Home nasional Konsidera Formasaun Governu Inkonstitusional, Melio de Jesus Sei Lori PR Lu-Olo ba...

Konsidera Formasaun Governu Inkonstitusional, Melio de Jesus Sei Lori PR Lu-Olo ba TR

13197
0
SHARE
Melio de Jesus. Photo: TTN/Hortencio Sanches

By: Hortencio SANCHES

THETIMOR-NEWS.com, DILI – Hare’e ba artigu 48 Konstituisaun RDTL fo dalan ba sidadaun Timor-Leste hodi halo petisaun no kesar ba orgaun soberanu sira hodi defende lei inan ba interese ema hotu, Melio de Jesus sidadaun Timoroan ida pronto lori Prezidenti Republika (PR), Francisco Guterres Lu-Olo ba Tribunal Rekursu (TR).

PM Mari Alkatiri halo hela juramentu iha PR Francisco Guterres Lu Olo nia oin. Photo: Media PR

Razaun Melio de Jesus hakarak lori PR Lu-Olo ba TR, tamba hare’e formasaun no posse ba VII Governu Konstitusional xefi estadu kontra ona Konstituisaun RDTL.

Tambe ne’e antes halo complain konstitusional ba Tribunal Rekursu (TR), Melio de Jesus sei fo somasaun ba xefi estadu no karik durante somasaun iha tempu semana rua la hetan resposta, entaun nia rasik sei halo duni complain konstitusional.

“Nu’udar sidadaun Timoroan hau hakarak hato’o hau nia somasaun ba PR konaba dekretu ne’ebe nia hasai ho formasaun VII Governu no nomeasaun PM, iha dalan ba hau sei lori ba iha Tribunal Rekursu karik PR la responde hau nia somasaun ida ne’e. Hau fo somasaun ne’e hahu ohin to’o semana rua, nia (PR) tenke iha obrigasaun para atu responde nudar hau sidadaun ida tanba konstituisaun fo dalan iha artigu 48 konstituisaun koalia katak sidadaun hotu-hotu iha direitu para aprejenta petisaun no kesar mesak-mesak i grupu ba orgaun soberania sira no autoridade sira seluk atu defende sira nia direitu lei inan lei oan ba interese ema hotu nian,” dehan Melio de Jesus, akademika lisensiatura de deretu administrasaun estadu ba THETIMOR-NEWS, Segunda (18/09/2017), iha Street Café, Pateo Shop Kompleks, Dili.

Tuir Melio de Jesus, PR Lu-Olo indireitamente viola ona konstituisaun RDTL, razaun tanba nia hatene ona governu ne’e sei monu iha dalan klaran, maibe nia kontinua nafatin fo tomada de posse.

PR Francisco Guterres Lu Olo hato’o hela deskursu iha seremonia posse ba VII Governu Konstitusional. Photo: Media PR

Artigu 74 hatete katak, Prezidente Republika mak garantia, estabilidade no unidade nasional instituisaun demokratiku sira, kuandu nia hatene katak governu ida hamrik sei monu iha dalan klaran la tuir konstituisaun fo, nia tenke prevene lalais ida ne’e labele dehan katak nia monu lai mak ita foin harii fali ne’e labele.

Tuir nia, orgaun soberania nian sira ne’ebe ejisti iha RDTL hanesan Prezidenti Republika, Parlamentu Nasional, Governu no Tribunal, sira ne’e hotu-hotu atu implementa objectivu nasional ne’ebe konsagra iha artigu 6 Konstituisaun RDTL, ne’ebe tuir lolos PR tenke hare klean liu ba ita nia konstituisaun antes fo sa’e dekretu prezidente ba nomeiasaun PM no fo posse ba membru governu tamba governu ne’e sei implementa objectivu nasional.

“Hau hare katak, PR iha conflict the interest katak PR mai husi partidu FRETILIN, maibe partidu FRETILIN mak manan eleisaun demokratiku foin lalais halao iha 22 jullu foin dadaun, kargu ita nia xefe estadu durante assume nudar prezidente partidu mos durante ne’e ita nunka rona dehan Komite Central FRETILIN mos halo kongresu extraordinariu ida para atu hili prezidente foun hodi lidera partidu ne’e, to agora taka hela,” dehan Melio de Jesus.

Tuir nia, konstituisaun RDTL koalia katak, ema hirak ne’ebe kaer knar iha instituisaun estadu labele kaer kargu rua iha funsaun.

