Home intervista AMP Dezenvolve ona, Sei Kontinua Dezenvolve no Harii Governu Ne’ebe Duru no...

AMP Dezenvolve ona, Sei Kontinua Dezenvolve no Harii Governu Ne’ebe Duru no Forte

2001
0
SHARE
Dionisio Babo Soares, Prezidenti CND-CNRT. Photo: Dok Pessoal

THETIMOR-NEWS.com, DILI – Aliansi Maioria Parlamentar (AMP) ne’ebe lidera hosi Partidu Congresso Nacional Recontrução de Timor-Leste (CNRT), Partidu Libertasaun Popular (PLP) no Partidu Klibur Haburas Unidade Nasional Timor Oan (KHUNTO)  fiar metin katak povo sei fo fiar atu kaer ukun iha VIII Governu Konstitusional, depois eleisaun antesipada.

Xanana Gusmao (tara tais) ho Taur Matan Ruak (oklu metan) uluk wainhira komanda no lidera FALINTIL hodi hasoru militar Indonezia iha luta hasoru okupasaun Indonezia. Photo: Google.com

Ho lideransa Xanana Gusmão, Taur Matan Ruak nudar luta nain iha ai-laran ne’ebe lori Timor-Leste hetan nia independensia, no aumenta ho prezensa Jose Bucar Naimori nudar Konselleiru Partidu KHUNTO nian, AMP sei lori duni povu ba desenvolvimento  no estabelece governu ne’ebe duru no forte, hanesan governu ne’ebe uluk tinan 10 CNRT lidera no hatudu ona ba povu Timor-Leste no mundu internasional. Maski sei preciza hadia buat barak maibe CNRT hatudo ona lá falha hanesan partido seluk.

Maski “lamenta” uituan ho dezisaun Prezidenti Republika Francisco Guterres “Lu-Olo” ba nia dezisaun nudar xefi estadu ne’ebe dissolve Parlamentu Nasional no hamosu eleisaun antesipada, sem fundamento tuir rekesitus artigo 86 (f), AMP kontinua fiar an no laran metin katak povu sei tau nia votos konfiansa ba Xanana Gusmão, Taur Matan Ruak no Naimori hodi forma VIII Governu Konstitusional hodi kontinua governu tuan ne’ebe dura deit ho fulan 6 Tanba laiha kapasidade negosiasaun.

Tuir mai intervista EXCLUSIVU jornallista thetimor-news.com, Hortêncio Sanches ho Prezidenti CDN-CNRT, Dionísio Babo Soares iha Uma Fukun Parlamentu Nasional, Tersa (30/01/2018).

TTN: Oinsa Komentariu Partidu CNRT nian, hafoin PR Lu-Olo desidi EA?

Dionisio Babo Soares, Prezidenti CND-CNRT. Photo: Dok Pessoal

DBS: Prezidente Republika depois nia konsulta konsellu estadu, nia rona ema barak no ikus mai nia foti dezisaun dissolve Parlamentu. Hau hare’e tia dekretu Prezidente Republika nian ne’e mak lamenta uitoan tanba dekretu Prezidente Republika nian ne’e la fundamenta no la hatete katak situasaun krize ne’e, krize saida no tanba saida mak Prezidente Republika dissolve Parlamentu, tanba artigu 86 alinea F ne’e, hatete momos katak situasaun grave ne’e signifika katak governu labele forma no programa labele lori dalarua ba PN atu aprova.

Maibe, primeiru, ita nia governu lao diak hela, programa mos mai lao diak hela no rejeitado, segundu programa ne’ebe rasik, governo maka seidauk ka tauk lori mai. Por enquanto, Prezidente Republika foti ona  eleisaun antesipada, ida ne’e hau bele dehan bele kria perseden foun nebe errado no la diak ba ita nia lalaok moris nasaun no konstituisaun iha futuru.

TTN: Tuir CNRT, Dezisaun PR Lu-Olo ba EA ne’e justu  lae?

DBS: Dezisaun ne’ebe Prezidente Republika foti ne’e, direitu prerogativu Prezidente Republika nian. Ita labele kestiona, maibe ita kestiona mak fundamentasaun ne’e. Tanba iha dekreitu lei ne’e, Hau la  hare’e fundamentu ida. Iha Decreto Presidencial mos nem menciona buat ida. Ida ne’ebe hamosu kestaun bo’ot ba Ita nia sistema Legal aban bainrua. Tanba Aban bainrua sei mossu abuso poder no lá kumpre artigo 86 (f) Konstituisaun RDTL.

TTN: Pozisaun CNRT iha EA sei avansa mesak ou kontinua ho Koligasaun hamutuk PLP no KHUNTO?

Prezidente CNRT Kay Rla Xanana Gusmao husi klaran, liman los prezidente PLP Taur Matan Ruak no liman karuk konselleru superior Jose Naimori. Photo: espesial

DBS: Agora daudaun ami seidauk deskute, sei loron hira ne’e mak ami koalia para se bele hamutuk hanesan bloku ida atu nune’e bele fo garantia ida diak liu ba estabilidade governativa ida iha futuru. Se lae ita monu hanesan governo Fretilin ho PD no lá aprova osan estado no osan veteranos, feto faluk no deficientes no seluk nian nebe uluk CNRT halo tiha ona.

