Home nasional Kongressu FFTL no Futuru Futebol Timor-Leste

Kongressu FFTL no Futuru Futebol Timor-Leste

247
0
SHARE

By: Hortencio SANCHES

THETIMOR-NEWS.com, DILI – Mundu futebol Timor-Leste iha 24 Fevereiru sei iha mudansa ba estrutura foun ba Federasaun Futebol Timor-Leste (FFTL), hafoin periodu daruak tutuir malu lidera hosi Francisco Kalbuadi Lay ne’ebe asumi kargu numeru ida iha federasaun ne’e desde 2002.

Oin tuan sei hadau malu iha kongressu nasional datoluk FFTL hodi okupa kadeira numeru ida iha federasaun famouzu iha nasaun ne’e.

Hamutuk iha kandidatura nain 3 ne’ebe sei kompete iha kongressu nasional FFTL nian ne’e. Kandidatu nain 3 ne’e maka, Francisco Geronimo atual vise prezidenti FFTL ne’ebe troka kandidatu Francisco Kalbuadi Lay ne’ebe rezigna an hosi nia kandidatu maski hetan apoiu hosi membru assosiasaun futebol munisipiu balun hodi kontinua lidera federasaun ne’e. Alende Francisco Geronimo, Osorio Florindo atual prezidenti interinu FFTL no mos Sekretariu Estadu Desportu Alta Kompetisaun ne’e mos avansa hafoin hetan konfiansa mos hosi membru assosiasaun sira hodi kompete iha kargu prezidenti FFTL nian ne’e. Legendariu futebol Timor-Leste tempu Portugues no Indonezia, Filomeno Cabral Fernandes mos avansa ba kandidatura nudar prezidenti FFTL, hafoin hetan mos apoiu hosi membru assosiasaun balun.

Hare’e ba kandidatura nain 3 ne’e, hot-hotu merese atu tuur iha kadeira numeru 1 iha FFTL ne’e. Maibe, fila fali ba kongresista sira, ba se votus sira nian sei fo ba.

Kongressu nasional FFTL ne’e sei partisipa hosi membru assosiasaun futebol 17 ne’ebe kompostu hosi munisipiu 13 (Dili iha rua, Dili Weste no Dili Oeste), plus assosiasaun futebol femenina, arbitrazem no treinador.

Dezemvolvimentu futebol Timor-Leste durante ne’e iha lideransa Prezidenti Francisco Kalbuadi Lay lori duni mudansa no progressu bo’ot, no mos iha kontinuasaun prezidenti interinu Osorio Florindo.

FFTL iha lideransa Francisco Kalbuadi Lay konsege lori Timor-Leste tama ba FIFA no AFC ho mos AFF no partisipa ona atividade tomak internasional nian, inklui jogo internasional hanesan pra kualifikasaun Copa Mundial, Kualifikasaun Copa Azia, Kualifikasaun AFF.

Francisco Kalbuadi Lay durante nia lideransa mos konsege lori FIFA mai Timor-Leste hodi apoiu edifisiu ba FFTL, ne’e ohin loron hamrik metin iha eis kampu Demokrasia. Prestasaun ne’ebe extra-ordinariu no merese hetan apresiasaun hosi povu tomak.

Hamutuk ho Osorio Florindo no estrutura sira iha FFTL, Francisco Kalbuadi Lay mos konsege lori mudansa ba rangking Timor-Leste iha FIFA.

Ho rezignasaun Francisco Kalbuadi Lay iha nia kandidatura hafoin period dala rua tutuir malu lidera FFTL, Francisco Kalbuadi Lay fiar metin ona katak nia successor sei lori mudansa no progressu diak liu tan FFTL iha futuru.

Perfil Filomeno Cabral Fernandes

Filomeno Cabral Fernandes, atual vise prezidenti FFTL ne’e avansa ho objektivu hakarak hadia federasaun ne’e, nune’e bele lao diak liu tan iha futuru.

