Home dezenvolvimentu PM Alkatiri: Polisia Tenki Hatene Konstituisaun RDTL

PM Alkatiri: Polisia Tenki Hatene Konstituisaun RDTL

562
0
SHARE
Membru PNTL, Photo: TTN/Jose Samuel

By: Jose Samuel

THETIMOR-NEWS.com, DILI – Xefi Governu fo hanoin ba membru Polisia Nasional Timor Leste (PNTL) ne’ebe foin hetan graduasaun atu laos hatene deit Lei kona ba sira nia, maibe tenki hatene mos konstituisaun Republika Demokratika Timor-Leste (RDTL).

PM Mari Alkatiri. Photo: TTN/Jose Samuel

Primeiru Ministru (PM) Mari Alkatiri hateten lia hirak ne’e wainhira partisipa graduasaun ajente PNTL nain 178 ne’ebe remata ona sira nia kursu ajente iha Akademia Polisia Comoro, Dili.

PM Alkatiri esplika katak, iha juramentu ajente PNTL nian nain 178 ne’e, dehan katak primatus da lei, ne’e signifika katak tenki hatene lei Konstituisaun RDTL ho didiak no lei hotu iha Timor-Leste.

“Bainhira atu defende lei tenke defende mos legalidade, laos defende deit ba lei to’o haluha ou taka matan ba legalidade. Saida deit mak lao la legal Polisia tenki denonsia no kombate,” dehan PM Alkatiri, Segunda (22/01/2018).

PM Alkatiri fo paraben ba ajente ne’ebe simu graduasaun. Photo: TTN/Jose Samuel

Nia hatutan, “Funsaun polisia nian mos iha komponente vokasaun, vosaun para bele iha sentidu de sakrefisiu, bainhira nasaun ijiji sakrefisiu ita tenki prontu atu halo sakrefisiu, uluk ita dehan falintil sira atu liberta rai ida ne’e halo ba sakrefisiu bo’ot tebes tamba, atu servi no manan independensia hodi hari estadu ida ne’e”.

Xefi governu ne’e mos apela ba ajente foun hirak ne’e atu hatudu hahalok diak ba povu wainhira servi povu.

“Hetan formasaun sai polisia laos deit hetan servisu hanesan bain-bain, maibe servisu hanesan policia signifika katak atu servi ba povu, atu povu bele tur hakmatek no bele hatene katak iha instituisaun ida mak tau matan ba sira, labele sai fali instituisaun ida ke ameasa ba povu,” dehan PM Alkatiri.

Komandante Jeral PNTL, Julio Hornai. Photo: TTN/Jose Samuel

Nune’e mos Komandante Jeral PNTL, Komisariu Julio Hornai deklara kedan atu membru polisia hotu, liliu ajente sira atu labele problema privadu antes sai polisia hodi lori fali instituisaun sai fatin ba halo problema.

“Dala barak imi halo problema iha komunidde nia lae’et maibe iha tempu ne’eba imi seidauk sai polisia e ikus mai tama tiha polisia komesa ona buka tuir atu baku. Tamba ne’e husu ba imi atu banati tuir juramentu ne’ebe imi halo ba Bandeira Nasional iha publiku, iha tebes Governu no komunidade nia oin. Hau hein katak imi nain 178 ne’e hau sei la rona tan liafuan problema tan deit ho vigansa, tantu imi ho kolega, komunidde no joventude iha teritori laran tomak,” Apela Komisariu Julio Hornai

Nia hateten, sai Polisia signifika katak prontu ona atu servi ba povu timor-leste, sai servidor ne’ebe diak no servidor ne’ebe neutru e parsialidade, justu iha servisu laran.

“Tenki iha domin no perdaun hodi hanoin katak iha responsabilidade atu defende naran diak Policia Nasional Timor-Leste nian,” dehan Komisariu Julio Hornai.

Editór: Evangelisto SANTOS I COPYRIGHT © THETIMORNEWS 2018

LEAVE A REPLY

Please enter your comment!
Please enter your name here