Home nasional Bloku Koligasaun Iha Intensaun “Disolve” PN

Bloku Koligasaun Iha Intensaun “Disolve” PN

586
0
SHARE
Deputadu IV Lejislatura PN iha plenaria. Photo: TTN/Hortencio Sanches

By: Jose Samuel

THETIMOR-NEWS.com, DILI – Laiha plenaria no atividade komisaun iha Parlamentu Nasional (PN), hanesan aktu ida ho intensaun ne’ebe Aliansi Maioria Parlamentar (AMP) konsidera jogada hosi deputadu Bloku Koligasaun ne’ebe ho intensaun hakarak duni “disolve” PN.

Xefi Bankada PLP, Fidelis Magalhaes. Photo: TTN/Hortencio Sanches

Xefi Bankada Partidu Partido Libertasaun Popular (PLP), Fidelis Magalhaes hateten, atividade PN lolos lao normal, maibe tamba hakarak priense kriteriu hodi disolve PN, entaun Bloku Koligasaun sira dada tempu nune’e Prezidenti Republik, Francisco Guterres Lu-Olo bele foti razaun ne’e (laiha atividade durante fulan 6) hodi disolve PN.

“PN lolos lao normal, maibe bankada koligasaun mak dada loron atu nune’e, 20 no 22 Janeiru sira bele iha opsaun ida hodi PR Lu-Olo atu dehan katak, agora bele ona disolve Parlamentu,” dehan Fidelis ba jornalista iha sala Bankada CNRT, Kinta (25/01/2018).

Ho aktu ne’e, Fidelis konsidera, Bloku Koligasaun la respeita ona Konstituisaun RDTL no rejimentu PN nian. “Sira labrani mai iha Parlamentu, komu la mai entaun harohan deit katak prossesu ida ne’e sira sei bele konsege manipula e dada to’o 22 janeiru mak iha interopsaun ida katak parlamentu disolvidu”.

Maibe, Fidelis esplika, Bloku Koligasaun haluha tiha katak, wainhira PR Lu Olo dissolve PN, signifika governu PM Alkatiri mos monu.

“Primeiru Ministru Mari Alkatiri haluhan tiha, sekuandu parlamentu monu, entaun bankadas ne’ebe mak apoiu governu husi FRETILIN ho PD mos monu. Se Prezidente Republika disolve parlamentu karik mos, parlamentu sei bele halao nia funsaun to’o lezislatura foun no simu tomada de posse e hahu nia mandate,” dehan Fidelis.

Statementu Fidelis ba jornalista ne’e akompana mos hosi Prezidente Bankada CNRT, Deputadu Arão Noe no Prezidente Bankada KHUNTO Luis Roberto.

Tuir ajenda, distinu PN no VII Governu Konstitusional sei anunsia hosi PR Lu Olo iha sexta (26/01/2018) iha tuku 10 dadersan.

Atu hakotu empase politik dadauk ne’e, opsaun iha rua ne’ebe PR Lu Olo sei desidi mak forma governu foun (VIII Governu Konstitusional, red) hodi troka VII Governu ne’ebe lidera hosi PM Mari Alkatiri ou dizolve PN hodi hakat ba Eleisaun Antisipada.

Dadauk ne’e Aliansi Maioria Parlamentar (AMP) kompostu hosi Partidu CNRT, PLP no KHUNTO. AMP mosu nudar forsa politik iha PN ho kadeira 35, lidera kadeira 5 kompara ho Bloku Koligasaun FRETILIN-PD ne’ebe forma governu ho kadeira 30 deit.

Ho Governu minoria ne’e, mak programa governu no orsamentu VII Governu Konstitusional la hetan aprovasaun iha PN.

Editòr: Evangelisto SANTOS I COPYRIGHT © THETIMORNEWS 2018

LEAVE A REPLY

Please enter your comment!
Please enter your name here