Home nasional Avansa ba EA, Alkatiri Garante FRETILIN-PD Hetan Kadeira 40

Avansa ba EA, Alkatiri Garante FRETILIN-PD Hetan Kadeira 40

5574
0
SHARE
PM Alkatiri hamutuk ho nia membru governu sira. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Sekretariu Jeral Partidu FRETILIN Mari Alkatiri garante bainhira mosu Eleisaun Antesipada (EA) Partidu FRETILIN no PD sei manan maioria ho kadeira 40.

“Hau garante katak ita sei manan maioria nafatin, entra FRETILIN no PD hau target, FRETILIN sei hetan kadeira 30 PD bele hetan 10 ou liu tan husi ne’e, kuandu nune’e duni ita avontade sei hatudu ba sira,” dehan Alkatiri ba Juventude FRETILIN-PD iha konsolidasaun ne’ebe halo iha salaun Delta Nova Komoro Dili, Sabadu (16/12/2017).

Tanba ne’e nia dehan, partidu rua ne’e tenke sai primeiru lugar labele sai terseiru lugar iha EA kuandu mosu duni, nune’e dialogu halo nafatin ho partidu se deit mak hetan asentu iha Parlamentu Nasional.

Nune’e nia husu ba estrutura FRETILIN no PD tenke hakbesik an makas ba partidu hirak ne’ebe iha eleisaun foin lalais ne’e la hetan asentu Parlamentar atu bele hamutuk ho partidu rua ne’e bele lao ba oin.

Iha fatin hanesan Sekretariu Jeral PD, Antonio da Conceição “Kalohan” hatete, PD hola dezisaun atu hamutuk ho FRETILIN laos hanoin ne’ebe mak simplis, maibe hamutuk hanesan jerasaun kontinuador husi FRETILIN nia istoria.

“Ami mai tabik (hamutuk) hodi halo koligasaun ho FRETILIN atu kaer ukun ne’e, laos tanba hakarak poder, maibe ami mai ne’e hanesan jerasaun foun kontinuador husi FRETILIN nia istoria, tanba ne’e ami mai hamutuk ho FRETILIN hanesan oan mai tama hakuak fila fali nia aman,” dehan Kalohan.

Iha Eleisaun Parlamentar 2017, Partidu FRETILIN sai vensedor no hetan kadeira 23, tuir kedan Partidu CNRT ho kadeira 22, PLP (8), PD (7) no KHUNTO (5).

Antes ne’e iha III Lejislatura Partidu FRETILIN iha kadeira 25 iha Parlamentu Nasional.

Editór: Evangelisto SANTOS I COPYRIGHT © THETIMOR-NEWS 2017

LEAVE A REPLY

Please enter your comment!
Please enter your name here