Home nasional FDN Garante AMP Manan Maioria

FDN Garante AMP Manan Maioria

777
0
SHARE
Konselleru Superio Partidu KHUNTO, Jose Naimori reprezenta AMP hodi enkontru ho FDN ne'ebe sei apoiu votos ba AMP iha Eleisaun Antesipada. Photo: Facebook

By: Hortencio SANCHES

THETIMOR-NEWS.com, DILI – Partidu ne’ebe lahetan asentu iha Parlamentu Nasional ne’ebe dadauk ne’e halibur an iha Forum Demokratiku Nasional (FDN) garante katak Bloku Aliansi Maioria Parlamentar (AMP) sei manan maioria iha Eleisaun Antesipada. “Ami partidu 9 ne’ebe hamahan an iha FDN hakarak fo apoiu tomak ba iha Maun Bo’ot Kay Rala Xanana Gusmao, Taur Matan Ruak no Naimori, agora daudaun ami hamutuk partidu 12 hamutuk ona ne’ebe ami la koalia loko an iha ne’e, ami prontu no hamutuk ba oin hodi halo kampana hamutuk,” dehan Hermenegildo Kupa Lopes, Porta Voz FDN ba Jornalista sira hafoin remata sorumutu ho reprezentante AMP, Jose Naimori, iha sede APMT Kampung Alor Dili, Segunda (29/01/2018).

Nia esklarese, razaun fundamental ne’ebe FDN deklara hamutuk ho AMP tanba, AMP sira nia pozisaun durante iha PN defende makas konstituisaun.

“AMP iha ema istoriku importante iha laran hanesan Xanana Gusmao no Taur Matan Ruak. Tanba ne’e, ami fiar katak ba eleisaun antesipada sei manan maioria ho kadeira 40 resin,” deklara Kupa.

Iha fatin hanesan Konselleru Superior KHUNTO Jose Naimori afirma, oras ne’e daudaun partidu 12 iha ona pozisaun ne’ebe firme atu lao hamutuk hasoru eleisaun antesipada.

Nia haktuir, oras ne’e daudaun, sira nia parte iha unidade ida ne’ebe metin atu kopera malu hodi lao hamutuk.

“Agora partidu hamutuk 12 maibe laos partidu 12 ona, sai los partidu ida deit, hamrik iha AMP hodi tuir eleisaun agora,” dehan Naimori.

Partidu 9 iha FDN  mak hanesan, Bloku Unidade Popular (BUP-ne’ebe kompsotu hosi PMD, PDRT, no PLPA) PST, PSD, MLPM, PDC, APMT, no PDP.

Iha Eleisaun Parlamentar 2017, FRETILIN sai vensedor ho 29.7% ou 168.480 votos no hetan kadeira 23, tuir kedan CNRT (167.345 / 29.5% / 22 kadeira), PLP (60,098 / 10.6% / 8 kadeira), PD (55,608 / 9.8% / 7 kadeira), no KHUNTO (36,547 / 6.4% / 5 kadeira). Partidu 5 ne’e mak hetan kadeira iha PN.

Iha nia formasaun governu, maski sai partidu mais votadu no deretu liu ba forma governu, maibe FRETILIN la kosege estabiliza nia governu ne’ebe lidera hosi Primeiru Ministru Mari Alkatiri tamba hetan deit kadeira 30 iha nia koligasaun forma governu ho PD hodi halo sira nia programa governu la hetan apaoiu hosi PN ne’ebe domina hosi AMP ho kadeira 35.

Ikus, Prezidenti Republika (PR) Francisco Guterres “Lu-Olo” iha 26 Janeiru 2018 desidi uza nia knar tuir Konstituisaun RDTL Artigu 86 alinea F, Dissolve PN no husu ba povu atu vota fila fali iha eleisaun antesipada.

REZULTADU ELEISAUN PARLAMENTAR 22 JULLU 2017

  1. FRETILIN      168.480      29.7 %
  2. CNRT           167.345       29.5 %
  3. PLP                60,098      10.6 % (FOUN)
  4. PD                 55,608        9.8 %
  5. KHUNTO         36,547        6.4 %
  6. PUDD             15,887        2.8 % (FOUN)
  7. UDT               11,255        2.0 %
  8. FM                   8,849        1.6 %
  9. PEP                  6,775        1.2 % (FOUN)
  10. APMT              5,461        1.0 %
  11. BUP                4,999        0.9 % (PMD-PDRT-PLPA)
  12. PST                4,891        0.9 %
  13. PSD                4,688        0.8 %
  14. PR                  3,951        0.7 %
  15. PDN                3,846       0.7 %
  16. C-ASDT           2,330       0.4 % (FOUN)
  17. PDP                2,079        0.4 %
  18. PDC                1,764       0.3 %
  19. MLPM              1,332       0.2 % (FOUN)
  20. UNDERTIM       1,216       0.2 %
  21. PTD                    669       0.1 %

TOTAL VOTANTES     : 760,907

VOTA                       : 583,956 (76.74 %)

LA VOTA                  : 176.951 (23.26 %)

VOTOS VALIDU        : 568.070 (97.28%)

INVALIDU                : 15,886

Editór: Evangelisto SANTOS I COPYRIGHT THETIMORNEWS © 2018

 

LEAVE A REPLY

Please enter your comment!
Please enter your name here