TTN: Numeru kadeira CNRT ne’ebe tuun iha Eleisaun Parlamentar 2017, tamba povu la fiar ona partidu ne’e, Ita boot konkorda ho opiniaun ne’e?

DBS: Kona ba kadeira tun povu la fo fiar ona ba CNRT ne’e, lalos. Tanba uluk CNRT lá ukun mesak maibe hamutuk ho partido barak inklui Fretilin ho PD. Rumoris hirak ne’ebe mosu bosok maka barak ne’ebe  hanesan deit propaganda partido seluk nian atu buka votos, maibe povo agora Laos beik hanesan iha 1975.

Prezidente Partidu CNRT,Kay Rala Xanana Gusmao halo komprimisia politiku iha kampaina Elisaun Parlmentar durante fulan jullu 2017, Photo media/CNRT.

Tanba buat ne’ebe sira koalia ne’ebe nunka mais atu investiga, maibe koalia deit hanesan ema ne’ebe laiha hanoin hodi hatun malu deit.  Ita rona provérbio ida iha Português dehan katak, “quem não investiga, não tem a palavra”, se mak la investiga labele koalia.  Maibe, iha Timor ne’ebe ema halo rumoris arbiru deit maka barak, no ita bele kumprende ida ne’ebe.

CNRT nia kadeira ne’e la tun hanesan partidu sira seluk kadeira ne’ebe tun, tanba aumento percentagem ba barreira eleitoral ka “treshold”. Maibe numeru votante ne’e la tun ida, tanba deit presentajen barreira sae tia ba 4% nebe uluk 3% deit. Ida ne’e mak halo numeru kadeira ne’e diminui. Maibe numeru ida votantes ne’e nafatin hela deit la aumenta no la tun, tanba  persentajen ida bareira ne’e sae, maibe kadeira tun.

Ita mos labele dehan CNRT mesak maka tun,  partidu sira seluk mos kadeira tun hotu. Agora ema hare’e mak CNRT deit, partidu sira seluk ema finji lá  hare’e ida mais sira mos lakon hotu, hanesan foin dadauk ne’e lakon tia mos basa liman.

TTN: CNRT dadauk ne’e sempre hetan insulta katak nia eis membru governu barak mak halo korruptor, oinsa CNRT nia komentariu?

DBS: Oras ne’e daudaun ema barak komentariu dehan CNRT nia eis membru governu sira mak koruptu makas, maibe sira la hare’e katak, tribunais sira kaer ema barak ne’e, inklui mos partido seluk hanesan PD nia membru no agora ita hare Fretilin foin ukun fulan 6 governo monu tia no ema balun KAK investiga ona. Xefi Gabinete Primeiru Ministru nian horiseik Tribunal hatun sentensa korrupsaun tinan 2 fulan 6. CNRT orgullu tanba CNRT nia promesa iha kampaina eleitoral ne’e, katak bainhira halo salah ka prejudica governo ka estado tenki responde legalmente. CNRT nia motto maka ne’e,  bele iha partidu ida hamutuk maibe kuandu halo lakon estadu nia sasan, tenke ba hatan tuir lei.

Prezidenti CDN-CNRT, Dionisio Babo dhn AMP prontu ona atu forma VIII Governu Konstitusional. Photo: TTN/Jose Samuel

Nune’e mos ema barak haluhan tia katak CNRT mak harii KAK ne’e, CNRT mak fo tan poderes makas ba orgaun judisial sira atu kaer koruptores sira, iha tempu CNRT  nian mak loke barak liu edifisiu traballu husi Ministeriu Publiku nian, iha tempo CNRT ukun maka ita tá kria Unidade Inteligência Financeira iha Banco Central hodi monitora transação bancária. Ema sira ne’ebe mos haluhan tia katak iha tempu CNRT nian mak ita aprova lei hirak kodiku prosesu penal ho sira seluk ne’ebe mak to’o ikus mai ema konsege investiga, no ajuda ita nia autores judisial sira uza hodi atinge ka kaer ema sira ne’ebe mak konsidera prejudika estadu.

Ema sira ba hatan iha KAK no balun tama ona komarka ne’e, laos ema CNRT deit, maibe ema hirak ne’e husi partidu seluk. Agora deit rebo-rebo iha media social ema barak hosi partido FRETILIN no PD no Deputadus balun mos husi partidu sira ne’ebe ba hatan iha tribunal.

Maski nune’e, CNRT nunka hakarak hatun ema seluk hodi prezudika ema seluk nia dignidade no sira nia partidu. Maibe partidu ho sira nia militantes hirak ne’ebe gosta insulta ne’e tanba nunka hanorin no eduka nia militante mak naran halo kampana ne’ebe foer no bosok. Maibe CNRT konsidera nafatin katak nudar partidu, CNRT kontinua halo servisu hodi alkansa servisu ba estadu no povu Timor tomak.