Filomeno Cabral Fernandes, moris iha Dili, 3 Maiu 1955, hela fatin iha Mascarenhas, Dili.  Hahu nia kareira hanesan jogador ho idade ne’ebe nurak, iha tinan 1965-1969 sai hanesan jogador iha kolejiu Nunu Alves Pereira Soibada (Manatuto), nune’e iha tinan 1969-19971, Filomeno joga fali iha eskola Teknika Dili, hodi iha tinan 1971-1972 ba joga fali iha klubu Morcegos Santa Cruz.

Hafoin hatudu joga ne’ebe diak, Filomeno Fernandes, hetan konfiansa hodi joga iha klubu Akademika de Timor iha 1972-1973 no ikus joga iha klubu Sporting Clubo de Timor to’o 1974, hamutuk ho klubu refere ba joga iha Darwin-Australia.

Tama iha tempu okupasaun Indonezia, tinan 1977, reprezenta Timor – Leste ba PON IX iha Jakarta, Indonezia. No tinan 1979-1980, reprezenta PERSEDIL hasoru 12 perserikatan iha teritoriu tomak no iha tinan 1981-1994 joga iha Pra PON X iha Bali.

Reforma hosi jogador, Filomeno kontinua nia kareira futebol nudar jerente ba FFTL nudar mos fundador ba federasaun refere.

Prestasaun ninian iha tinan 2007-2015, lori Primeiru Ministru Kay Rala Xanana Gusmao fo kargu ba nia nudar Kordenador Desportu iha Gabinete Primeiru Ministru hodi hare asuntu desportu nian.

Kriasaun Liga Futebol Amadora (LFA) iha tinan 2015 mos la ses hosi Filomeno Fernandes nia prezensa nudar fundador. No Ikus, 2015-2016 mos asumi kargu assessor iha Sekretariu Estadu Juventude no Desportu.

Perfil Osorio Florindo

Kandidatu Osorio Florindo moris iha tinan 1966, involve FFTL desde tinan 2000. Tuur iha estrutura FFTL nudar membru ezekutivu no iha kongressu daruak FFTL hetan fatin nudar vise prezidenti.

Atual Prezidenti Interinu FFTL ne’e mos dadauk ne’e asumi hela kargu nudar Sekretariu Estadu Desportu Alta Kompetisaun iha VII Governu Konstitusional maski iha fulan hirak nia laran deit tamba lakleur Timor-Leste sei vota hikas iha Eleisaun Antisipada hodi hili fali governu foun.

Alende ne’e, Osorio Florindo mos konesidu iha mundu politiku tamba nia prezensa nudar deputadu Parlamentu Nasional hahu lejislatura dahuluk no daruak, maski iha terseira lejislatura nia kontinua hetan konfiansa hosi nia Partidu FRETILIN hodi asumi nafatin kargu deputadu, maibe ikus tenki husik kargu refere hodi servi fali iha VII Governu Konstitusional.

Alende asumi kargu hirak ne’e, Osorio Florindo mos sai fundador no vise prezidenti ba AS. Ponta Lesta, klubu Primeira Divisaun Liga Futebol Amadora (LFA).

Perfil Francisco Geronimo

Hahu ninian kargu nudar Prezidenti Assosiasaun Futebol Liquica, Francisco Geronimo, atual vise prezidenti FFTL ne’e avansa automatikamente ba kandidatu prezidenti FFTL, hafoin nia pakote kandidatu prezidenti Francisco Kalbuadi Lay rezigna an hosi nia kandidatura.

Atual vise prezidenti FFTL ne’ebe dadauk ne’e asumi hela kargu nudar Konsulado Jeral Timor-Leste iha Kupaun, NTT-Indonezia ne’e iha mos konesementu barak iha mundu futebol no partisipa ona dala barak atividade futebol internasional nian reprezenta Timor-Leste.

Editóra: Agida DOS SANTOS I COPYRIGHT THETIMORNEWS © 2018

LEAVE A REPLY

Please enter your comment!
Please enter your name here