Home nasional Distinu Governasaun PM Alkatiri, “Desidi” iha Reuniaun Konsellu-Estadu

Distinu Governasaun PM Alkatiri, “Desidi” iha Reuniaun Konsellu-Estadu

2463
0
SHARE
Palasiu Prezidensial, knar fatin Prezidenti Republika nian ne'ebe ohin (24/01/2018), membru Konsellu Estadu sira reuniaun hodi desidi situasaun politika Timor-Leste, liliu governasaun PM Alkatiri ne'ebe kontinua la hetan apoiu hosi PN. Photo: TTN/Jose Samuel

By: Jose Samuel

THETIMOR-NEWS.com, DILI – Distinu governasaun VII Governu Konstitusional ne’ebe lidera hosi Primeiru Ministru (PM) Mari Alkatiri desidi hela hosi reuniaun membru Konsellu-Estadu ne’ebe sei lao hela.

Membru Konsellu-Estadu sira halo juramentu antes hahu reuniaun. Photo: Media PR.

Membru Konsellu-Estadu ne’ebe partisipa iha reuniaun ne’e mak atuál Xefe-de-Estadu, eis Prezidente-da-Repúblika Taur Matan Ruak, atuál Prezidente Parlamentu Nasionál, atuál Primeiru Ministru no José Marcelino Cabral Belo, Aurora Ximenes, Virgílio da Costa Hornai, Virgílio Smith, José dos Santos “Naimori Bukar” ne’ebé Parlamentu Nasionál mak hili, Oscar Lima, Faustinho Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé nomeia husi atuál Prezidente-da-Repúblika.
Eis Prezidente-da-Repúblika na’in-rua Xanana Gusmão no Ramos Horta auzente iha reuniaun ne’e tanba hala’o atividade estadu nian iha tasi-balun.

Reuniaun membru Konsellu-Estadu ne’e diriji deretamente hosi Prezidenti Republika, Francisco Guterres Lu-Olo no taka ba media sira.

Maski taka ba media, ajenda ne’ebe koalia iha reuniaun ne’e hodi desidi futuru governasaun ne’ebe to’o ohin governu PM Alkatiri sedauk hetan aprovasaun ba nia programa governu nian no orsamentu jeral estadu.

Antes reuniaun Konsellu-Estadu PR Lu Olo fo posse ba membru Konsellu-Estadu sira ho seremonia juramentu. Hafoin juramentu, membru Konsellu-Estadu ne’e kontinua ho halo reuniaun.

Hare’e ba situasaun politika ne’ebe kontinua sai problema ba partidu politiku sira iha asuntu “ukun” nian, maka PR Lu-Olo tenki rezolve tuir dalan Konstituisaun RDTL mak bolu membru Konsellu-Estadu sira tuir Artigu 90 no 91.

Iha Konstituisaun RDTL Artigu 90 no 91 esplika ona kona ba Konsellu-Estadu nia Funsaun no Kompetensia hanesan hakerek klaru ona.

Artigu 90, Konsellu-Estadu

  1. Konsellu-Estadu mak órgaun konsulta polítiku Prezidente-        Repúblika, ne’ebé nia rasik prezide.
  2. Halo parte Konsellu-Estadu mak: a) Ex-Prezidente-Repúblika sira-ne’ebé la’ós destituídu; b) Prezidente Parlamentu Nasionál nian; c) Primeiru-Ministru; d) Sidadaun lima ne’ebé Parlamentu Nasionál hili ho harmonia tuir prinsípiu reprezentasaun proporsionál, ba períodu tuir durasaun lejizlatura nian, ne’ebé la’ós membru hosi órgaun soberania nian; e) Sidadaun lima ne’ebé Prezidente-Repúblika mak foti, ne’ebé la’ós membru hosi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian.

Artigu 91, Kompeténsia, organizasaun no funsionamentu Konsellu-Estadu nian

  1. Konsellu-Estadu maka bele: a) Fó-sai kona-ba disolusaun Parlamentu Nasionál; b) Fó-sai kona-ba demisaun Governu nian; c) Fó-sai kona-ba deklarasaun funu no oinsá atu hala’o dame; d) Fó-sai kona-ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika wainhira nia hala’o ninia knaar, no wainhira nia husu karik. e) Halo ninia Rejimentu internu; Reuniaun Konsellu-Estadu nian la’ós públiku.
  2. Lei mak define Konsellu-Estadu nia organizasaun no funsionamentu.

 Partidu FRETILIN ne’ebe sai partidu mais votadu iha Eleisaun Parlamentar 2017 kontinua hamutuk ho Partidu Democratico (PD) hodi forma VII Governu, maibe iha nia politika, governasaun PM Alkatiri ne’e la hetan apoiu hosi partidu 3 seluk hanesan CNRT, PLP ho KHUNTO ne’ebe konsidera governu dadauk ne’e la hetan maioria iha Parlamentu Nasional tamba iha deit kadeita 30.

Iha eleisaun parlamentar 2017, FRETILIN hetan det kadeira 23, CNRT-22, PLP-8, PD-7 no KHUNTO 8.

Antes ne’e, iha Segunda (23/01/2018), PR Lu-Olo bolu ona partidu 5 ne’ebe iha asentu Parlamentu Nasional hodi rona sira nia hanoin kona ba governu atual.

Hosi esplikasaun lider partidu 5 ne’e, FRETILIN hakarak ba eleisaun antisipada, maibe seluk ho CNRT, partidu ne’ebe lidera hosi Kay Rala Xanana Gusmao ne’e hakarak forma governu foun hamutuk ho nia aliadu (PLP ho KHUNTO). Entertantu PD, kontinua hosi lidera parpol sira hanoin hamutuk fali hosi tau liman hamutuk, tamba ukun ne’e, tuir PD, povu nian laos lider partidu politiku sira. Oin seluk ho KHUNTO, partidu ho kadeira 5 iha PN ne’e fo nia apoiu ba CNRT hodi forma governu foun ho nia Primeiru Ministru maka Kay Rala Xanana Gusmao.

Editór: Evangelisto SANTOS I COPYRIGHT © THETIMORNEWS 2018

LEAVE A REPLY

Please enter your comment!
Please enter your name here