CNRT orgullu tanba durante CNRT nia tempu mak halo lei hirak ne’e, hamutuk no instrumentu legais sira ne’e, para atu bele kombate korupsaun iha ita nia rain.

TTN: CNRT iha esperansa bele fila hikas ba partidu mais votadu iha EA?

DBS: Hau fiar teb-tebes katak, CNRT sei sai fali hanesan partidu ida ne’ebe mais votadu iha eleisaun agora. Tanba, CNRT hatudu durante tinan 10, mesmu ho koligasaun ne’ebe bo’ot, maibe CNRT servisu diak hodi akomoda ema hotu nia diak no  laos hanesan partidu balun mai kaer governu fulan 6 deit monu ona ne’e lalos, kapasidade laiha atu halo negosiasaun hodi labele hari governo. Karik Lao hamutuk ho PLP ho KHUNTO, maka sei forte liu tan.

Prezidenti CNRT, Xanana Gusmao wainhira halo kampana eleitoral iha Jullu 2017 iha Kampung Baru, Dili. Photo: TTN/Hortencio Sanches

Hau fiar povo sei lá hili polítiku ho governo ne’ebe moris ba fulan 6 deit, lá konsege aprova programa, lá konsege aprova ossan veteranos no inan faluk sira nian ossan, ida ne’ebe  mak povu bele fo fiar tan ba sira.

Tanba ne’ebe diak liu povo tomak mai ho Maun Xanana Gusmao ho Taur Matan Ruak ho José Naimori atu ita aprova programa no orsamentu no harii governo ne’ebe dura tinan 5, no hadia povo nia moris.

TTN: FDN ne’ebe kompostu hosi partidu 9 deklara ona sei apoiu AMP, karik iha kontratu politik ne’ebe halo ona?

DBS: Partidu seluk ne’ebe hakarak apoia AMP ne’e sempre dalan nakaloke. AMP laos atu halo kontratu politiku ho sira, maibe tanba sira nia plataforma politiku korresponde diak los ho AMP nian. So AMP mak bele garante governu ida ne’ebe mos,

Dura tarde tinan 5 no halo dezenvolvimentu ida ne’ebe diak iha governasaun ne’ebe forte no bele servisu ho ema hotu. Sira seluk ibun bo’ot, maibe fulan 6 deit monu tanba kapasidade laiha atu negosia no kaer ukun.

TTN: Governu oinsa mak CNRT sei lidera iha AMP, wainhira fila ukun iha governu foun?

DBS: Kona ba governasaun bainhira CNRT manan iha eleisaun ida ne’e, ami sei deskute kuando hamutuk iha AMP, bainhira mosu duni koligasaun ami sei hare’e atu nune’e atu forma governu saida.

TTN: Xanana sei tuun iha kampana lae?

DBS: Iha eleisaun antesipada maun bo’ot Kay Rala Xanana Gusmao hanesan prezidente Partido CNRT nian, nune nia sei partisipa iha kampana no eleitoral.

Prezidente partidu CNRT Kay Rala Xanana Gusmao koalia hela ho militante CNRT iha kampaina ba dala ikus iha Tasi-Tolu Dili, Photo: media /CNRT.

CNRT agora daudaun tun ba iha baze hamutuk ho PLP no KHUNTO, Maun Bo’ot Xanana no nia alin Taur Matan Ruak no Naimori. Maun bo’ot nain rua hanesan lideransa ida ne’ebe lori Timor – Leste ba to hetan libertasaun, hamutuk ho asswain seluk hasai Timor husi kolonializmu nia liman. Agora daudaun ita nia Maun Bo’ot Xanana lidera fila fali ita nia negosiasaun fronteira maritima nian hodi nune’e bele hetan fila fali iha nia soberania Marítima no dada kadoras mai ita nian rai. Tuir plano Maun Xanana ho Ita nia ekipa ba delimitasaun Fronteira sei hasoru malu ho Austrália. Hanesan povo tomak hatene, líder politik bakun uluk ba entrega tiha Fronteira Marítima  ba Australia atu kaer durante tinan 50 mak foin bele diskuti, maibe agora Maun Bo’ot Xanana konsege ba hadau fali ona. Tanba ne’ebe maka ita tenki apoia Maun Xanana ho nia alin Taur Matan Ruak.

TTN: Mensajem CNRT ba povu relasiona ho Eleisaun Antesipada?

DBS: Fiar Maun Bo’ot Xanana, fiar maun Taur hanesan uluk ne’ebe sira lori ita mai ukun rasik an. konfiansa mos ho Maun Naimori no vota ba AMP. Hau garante AMP dezenvolve ona durante Tinan 10 hamutuk ho CNRT. Karik Lao hamutuk iha eleisaun antecipada hamutuk ho AMP, maun sira ne’ebe sei lori ita ba dezenvolvimentu no estabilidade governativa ida ne’ebe duru no forte atu labele monu bebeik ba hanesan foin dadauk ne’e.

Editór: Evangelisto SANTOS I COPYRIGHT © THETIMORNEWS © 2018

LEAVE A REPLY

Please enter your comment!
Please enter your name here