“Ami mos hakarak ba eleisaun antesipeda atu nune’e labele husik hela ita nia estadu ne’e hanesan ne’e, kuandu Governu presiza osan tenke tur hamutuk kolia para halo alterasaun ba lei nune’e, fo dalan hodi foti osan husi fundu petroliferu atu nune’e bele finansia eleisaun ne’e, atu bele ita servisu tuir lei labele naran uza kompetensia hodi halo violasaun ba lei sira,” dehan Arao.

Htan ba kestaun ne’e, deputadu bankada FRETILIN Antonino Bianco hatete, AMP lalika mehi atu halo auditoria tanba oras ne’e daudaun VII Governu haruka halo ona  auditoria ba aktividade ne’e Governu anterior sira halao ona.

“Governu agora husu ona auditoria ba buat ne’ebe uluk-uluk nian to agora klaru ne’e direitu duni atu halo auditoria, agora aditoria ne’e aselera husi VI Governu nian tun ba kraik, ne’ebe auditoria nasional no internasional klaru bele halo se mak la tuir regras prosesu Justisa lao hela,” dehan deputadu Bianco.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here