Home nasional Bus Estrela Baku Fila, 1 Mate

Bus Estrela Baku Fila, 1 Mate

1654
0
SHARE
Maski Komunidade Cacaolidun konsege hasai pasanjeiru mane 1 ne'ebe bus hanehan nia iha parte kotuk kuanan nian, pasanjeiru ne'e identifika ona mate fatin iha fatin bus baku fila. Photo: TTN / Evangelisto SANTOS

By: Evangelisto SANTOS

THETIMOR-NEWS.com, DILI – Pasanjeiru mane ida (1) mate, seluk kanek todan no Kaman iha bus baku fila ne’ebe akontese iha dalan kurva Cacaolidun Aldeia Fuslam, Suku Bairo Pite, Postu Administrativu Dom Aleixo, Autoridade Munisipal Dili.

Bus ne’ebe hetan assidente trafegu ne’e ho naran Estrela bus ho diresaun Dili-Viqueque no numeru matrikula 36.727 TL.

Pasanjeiru mane 1 ne’ebe identifika mate fatin hetan evakua hosi ekipa ambulancia. Photo: TTN / Evangelisto SANTOS

Akontese iha maizemenus tuku 02.30 madrugada, Sabadu (06/01/2018), no evakuasaun ba pasanjeiru sira hetan kedan apoiu hosi komunidade ne’ebe hela besik iha fatin akontesementu ne’e. Bus refere halai mai hosi diresaun Surik Mas hodi tun ba Bairo Pite, maibe iha kurva Cacaolidun bus ne’e baku fila tamba halao ho velosidade as.

Tuir informasaun kondutor ba bus refere halai kedan hodi husik bus ne’ebe baku fila ona.

“Hau rona lian tarutu makas iha uma oin, hafoin sai hau hare bus ne’e baku fila ona no pasanjeiru balun tanis no hakilar husu ajuda,” dehan Domingos ba thetimor-news.com.

Komunidade balun konsege hasai pasanjeiru ida ne’ebe mate fatin tuur iha parte kotuk kuanan bus nian ne’ebe hanehan nia no hasai ran barak ona no hetan evakua ona hosi ambulancia ne’ebe to’o tarde iha fatin akontesementu.

Polisia tranzitu mos halo markasaun ona hodi sukat dalan iha fatin akontesementu hodi halo ezame nune’e bele hatene tamba saida asssidenti ne’e akontese.

Kondisaun Bus Estrala ne’ebe baku fila iha area Cacaolidun, Dili. Photo: TTN/Evangelisto SANTOS

Sedauk hatene lolos pasanjeiru nain hira mak iha laran, maibe iha fatin akontese hare’e avo feto ida ne’ebe tuur bilan hafoin sai hosi bus laran, no tiu ida ne’ebe tanis hakilar, no feto inan ida ne’ebe sai ho nia oan idade maizemenu tinan ida ho balun.

Labarik bebe ne’e hetan kanek iha parte ulun no konsege lori kedan ho nia familia ne’ebe too kedan fatin akontesementu.

Kondisaun bus refere vidru parte oin rahun no parte sorin kuanan. Bus refere ne’e mos tula besi no kalen naruk ne’ebe tula iha parte leten bus nian.

Editóra: Agida DOS SANTOS I COPYRIGHT © THETIMOR-NEWS 2018

LEAVE A REPLY

Please enter your comment!
Please enter your name here