Home nasional CNRT Prontu Apoiu Governu Minoritariu, PLP ‘Foti Liman’

CNRT Prontu Apoiu Governu Minoritariu, PLP ‘Foti Liman’

3370
0
SHARE

THETIMOR-NEWS.com DILI – Partidu Congresso Nacional Reconstrucao de Timor-Leste (CNRT), prontu apoiu VII Governu Konstitusional ne’ebe forma hosi Partidu Frente Revolucionario Timor – Leste Independente (FRETILIN) no Partidu Democratico (PD) maski la to’o votos maioria hafoin Partidu KHUNTO ohin “Lakohi” asina plataforma formasaun governu nian.

Sekretraiu Jeral Partidu FRETILIN, Mari Alkatiri ho Prezidenti PD, Mariano Assanami Sabino, hatudu dokumentu plataforma formasaun VII Governu Konstitusional ne’ebe asina ohin (13/9/2017) iha Sede CCF, Comoro, Dili no hetan sasin hosi Ramos Horta ho Abilio Araujo. Photo: TTN/Hortencio Sanches

Hafoin FRETILIN ho PD hatama ona lista kandidatu ba Primeiru Ministru (PM) ba Prezidenti Republika, Francisco Guterres Lu-Olo iha meudia ohin Kuarta (13/09/2017). Partidu CNRT mos hasoru PR Lu-Olo hodi koalia situasaun formasaun governu, no partidu ne’ebe lidera hosi Kay Rala Xanana Gusmao ne’e prontu apoiu governu minoritariu karik kontinua deit ho FRETILIN no PD.

“CNRT ninia pozisaun kontinua apoiu prosesu dezemvolvimentu no respeita desizaun formasaun Governu koligasaun,” dehan Prezidenti CDN Partidu CNRT, Dionisio Babo Soares hafoin sorumutu ho PR Lu-Olo iha Palasiu Prezidensial, Bairo Pite, Dili.

Inkontru hanesan mos PR Lu-Olo bolu Partidu Libertasaun Popular (PLP) hodi koalia kona ba situasaun formasaun governu.

Deputadu IV lejislatura husi bankada PLP Fidelis Magalhaes, photo google.

“Sei la fo komentariu, cao,” dehan Vise Prezidenti PLP, Fidelis Magalhaes ba jornalista sira.

Nune’e mos hosi Partidu Kmanek Haburas Unidade Nasional Timoroan (KHUNTO) ne’ebe reprezenta hosi nia fundador partidu Jose Naimori no Prezidenti KHUNTO, Armanda Berta no Agustinho da Silva (Sekjen)

“Ohin ami la marka prezensa (iha asinatura plataforma, red) hanoin ida ne’e ami nia uma laran, aban hanesan ne’e mak ita bo’ot sira foin bele hatene,” dehan Jose Naimori.

Fundador KHUNTO Jose Naimori akompaina husi prezidente KHUNTO Armanda Berta husi klaran no liman los Sekretariu Jeral FRETILIN Mari Alkatiri hato hela rejultadu negosiasaun politika ba formasaun governu ba dala hitu, photo Google.

Nia hatutan, KHUNTO hahu husi primeiru kedas hakarak atu kopera hamutuk ho partidu mais votadu sira atu bele lao hamutuk hodi lori nasaun ne’e ba oin.

“Ami prontu atu kopera kualker situasaun atu hamutuk hodi forma governu, maibe ita tenke kria amizade ida entre partidu no lideransa tenke forte, tanba ami laos ba atu buka kadera, maibe ami hakarak unidade nasional,” dehan Naimori.

Maski lista kandidatura ba primeiru ministru Partidu FRETILIN ho PD la koalia sai, hosi rezultadu inkontru Comite Central FRETILIN, hili ona nia sekretraiu jeral, Mari Alkatiri mak sei asumi kargu refere hodi lidera VII Governu Konstitusional.

Hosi informasaun ne’ebe espalla, total membru governu iha VII Governu Konstitusional sei laliu kargu 30.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here