Home nasional Governu Muda 7 Dezembru Hanesan Loron Memoria

Governu Muda 7 Dezembru Hanesan Loron Memoria

93
0
SHARE
Ministro Estadu no ministro Saude. Rui Maria de Araujo. Photo: TTN: Fidelio Ramos

By: Hortencio SANCHES

THETIMOR-NEWS.com, DILI – 7 Dezembru hanesan loron ida ne’ebe militar Indonezia sira halo okupasaun iha teritoria Timor – Leste ho illegal mente maski, Timor – Leste proklama ona independensia husi Kolonial Portuguesa hodi hamrik hanesan nasaun soberania ida iha 28 Novembru 1975. Tanba ne’e governu konsidera loron ne’e hanesan loron memoria ida atu nune’e Timoroan hotu bele halo reflesaun.

Ministru Estadu no Ministro Saude Rui Maria de Araujo ne’ebe reprezenta Primeiru Ministru hodi partisipa iha komemorasaun loron importante ne’e hatete, hanesan tinan hirak liu ba loron 7 Dezembru estadu muda uitoan nia karakter ba loron memoria atu nune’e ema hotu bele hanoin no eventu importante ida ne’ebe marka istoria Timor – Leste nian.

“Loron ida ne’e  baibain selebra hanesan erois maibe loron erois ita muda tia ba iha 31 Dezembru atu koinesidu ho loron ne’ebe Saudozu Prezidente Nicolau Lobato mate iha konbate, loron memoria pontu de vista governu nian atu Timoroan hotu presiza utiliza hanesan oportunidade atu hanoin hikas fali sakrifisiu ne’ebe mak Timoroan hotu halo,” dehan Ministro Rui Iha nia diskursu bainhira partisipa komemorasaun loron memoria ne’e iha Portu Dili, Kinta (07/12/2017).

Mate Restu, membru Governu no membru PN sira kari hela ai-funan hodi hanoin hikas matebian sira ne’ebe mate iha 7 Dezembru 1975, iha portu Dili. Photo: TTN/Hortencio Sanches

Iha fatin hanesan Prezidente Sentru Nasional Chega Ines Xavier hanesan mos materestu 1975 afirma, triste tebes bainhira hateke ba Portu Dili nia laran tamba fatin ne’e ema Timoroan barak mak soe sira nia vida iha fatin ne’e, inklui  kaben husi Saudozu Nicolau Lobatu, nune’e nia husu ba Timoroan hotu tenke halo reflesaun hodi hanoin ba loron ne’e.

“Ita hotu tenke hanoin no halo reflesaun tanba sa mak loron ne’e akontese, tinan 40 ita liu ona, ita  ukun an tinan 15 liu tiha ona karik ema barak mak seidauk hatene tanba sa mak loron ne’e ezisti,” dehan Ines.

Entretantu nia husu ba Deputadu, veteranus no ema hotu-hotu nunka mais atu bele haluha loron ne’e, tanba ema barak mak lakon sira nia vida ihaloron refere.

Nia hatutan, triste tebes bainhira loron ne’e, ema barak mak ladun komemora hanesan  loron istoriku sira seluk.

Hafoin remata serimonia ne’e, materestu, membru governu no membru Parlamentu hirak ne’ebe partisipa iha komemorasaun ne’e, kari ai-funan ba tasi laran portu Dili nian, hodi hanoin hikas matebian hirak ne’ebe mak durante ne’e mae iha ne’eba.

Editóra: Agida DOS SANTOS  COPYRIGHT © THETIMOR-NEWS 2017

LEAVE A REPLY

Please enter your comment!
Please enter your name here