Home dezenvolvimentu Nakroma II Sei Halo Operasaun iha Kosta Sul

Nakroma II Sei Halo Operasaun iha Kosta Sul

42
0
SHARE
Ro Nakroma ne'ebe durante sai transporte publiku iha area maritima nian ne'ebe halo viagem ba Dili-Atauro-Oecusse. Photo: TTN/Evangelisto Santos

By: Hortencio SANCHES

THETIMOR-NEWS.com, DILI – Atu dezemvolve ekonomia iha parte sul nian no fasilita transporte publiku iha area maritima nian, governu sei aloka ro Nakroma II hodi halo operasaun iha area kosta sul.

Primeiru Ministru Mari Alkatiri promote, iha tempu besik Ró Nakroma II sei to’o iha Timor – Leste hodi halo operasaun ba iha tasi kosta Sul nune’e bele loke luan tan ekonomia ba dezenvolvimentu iha nasaun.

“Uluk Nakroma I ne’e ita labele halo operasaun ba iha tasi kosta sul maibe, mai tan Nakroma II ita bele halo operasaun ba kosta sul ona, mai tan Ró haksolok ne’e ita bele halo ona turismu internu, tanba Turista sira mai husi nasaun seluk to mai iha Dili bele sae Nakroma, bele sae mos Haksolok bele ba to Com, Baucao no Oecuse,” dehan PM Alkatiri ba Jornalista sira iha Hotel Timor, Sexta (10/11/2017).

Tanba ne’e, nia garante iha futuru dezenvolvimentu husi transporte tasi bele hatama rendimentu ekonomia ida ne’ebe diak ba estadu liu husi osan ne’ebe turista sira ne’ebe vizita.

Hare’e ba Rekursu Umanu ne’ebe mak sei menus, Xefe Governu ne’e esplika, “Rai iha ne’ebe deit presiza liu mak ema sira ne’ebe ho kapasidade professional, entaun ita tenke presiza eskola professional ida atu nune’e ita nia ema  sira hodi aprende”.

Iha fatin hanesan Vise Ministru Obras Publiku no Telekomunikasaun, Inacio Morreira hatete, Timor – Leste nasaun ida ne’ebe teritoriu hadulas ho tasi, nune’e governu iha hanoin luan atu dezenvolve diak liu tan iha futuru.

“Tasi ita nian ne’e luan, entaun ba oin ne’e ita bele halo luan liu tan ita nia ekonomia sai buras liu tan hodi dezenvolve ita nia nasaun ne’e ba oin, entaun ida ne’e hanesan xave ida ba oin Timor – Leste bele hare no planeia hodi komesa dezenvolvimentu hirak ne’e,” dehan Vise Ministru Inacio.

Dadauk ne’e governu rekonese katak operasaun ro iha teritoriu Timor-Leste sedak masimu hodi dudu atividade ekonomia ne’ebe sufsiente.

“Agora ita iha Ró Nakroma ne’ebe mak halo operasaun no privadu seluk tan, maibe ba oin ita bele kria kondisaun ne’ebe diak nune’e bele hare Ró sira ne’ebe bele transporta pasazeiru no sasan sira ba mai husi rai kosta norte ba kosta sul,” dehan Inacio.

Ró Nakroma II ne’ebe mak sei halo operasaun iha Tasi Mane hetan apoiu husi Governu Alemaña ne’ebe uluk mos tau osan ba sosa Nakroma I ne’ebe oras ne’e daudaun halo hela operasaun iha tasi Timor.

Alende ne’e, agora daudaun Joven Timoroan barak mak tuir hela formasaun ne’ebe hanorin husi Governu Alemaña kona ba servisu iha tasi laran hodi halo operasaun ba Ró.

Hare’e ba Timor – Leste sei menus iha parte infrastrutura ba portu, oras ne’e daudaun Governu Timor – Leste hahu halo namanas hela konstrusaun ba Portu Dili no Tibar ba oin fatin selu tan ne’ebe mak Governu sei kria nune’e bele halo Timor – Leste sai nasaun ida ne’e modern ho ekonomia makas.

Editór: Evangelisto SANTOS I COPYRIGHT © THETIMORNEWS 2017   

LEAVE A REPLY

Please enter your comment!
Please enter your name here