Home edukasaun PM Alkatiri Husu Jerasaun Foun Lao Tuir Dalan Jerasaun Tuan

PM Alkatiri Husu Jerasaun Foun Lao Tuir Dalan Jerasaun Tuan

693
0
SHARE
Primeiru Ministru Mari Alkatiri. Photo: TTN/Hortencio Sanches

By: Hortencio SANCHES

THETIMOR-NEWS.com, SUAI, Primeiru Ministru (PM) Mari Alkatiri husu ba jerasaun foun Timor – Leste tomak atu banati tuir dalan ne’ebe mak jerasaun tuan sira husik hela.

“Loron ida ohin ne’e loron ida ne’ebe mak importante ba povu Timor tomak, ne’e duni hau husu ba jerasaun foun sira tenke banati tuir dalan ne’ebe mak ami jerasaun tuan sira halao iha tempu ne’eba maske ho rekursu ne’ebe mak uitoan no ho estudu ne’ebe mak uitoan lori duni nasaun ne’e ba ukun rasik an,” dehan PM Alkatiri ba Jornalista sira hafoin remata serimonia komemorasaun 28 Novembru ba dala 42 iha Suai, Munisipiu Covalima, Tersa (28/112017).

Xefi governu ne’e haktuir, bainhira sira hahu atu proklama nasaun ne’e ba oin iha prinsipiu ne’ebe metin hakarak Timor – Leste hamrik mesak ho nia soberania hanesan nasaun.

Hafoin proklamasaun 28 Novembru 1975 husi Prezidente Francisco Xavier do Amaral liu deit loron 9, Timor – Leste hetan kedas invasaun militar husi nasaun vizinu Indonezia hodi hapara Timor – Leste nia independensia.

Iha momentu ne’eba Timoroan tomak halo funu hasoru invazor Indonezia ho luta ne’ebe mak naruk ne’ebe lidera fali husi Kay Rala Xanana Gusmao to lori duni Timor – Leste ba independensia, ne’ebe proklama iha 20 Maiu 2002.

Antes Timor – Leste hetan independensia povu barak mak mate durante tinan 24 nia laran ne’ebe ho prinsipiu ida ne’ebe metin mate ka moris ukun rasik an.

Nune’e mos iha fatin hanesan, Francisco Dionisio Fernandes alias Maucura,

Francisco Dionisio Fernandes “Maucura”. Photo: TTN/Hortencio Sanches

Nudar sobrevivente 12 Novembru hatete, Proklamasaun Independensia Unilateral ne’ebe mak lider jerasaun tuan sira halo iha 1975 hanesan baze fundamental ba independensia Timor – Leste.

“28 Novembru loron ida ne’ebe mak prinsipal, ita agradese ba fundador sira liu-liu saudozu Nicolau Lobato Francisco Xavier no seluk tan tanba sira nia proklamasaun ne’ebe durante ne’e sira halo mak sai hanesan baze fundamental ida to ohin loron ita hetan ita nia independensia,” dehan Maucura ba THETIMOR-NEWS.com.

Tanba ne’e nia haktuir, luta ba libertasaun Timor – Leste laos fasil, lori tempu ne’ebe naruk tebes, ne’e duni nia husu ba lider jerasaun foun hotu atu luta nafatin hodi hadia dezenvolvimentu ba nasaun Timor – Leste.

“Luta ba libertasaun hotu ona, maibe agora tempu fali ba jerasaun foun atu luta ba dezenvolvimentu, atu lori nasaun ne’e ba oin,” dehan Maucura.

Editóra: Agida DOS SANTOS I COPYRIGHT © THETIMORNEWS 2017

LEAVE A REPLY

Please enter your comment!
Please enter your name here