Home nasional Polisia Tranzitu Evakua Ona Bus Estrela

Polisia Tranzitu Evakua Ona Bus Estrela

245
0
SHARE
Polisia Tranzitu Dili hamutuk ho ekipa Bombeiros Dili konsege evakua Bus Estrela ne'ebe baku fila iha area estrada kurva Cacaolidun. Photo: TTN/Evangelisto SANTOS

By: Evangelisto SANTOS

THETIMOR-NEWS.com, DILI – Bus Estrela ne’ebe baku fila iha Cacaolidun, Bairo Pite – Dili evakua ona hosi Polisia Tranzitu Munisipal Dili iha tuku 4.45 OTL ou oras rua ho balun hafoin akontesementu.

Ekipa Bombeiros Dili halo prepara hela hodi evakua Bus Estrela ne’ebe baku fila iha area estrada kurva Cacaolidun. Photo: TTN/Evangelisto SANTOS

Prosesu evakuasaun bus Estrela ne’e hetan apoiu hosi ekipa Bombeiro Dili. Hafoin dada los isin bus nian ne’ebe baku fila, Polisia Tranzitu Dili lori kedan bus refere ba kuartel Polisia Munisipiu Dili iha Caicoli Dili.

Hafoin halo evakuasaun ba bus refere, ekipa Bombeiros Dili kontinua hamos dalan ne’ebe nakonu ho vidru rahun no oli kareta ne’ebe fakar, inklui ran hosi pasanjeiru ne’ebe mate fatin tamba hetan hanehan.

Maski Komunidade Cacaolidun konsege hasai pasanjeiru mane 1 ne’ebe bus hanesan iha parte kotuk kuanan nian, pasanjeiru ne’e identifika ona mate fatin iha fatin bus baku fila. Photo: TTN / Evangelisto SANTOS

Iha Segunda (06/01/2017), maizemenus tuku 02.30 OTL, Bus Estrela ne’ebe halai ho diresaun Dili – Viqueque hetan assidenti trafegu iha estrada kurva Cacaolidun, Aldeia Fuslam, Suku Bairo Pite, Postu Administrativu Dom Aleixo, Autoridade Munisipal Dili. Hosi assidente ne’e, pasanjeiru mane ida identifika mate fatin, no seluk hetan kanek todan no Kaman.

Kondisaun Bus Estrela hafoin evakua hosi baku fila iha area estrada kurva Cacaolidun. Photo: TTN; Evangelisto SANTOS

Hosi informasaun ne’ebe kolekta iha fatin akontesementu, bus Estrela ho numeru xapa matrikula 36.727 ne’e foin halai buka pasanjeiru no kuaze pasanjeiru menus 10 mak iha laran.

Kondutor ne’ebe lori bus refere konsege halai lakon hosi fatin akontesementu no prosesu evakuasaun pasanjeiru sira ne’ebe iha bus laran mos hetan apoiu hosi komunidade sira ne’ebe hela besik fatin akontesementu.

“Hau rona lian tarutu makas iha uma oin, hafoin sai hau hare bus ne’e baku fila ona no pasanjeiru balun tanis no hakilar husu ajuda,” dehan Domingos ba thetimor-news.com.

Komunidade balun konsege hasai pasanjeiru ida ne’ebe mate fatin tuur iha parte kotuk kuanan bus nian ne’ebe hanehan nia no hasai ran barak ona no hetan evakua ona hosi ambulancia ne’ebe to’o tarde iha fatin akontesementu.

“Bus ne’e hau rona halai makas, la kleur baku fila kedan,” dehan komunidade ida ne’ebe lakohi temi naran.

Polisia tranzitu mos halo markasaun ona hodi sukat dalan iha fatin akontesementu hodi halo ezame nune’e bele hatene tamba saida asssidenti ne’e akontese.

Sedauk hatene lolos pasanjeiru nain hira mak iha laran, maibe iha fatin akontese hare’e avo feto ida ne’ebe tuur bilan hafoin sai hosi bus laran, no tiu ida ne’ebe tanis hakilar, no feto inan ida ne’ebe sai ho nia oan idade maizemenu tinan ida ho balun.

Labarik bebe ne’e hetan kanek iha parte ulun no konsege lori kedan ho nia familia ne’ebe too kedan fatin akontesementu.

Kondisaun bus refere vidru parte oin rahun no parte sorin kuanan. Bus refere ne’e mos tula besi no kalen naruk ne’ebe tula iha parte leten bus nian.

Editóra: Agida DOS SANTOS I COPYRIGHT © THETIMOR-NEWS 2018

LEAVE A REPLY

Please enter your comment!
Please enter your name here