Home nasional PM Alkatiri Fiar Nia Governu Sei Dura Tinan 5

PM Alkatiri Fiar Nia Governu Sei Dura Tinan 5

2280
0
SHARE
PM Mari Alkatiri. Photo: FB Gabinete Primeiro-Ministro

By: Fidelio RAMOS

THETIMOR-NEWS.com, DILI – Rekonese governu ne’ebe nia lidera ho minoritariu, Primeiru Ministru (PM) Mari Alkatiri fiar an no garante governu ne’e to tinan 5, maske oras ne’e daudaun publiku barak duvida tebes ho governu ne’e.

“Iha Portugal agora Partidu Minoritariu mak ukun, maibe ekonomia to oras ne’e lao diak hela no la monu, ho nune’e hau fiar katak governu ida agora ne’e sei dura,” dehan PM Alkatiri ba Jornalista sira hafoin posse husi Prezidenti Republika (PR) Francisco Guterres Lu-Olo iha Palacio Nobre Lahane Dili, Sexta (14/09/2017).

Xefi governu ne’e esplika, formasaun governu ne’ebe nia lidera ne’e laos fasil, tanba lolos governu foun ne’ebe simu posse hamutuk 30 maibe 11 razaun tanba sira nia parte sei halo negosiasaun nafatin ho partidu sira ne’ebe hetan asentu PN.

“Tuir lolos Governu ne’e total 30, maibe ohin simu posse hamutuk nain sanulu resin ida deit tanba ami ho razaun rua, primeiru buka atu halo negosisaun formasaun ne’e laos fasil e segundu ami sei iha esperansa sei hetan partisipasaun husi partidu sira seluk,” dehan Alkatiri.

Atual Sekretariu Jeral Partidu FRETILIN ne’e mos fiar katak partidu seluk sei hamutuk tan ho sira hodi hamutuk iha governu. Tamba ne’e, nia sei loke odamatan nafatin ba partidu seluk.

“Sei nakloke nafatin ba partidu seluk ne’ebe hakarak involve nune’e bele halo kompleta diak liu governu ne’e, maibe tenke tuir prinsipiu koligasaun, Inklujaun no Insidensial Parlamentar,” dehan PM Alkatiri.

Kargu PM ba Mari Alkatiri ba daruak ona, kargu dahuluk nia asumi wainhira lidera I Governu Konstitusional. Maibe, governu ne’ebe nia lidera la to’o mandate remata tamba iha tinan 2006 wainhira Timor-Leste monu ba krizi militar, lideransa PM Alkatiri iha nia governasaun hetan protesta makas hosi povu hodi nia rezigna an hosi kargu numeru ida iha orgaun ezekutivu nian ne’e.

Editóra: Agida DOS SANTOS I COPYRIGHT ©THETIMORNEWS 2017

LEAVE A REPLY

Please enter your comment!
Please enter your name here