Home nasional Deputadu PN, Konkorda Kansela Lelaun Prado

Deputadu PN, Konkorda Kansela Lelaun Prado

2608
0
SHARE

By: Hortencio SANCHES

THETIMOR-NEWS.com,  DILI – Deputadu  Parlamentu Nasional (PN) husi Bankada 3 konkorda ona hodi  kansela totalmente, ba desizaun ne’ebe mak  fo sai husi sekretariadu Parlamentu Nasional   ba deputadu sira atu sosa kareta Prado 65 ne’ebe, durante ne’e  deputadu hirak ne’e uja iha sira nia mandatu.

Tuir sira,  desizaun alinasaun ba kareta PN nian ne’e mak halo agora mosu polemika bo’ot iha Publiku nune’e rejulta estudante barak mak sai vitima no sasan Estadu nian barak mak hetan estraga.

Estudante Universidade sira halo hela protesta hasoru PN hodi husu atu kansela lalais lelaun kareta Prado ne’ebe mak deputadu sira halo ba sira nia an rasik iha edifisiu UNTL no PN nia oin, photo TTN/Hortencio Sanches.

Bankada 3 ne’ebe foti desijaun ona mak hanesan, CNRT, FRETILIN no PD ohin (22/08/2017) hato ona ba publiku, hodi hatan ba polemika ne’ebe mak durante ne’e akontese iha sosiedade liu-liu akademiku no sosiedade sivil sira kestiona makas hodi halo demostrasaun.

Deklarasaun Bankada CNRT nian, hato liu husi Deputadu Natalino dos  Santos katak, hare ba polimika ne’ebe oras ne’e daudaun mosu iha publiku kona ba lelaun kareta deputadu nian  makas liu iha Dili laran, nune’e   Prezidente PN foti ona desizaun hodi halo suspensaun ba alinasaun refere.

“Ami bankada CNRT iha PN deside atu intrega hikas kareta 30, ne’ebe durante ne’e, deputadu CNRT nain 30 uja, ne’e duni ami nia parte kansela total no la tuir prosesu alinasaun ba kareta PN nian,” informa Prezidente Bankada CNRT Natalino dos Santos liu husi Konferensia Imprensa ne’ebe halao iha PN ohin.

Tanba ne’e, sira husu ba Prezidente PN atu halo kansela lalais ba prosesu   aliniasaun ne’ebe mak sekretariadu PN foti ona.

Iha sorin seluk, deputadu Bankada FRETILIN, Fransisco Miranda Branco informa, aliniasaun ne’ebe mak administrasaun PN hasai ona iha 18 Agostu 2017,  publiku barak mak la aseita no sira nia parte  simu ona despaisuhusi Prezidente PN kona ba kareta hirak ne’e mak sira uja labele sosa tenke fo fila ba PN hanesan Patrimoniu Estadu.

“Ami simu ona despaisu husi Prezidente PN katak kareta hirak ne’e PN nian, ne’e duni ami la presiza tan  atu halo deklarasaun kona ba ida ne’e, ne’e duni sasan hirak ne’e patrimonio estadu nian,” dehan Prezidente Bankada FRETILIN.

Tuir nia desizaun Bankada FRETILIN nian klaru ona, sira sei kumpri mandatu remata mak foin bele  intrega kareta hirak ne’e.

Iha sikun seluk,  Prezidente Bankada PD, Deputada Maria Lurdes Besa afirma, sira preokupa tebes ho situasaun manifestasaun ne’ebe mak halao ona iha Dili, durante loron hirak nia laran, ho nunee’e bankada PD foti ona desizaun hodi  intrega hikas kareta ne’ebe mak durante ne’e sira uja ba PN sai hanesan sasan Estadu nian.

“Ami nia parte hola ona desizaun hodi kansela, prosesu atu sosa kareta PN nian ne’ebe mak durante tinan 5 ami uja, nia prosesu lao tiha ona maibe to agora sai polemika bo’ot ne’e duni ami sei kansela total,” dehan Deputada Maria Lurdes Besa iha konferensia Imprensa PD nian ne’ebe halao iha PN ohin.

Nia hatutan, sira sei uja kareta Prado hirak ne’e to sira nia mandatu termina, maske kareta hirak ne’e balun deputadu sira troka ona sapa matrikula ba privadi.

Nune’e Bankada 3 ne’e  husu ba Publiku hotu atu kria  estabilidade paz iha Timor – Leste atu nune’e povu labele terus tan.

Editóra: Agida DOS SANTOS I COPYRIHT@2017

LEAVE A REPLY

Please enter your comment!
Please enter your name here