Home dezenvolvimentu PLP Hakiduk iha Koligasaun, FRETILIN – PD – KHUNTO Asina MoU Formasaun...

PLP Hakiduk iha Koligasaun, FRETILIN – PD – KHUNTO Asina MoU Formasaun Governu

1505
1
SHARE
Sekretariu Jeral FRETILIN Mari Alkatiri husi liman los Prezidente PD Mariano Assanami Sabino no liman sorin Konsillero Masimo KHUNTO Jose Naimori akompaina husi Prezidente Armanda Berta hato hela deklarasaun Asina komprimisiu Politiku, konkordansia formasaun VII Governu konstitusional, Photo:TTN/Hortencio Sanches.

By: Hortencio SANCHES

THETIMOR-NEWS.com, DILI – Esperansa Partidu FRETILIN hodi ‘’Kaben’’ ho Partidu Libertasaun Popular (PLP) no Kmanek Haburas Unidade Nasional Timoroan (KHUNTO) hamutuk hodi forma VII Governu KOnstitusional, ikus labele realiza tamba PLP hakiduk.

Maski dialogu halao dala hirak ona, ikus PLP labele mosu iha asina memorandum of understanding (MoU) ba formasaun governu nian ne’ebe ikus FRETILIN konsege asina deit ho KHUNTO no Partidu Democratico (PD).

Sekretariu Jeral FRETILIN Mari Alkatiri hatete, lolos FRETILIN Avansa ho PLP no KHUNTO maibe, dezisaun politiku no rezultadu husi dialogu mak nune’e.

Nia hatutan, komprimisiu ne’ebe mak sira asina ona sai hanesan baze legal ida atu halo formasaun VII Governu ida ne’ebe dinamiku no vizaun ne’ebe diak atu halo dialogu ho parte hotu kona ba servisu estadu nian ba intrese nasaun nian.

“Komprimisiu politiku ne’ebe mak ohin PD no KHUNTO mai asina ami sei kumpri ho vizaun dinamika signifika katak, husi ne’e ba oin dialogu tenke iha nafatin, laos entre tolu (3) ne’e deit mais 3 ne’e hamutuk ho rua (2) iha Parlamentu, hamutuk ho Sosiedade Sivil Timoroan tomak no igreja iha Timor hotu atu lao hamutuk hodi hametin ita nia estadu ida ne’e ba oin ho diak,” dehan Alkatiri ba Jornalista sira, Segunda (04/09/2017), iha Hotel Novo Turismu, Dili.

Tuir nia, asina ne’ebe mak sira halo seidauk bolu koligasaun, maibe foin mak bolu komprimisiu politiku tanba iha kestaun balu ne’ebe seidauk tama iha akordu sei kontinua deskute nafatin hodi buka solusaun.

“Klaru koligasaun ne’e laos partidu 5 ne’e hotu iha PN mak halo koligasaun, Governu atu lao ba oin PN tenke iha mos sentidu kritiku , tanba ne’e mak sei dauk iha koligasaun maibe forsa de koligasaun tanba kestoens sira ne’ebe seidauk tama iha akordu ne’e sei kontinua deskute nafatin,” tenik Alkatiri.

Iha fatin hanesan Prezidente Partidu Demokratiku, Mariano Assanami Sabino afirma, objetivu PD nian hodi hamutuk ho FRETILIN no KHUNTO hakarak hamutuk fo kontribuisaun atu lori nasaun ne’e ba oin tuir prisipiu ne’ebe partidu ne’e hasai ona durante ne’e iha kampaina.

“Partidu Demokratiku, ohin mai hamutuk ho FRETILIN no KHUNTO Atu hamutuk hodi forma Governu ne’e ba oin, maibe la haluhan mos ba partidu CNRT, PLP no seluk tan ne’ebe mak la hola parte iha Governu maibe imi hotu nia ejistensia kontribui ona demokrasia ne’ebe bo’ot iha ita nia rai,” dehan Assanami.

Nune’e PD pronto atu servi povu no nasaun Timor – Leste tuir prinsipiu ne’ebe PD komunga ona katak, “Ba O Timor Hau Maubere oan Prontu Servi” kualker tempu no pozisaun.

“Uluk iha 2011, PD hatete ona katak, ukun ne’e povu nian hamutuk ita bele, tanba ukun ne’e inan aman sira nian, liu husi eleisaun sira fo fiar ba partidu sira atu nune’e bele servi fali ba sira iha nasaun ida ne’e,” dehan nia.

Iha sikun seluk, Konsilleru Masimu Jose Naimori informa, atu lori nasaun ne’e ba oin presija servisu hamutuk no kri estabilidade ba malu, tan ne’e agora partidu 3 hamutuk ona tu servisu hamutuk sai ida deit maibe sei nakloke hodi simu opiniaun husi partidu seluk no publiku ne’e hakarak suporta no apoiu Governu nia servisu.

“Ami partidu 3 agora sai hamutuk ona ida deit hodi forma Governu ba Tinan 5 oin mai, ne’e duni husu ba povu hotu atu hakmatek hodi simu rezultadu ne’ebe mak iha no fo apoiu nafatin ba Governu ida ne’e bele la oho diak hodi dezenvolve nasaun ida ne’e,” dehan Naimori.

Tuir informasaun, PLP hakiduk hosi koligasuan tamba iha inkontru ikus ne’ebe halao entre FRETILIN ho PLP iha loron 2 Setembru liu ba, PLP ho FRETILIN la konkorda malu ba lista kandidatu meza Parlamentu Nasional ne’ebe hosi parte PLP hakarak Prezidenti PN sira nia ema, maibe hosi FRETILIN hakarak nia ema mak avansa tamba sira nia kadeira barak liu iha PN.

Iha informasaun ne’ebe espalla, PLP hakarak Fidelis Magalhaes mak avansa ba Prezidenti PN, maibe parte FRETILIN hosi informasaun ne’ebe mosu antes ne’e dudu Aniceto Guterres ba Prezidenti PN.

Iha Eleisaun Parlamentar 22 Jullu 2017, FRETILIN sai vensedor ho kadeira 23 iha PN, tuir kedan Partidu CNRT ho kadeira 22, PLP (8), PD (7) no KHUNTO (5).

Editòra: Agida DOS SANTOS I COPYRIGHT@2017

1 COMMENT

  1. Hau hanoin posisaun PLP retira husi koligasaun ho FRETILIN ida nee normal, tamba halo koligasaun atu defini komfirmizu politika ruma ba posisaun partidu koligasaun, maibe halo koligasaun atu kompleta deit partidu maioria nia posisaun iha estrutura Governo ho Parlemento, entaun hau hanoin nee laos koligasaun, se atu halo koligasaun tenke fahe mos Estructura balun ba partidu seluk nebe forma koligasaun, se Partidu vensedor mesak prense tomak edtrutura Governo ho Parlemento, nee hau hsnoin diak liu maka retira, atu nunee hodi mantein dignidade partidu politika nian iha Sistema Demokrasia, nee duni.PLP retira husi Koligasaun ho FRETILIN, nee parte positivo iha Sistema Demokrasia.

LEAVE A REPLY

Please enter your comment!
Please enter your name here