Home edukasaun Drh. Antonino: Asu Laos Hahan

Drh. Antonino: Asu Laos Hahan

208
0
SHARE
Illustrasaun thetimornews

By: Hortencio SANCHES

THETIMOR-NEWS.com, DILI – Hare’e ba kultura Timor-Leste, hakiak animal nudar tradisaun beiala sira hodi sai parseiru no belun ema nian ba atividade vida lor-loron, nune’e mos hakiak asu, konsidera nudar animal sagradu, laos atu sai hahan.

Drh. Antonino do Karmo

Doutor Veterenaria, Antonino do Karmo esplika, hare’e hosi aspeitu oin-oin, inklui saude, iha Timor-Leste nan asu bele fo impaktu ba saude ema nian, wainhira konsumu nia nan hanesan hahan.

“Asu laos nan diak ba saude, tanba hau iha razaun tolu, ida mak kultura Timor nian katak animal ida ne’ebe beiala sira hakiak hanesan animal ida ne’ebe sagradu, segundu mak etika, tanba sa mak hau dehan etika, tanba se asu ida ita hakiak nia loial tebes ba ita hanesan nasaun barak iha mundu ne’e, balun hakiak hanesan sira nia familia rasik no oan hadomi nia, balun toba kama hamutuk tanba ita hakiak nia diak pois han  ne’e, etika ladun diak, terseiru mak saude tanba iha mundu ema dehan 75% moras mai husi animal entaun liu mos husi animal ne’ebe hakbesik liu mai ita,” dehan  Drh. Antonino do Karmo ba THETIMOR-NEWS iha Klinika Dili Vet, Raikotu Dili, Sexta (26/01/2018).

Modelu hakiak asu ne’ebe Timoroan sira hakiak, hare’e hosi parte saude no kriteria hakiak nian dook hosi kriteriu saudavel nian. Tanba ne’e, nia husu ba Timoroan hotu atu labele konsidera asu hanesan nan ne’ebe ne’ebe diak hodi konsumu atu nune’e, asu mos bele sai hanesan animal ida ne’ebe importante atu nune’e bele hadok an husi moras oi-oin.

Karik atu hakiak hodi sai belun, iha kriteria 3 mak importante ba ema nain ne’ebe hakiak ba, “Asu ne’e, ita hakiak ho diak, iha pekuaria tolu mak importante, ida mak hare’e nia hahan no fo han halo didiak, dalabarak Timor ne’e la tein ba animal sira han, ho nune’e animal sira ba buka hahan rasik iha liur ba han, depois nia komesa bokur ona oho ba han, ne’e la diak. Tuir fali mak be’e, be’e ne importante tanba nia mos bele asesu ho diak, ikus mak kontrola ba nia saude, hahalok, saude atu nune’e labele sai prejudika ba ema seluk nia saude”.

Doutor ne’ebe funda Klinika Dili Vet ne’e husu ba governu atu bele halo sosializasaun no kampana hodi fo hanoin ba ema atu labele halo asu sai hanesan nan ba hahan.

Nia mos husu ba governu atu labele tau atensaun deit ba area pekuaria hodi fo nutrisaun no ekonomia ba povu, maibe bele mos tau importansia ba iha area veternaria ida ne’ebe kontribui ba Timor – Leste ida ne’ebe sai husi grupu ida ne’ebe atu kontribui ba edukasaun sivika ba komunidade.

“Ben estar laos mai deit husi ekonomia deit, laos mai deit husi hahan maibe mai mos husi moris haksolok iha ambiente ida ne’ebe diak mak hanesan, bele fasilita animal, plantas no ema ne’e bele moris harmonia iha rai ida ne’e nia leten hodi kontribui ba dezenvolvimente ida agora daudaun lao hela,” dehan doutor veterenaria ne’e.

Editór: Evangelisto SANTOS I COPYRIGHT © THETIMORNEWS 2018

LEAVE A REPLY

Please enter your comment!
Please enter your name here