Home nasional Xefi Estadu Husu Deputadu Sira Servisu ba Interese Nasional

Xefi Estadu Husu Deputadu Sira Servisu ba Interese Nasional

547
0
SHARE
Deputadusira diskuti malu hela iha plenaria ne'ebe halao iha uma fukun PN Tersa (26/09/2017). Photo TTN/Hortencio Sanches

By: Fidelio RAMOS

THETIMOR-NEWS.com, DILI – Hare’e kompozisaun VII Governu nian hanesan rezultadu hosi kompromisu ida atu dudu ba oin prioridade nasionál sira, xefi estadu husu ba deputadu sira iha Parlamentu Nasional (PN) atu servisu hamutuk no hare’e ba interese nasional

PR Francisco Guterres Lu Olo basa liman hodi apresia ba membru PN foun,wainhira loke sesaun IV Lejislatura PN iha fulan kotuk liu ba. Photo: Media PR

Prezidenti Republika (PR) Francisco Guterres Lu Olo iha nia deskursu dehan, “Iha 2022, Ita tenke entrega ba ita-nia susesór sira, país ida ne’ebé di’ak liu duke ita iha, ohinloron. Ida ne’e ita-nia responsabilidade, ita-nia devér! Ba líder polítiku sira hotu, ba xefe bankada parlamentár hotu-hotu no ba deputadu no deputada sira hotu, ho laran nakloke no fiar metin, mak ha’u husu ba ita servisu hamutuk, ba interese nasionál,” dehan PR Lu Olo, Tersa (03/10/2017), iha Palasiu Prezidensial Aitarak Laran, Bairo Pite, Dili.

Ema numeru ida iha nasaun ne’e esplika, orgaun soberania ida-idak iha ninia responsabilidade rasik, no nia repeita no sei respeita babeibeik.

“Maibé ha’u hatene katak ita bele buka-hetan dalan atu halo diálogu no servisu hamutuk tamba, hanesan ha’u hatete ona, demokrasia ezije rona ita-nia ema, diálogu no kompromisu,” dehan xefi estadu ne’ebe uluk iha Eleisaun Prezidensial hetan apoiu hosi Partidu CNRT ba nia vitoria.

Ho VII Governu, PR Lu Olo husu ba PM Alkatiri ho nia membru Governu hotu-hotu, husu dedikasaun no servisu ho transparénsia, ba sidadaun sira, bainhira implementa prioridades nasionais.

“Ha’u hato’o ha’u-nia dezeju ba maluk sira atu halo servisu produtivu no inovadór, atu ita hetan objetivu nasionál tuir mai ne’e. Objetivu atu hotu-hotu bele hetan kondisaun vida di’ak liu. Atu ita hotu moris iha pás laran, ho seguransa, iha país ida di’ak liután. Tinan lima sei lao lais. Ita labele lakon tempu.
Nune’e, ita hotu, servisu dadaun ba,” dehan PR Lu Olo.

Nivio Magalhaes simu posse nudar Sekretariu Estadu Joventude no Traballu. Photo: Media PR

Tuir PR Lu Olo prioridade ne’ebé urjente liu ne’ebe persiza implementa, prioridade sira ne’ebé ida mak investe osan hosi Orsamentu Estadu atu hasa’e kualidade ba servisus públikus: hadi’a servisus saúde; hadi’a eskolas no kualidade edukasaun, inklui rekoñese, fó prémiu no haforsa empeñu professor sira nian. Ho hahalok sira ne’e, ita valoriza profisionál sira ne’ebé haka’as-an tebes atu eduka ita-nia labarik no joven sira, iha ita-nia país tomak.

Prioridade seluk ida mak hamenus kiak lalais. Se ita hasa’e kualidade servisus Estadu nian, ita-nia luta hasoru kiak sei efisiente liu, ita sei hamosu rezultadu lais liu iha tempu badak ida.

“Prioridade importante seluk tan mak harii empregu ba joven sira, diversifika ekonomia, liuliu turismu, hadi’a infra-estruturas no hala’o governasaun transparente no moos,” dehan PR Lu Olo.

Editór: Evangelisto MEILANA I COPYRIGHT © THETIMORNEWS 2017

LEAVE A REPLY

Please enter your comment!
Please enter your name here