“Realidade hatudu momos katak ita nia PR sei kaer nafatin ida ne’e, nudar PR nudar mos Prezidente partidu FRETILIN, ita nunka rona katak ita nia PR husik ona kargu nudar Prezidente FRETILIN,” dehan eis Komandante Operasaun iha Sentru Formasaun Militar F-FDTL nian ne’e.

Membru VII Governu Konstitusional ne’ebe hetan posse ba sira nia kargu hosi PR Francisco Guterres Lu Olo. Photo: Media PR

Ba formasaun VII Governu ida ne’e bele hatete katak, sira iha intrese hotu, no PR nia interese partidu mak bo’ot liu duke interese nasional.

“Ita hare’e katak, iha ita nia lei konstituisaun RDTL artigu 106 iha farje tolu mak iha, Primeiru; PM indizitadu, indizita husi partidu primeiru mais votadu ne’e fraje ida iha ne’eba virgule tan koalia katak ou aliansa maioria parlamentar ne’ebe iha Parlamentu ne’e fraze segundu terseiru mak, depois PR rona partidu sira ne’ebe iha asentu parlamentar,” dehan Melio.

Melio de Jesus mos komentariu katak, PR Lu-Olo mos “planea” ona atu hamosu duni eleisaun antisipada, tamba nia hare’e Partidu FRETILIN maski manan iha eleisaun parlamentar maibe la konsege no laiha forsa forma governu.

“Hau dehan xefi estadu planea duni atu iha eleisaun antisipada, ida ne’e ita hare’e hosi statement PR LU-Olo nia dala hirak, inklui iha PN katak governu ne’e risku. Hatene risku ona, tamba sa nia la bolu partidu segundu mais votadu atu forma governu. Iha artigu 106 klaru ona katak governu forma hosi partidu mais votadu ou maioria parlamentar, agora ne’e hare’e tok FRETILIN ho PD iha deit 30, no opozisaun iha 35, lojika ne’e iha ne’ebe. Tamba governu agora forma ona, entaun laiha opsaun seluk, wainhira governu monu, tenki halo duni eleisaun antisipada,” dehan eis Segundu Komandante Kompanha Apoiu de Combate do Primeira Batalhão F-FDTL ne’e.

Hare’e ba governu ne’ebe risku, nia mos fiar katak, esistensia VII Governu Konstitusional ne’ebe lidera hosi Primeriu Ministru Mari Alkatiri sei monu antes mandatu remata.

Ho razaun sira nebe temi iha leten, Melio dehan, “Hau fo somasi ba prezidente da republika atu permeiru hare fila fali kona ba decreto presidente No 59 kona ba nomeisaun PM ho fo pose ba Membro governo setimo Givorno RDTL. Segundu, tuir artigu 86, alinea 1d, halo konvokasaun ekstrardinaria parlamentu nasional nian, razaun bo’ot kona ba interese nasional sobre formasaun fo governo relasiona ho prosesu ne’ebe partidu mais votado alias partidu FRETILIN ho nia Koligasaun Partido PD nia relatorio konkordansia ba estabilidade governasaun minoritariu nia razaun hodi nune’e Povu Timor Leste tomak esclarisidu kumpriendu atu nune’e labele tau duvidas, hanoin barak iha povu nia ulun kona ba instituisaun hanesan governo nia mandatu”.

Antes ne’e iha nia deskursu ba posse PM Mari Alkatiri ho nia membru governu, PR Lu-Olo esplika katak posse ba membru governu tuir konstituisaun (Lee notisias: PR Lu-Olo: Posse ba Membru Governu Foun Tuir Konstituisaun, http://thetimor-news.com/2017/09/15/pr-lu-olo-posse-ba-membru-governu-foun-tuir-konstituisaun)

Tamba ne’e nu’udar xefi estadu nia senti haksolok bele fo posse ba governante foun ba VII Governu Konstitusional.

“Nu’udar prezidenti hau haksolok tebes ba hau nia an rasik, tanba fo posse ba governu foun tuir duni nia regra konatituisaun RDTL nian no kontribui ba eatabilidade no funsionamentu normal instituisaun sira nian,” dehan PR Lu-Olo iha nia diskursu iha seremonia posse ba VII Governu Konstitusional iha Palacio Nobre Lahane Dili, Sexta (15/09/2017).

Editora: Agida DOS SANTOS I COPYRIGHT @ THETIMORNEWS 2017

LEAVE A REPLY

Please enter your comment!
Please enter your name here