Home nasional PLP-FRETILIN Konkorda Forma VII Governu Konstitusional

PLP-FRETILIN Konkorda Forma VII Governu Konstitusional

2118
1
SHARE

By: Hortencio SANCHES

THETIMOR-NEWS.com, DILI – Partidu mais votadu Frente Revolucionaria do Timor – Leste Independente (FRETILIN) kontinua halo dialogu ho Partidu Libertasaun Popular (PLP) konaba formasaun VII Governu Konstitusional iha Hotel Novo Turismo, Tersa (16/08/2017).

Inkontru entre FRETILIN ho PLP ne’e halao dala rua ona, ne’ebe antes ne’e partidu rua hasoru malu iha 10 Agostu 2017 iha fatin hanesan.

FRETILIN ne’ebe reprezenta hosi Sekretariu Jeral Mari Alkatiri hahu inkontru mesak deit ho Prezidenti PLP, Taur Matan Ruak kuaze minutu 30, hafoin bolu fali estrutura tama ba partisipa.

“Ohin ami diskute ne’e atu koalia kona ba oinsa forma Governu ne’e iha plataforma ida ne’ebe forte, maibe ita sei iha tan tempu atu deskute iha aban no bairua,” dehan Alkatiri ba Jornalista sira hafoin inkontru.

Nia hatutan, asunte ne’ebe mak ohin FRETILIN no PLP diskute liuliu iha parte 3 hanesan, koligasaun, insidensial parlamentar no inkluzaun, maibe sira koalia liu konaba koligasaun entre partidu rua ne’e.

“Ami ohin koalia naruk uitoan mais, ami deside atu ohin ne’e ba oin atu koalia deit kona ba koligasaun,” dehan Alkatiri.

Iha fatin hanesan, Prezidente PLP Taur Matan Ruak hatete, diskusaun ne’ebe mak sira halao koalia deit konaba partidu 2 ne’e atu halo koligasaun hodi forma Governu maibe seidauk hatene los konaba modelu Governu mak sira  atu forma tanba sei iha faze diskusaun.

“Ami deskute koligasaun, deskute koligasaun kona ba kargu Primeiru Ministru (PM) ne’e seidauk,” dehan Taur.

Dezisaun PLP hodi hamutuk koliga ho FRETILIN ba formasaun VII Governu Konstitusional ne’e kontradiksi uituan ho Prezidenti PLP, Taur Matan Ruak ne’ebe iha inisiu wainhira PLP hetan rezultadu kadeira 8 iha PN katak partidu ne’ebe nia lidera sei sai opozisaun iha uma fukun Parlamentu Nasional.

Maski besik ona lampu verde ba koligasaun ho PLP, maibe tuir ajenda FRETILIN sei kontinua konvida Partidu KUNTO ne’ebe hetan kadeira 5 iha PN atu inkontru hikas kona ba assuntu hanesan ba formasaun VII Governu Konstitusional.

FRETILIN iha eleisaun parlamentra tinan ne’e hetan kadeira 23 tuir kedan Partidu CNRT ne’ebe lidera hosi Kay Rala Xanana Gusmao ho kadeira 22 no Partidu Democratico ne’ebe dadauk ne’e xefia hosi Mariano Assanami Sabino nudar prezidenti partidu nian konsege lidera nia partidu hetan kadeira 7, maski iha tempu kampana eleisaun, mosu prediksaun katak PD sei la hetan tan votos barak ou sei lakon kadeira barak iha PN hafoin husik hosi matebian Saudozu Fernando Lasama de Araujo.

Editóra: Agida DOS SANTOS I COPYRIGHT@2017

1 COMMENT

  1. Hau nudar sidadaun Timor oan, hakarak kontribui ba prosesu dezemvolvementu, nee duni nia susjestaun ba ukun nain sira nebe mak hetan fiar husi povo, ita boot sira tenki halo tuir kompremisiu politik nebe mak ita boot sira promete iha tempu kampainya. Tamba ukun ida nee Lori ema hotu nia Ruin ho Raan mak sosa ukun an ida, Ita boot sira nebe hetan fiar husi povo, tenki iha planu no jestaun nebe diak hodi dezemvolve ita rain no Lori povo sai husi sai husi kiak. Tamba ukun an ida nee ema nebe uluk moris diak agora mos diak nafatin, sira nebe uluk terus to agora terus nafatin.

LEAVE A REPLY

Please enter your comment!
Please enter your name here