Home nasional Xanana Sei Asume Knar Prezidenti CNRT

Xanana Sei Asume Knar Prezidenti CNRT

751
0
SHARE
Prezidente partidu CNRT Kay Rala Xanana Gusmao koalia hela ho militante CNRT iha kampaina ba dala ikus iha Tasi-Tolu Dili, Photo: media /CNRT.

By; Fidelio RAMOS

THETIMOR-NEWS.com, DILI –  Kay Rala Xanana Gusmao oras ne’e daudaun asume nafatin knar hanesan Prezidente Partidu Congreco Nasional Reconstrucao Timor – Leste (CNRT), maske hato’o ona rezignasaun hosi nia kargu iha abertura konferensia nasional Partidu CNRT iha Sexta (04/08/2017).

Rezignasaun Kay Rala Xanana Gusmão hosi kargu Prezidenti Partidu CNRT hetan diskusaun makas iha konferensia nasional partidu nian, no ikus dezisaun ne’ebe sai konferensia simu rezignasaun Kay Rala Xanana Gusmão hosi nia kargu hodi prepara fali kongressu extraordinariu hodi hili estrutura foun.

“To’o relalizasaun kongresu extraordinariu maun bo’ot (Xanana,red) sei kaer nafatin nia knar nudar prezidente Partidu CNRT, sem ona direitu perrogativu hanesan prezidente partidu ho plenus poderes. Konferensista sira tomak simu, ho laran kmanek, dezisaun hosi Maun Bo’ot Kay Rala Xanana Gusmão atu mantein nudar prezidenti partidu, em exercisiu,” dehan Prezidenti CDN-CNRT, Dionisio Babo Soares iha konferensia imprensa, Domingu (06/08/2017), iha CCD.

Rezignasaun ne’e, tuir konferensista sira sai ezemplu diak iha partidu nia laran atu halo nusa kuadru sira hotu bele hakiak esperitu responsabilidade ba  partidu.

Hosi parte estrutura rasik, rezignasaun Kay Rala Xanana Gusmao nian seidauk tempu atu lider ne’e foti dezisaun ne’e.

Desde hari’i iha Abril 2007, kargu Prezidenti Partidu CNRT asumi hosi Kay Rala Xanana Gusmao. Sekretariu Jeral dahuluk asumi hosi Dionisio Babo Soares durante periodu rua (2007-2012 no 2012-2017) to’o agora sekretariu jeral asumi fali hosi Francisco Kalbuadi Lay too 2022.

Iha Eleisaun Parlamentar 2017, Partidu CNRT hetan det kadeira 22. Partidu FRETILIN ne’ebe sai partidu mais votadu hetan kadeira 23. Entertantu Partido Libertasaun Popular (PLP), partidu foun ne’ebe lidera hosi eis Prezidenti Republika, Taur Matan Ruak hetan kadeira 8, no Partido Democratico (PD) ne’ebe dadauk ne’e xefia hosi Mariano Assanami Sabino hetan kadeira 7 no ikus Partidu KHUNTO halo supreza iha nia partisipasaun iha leeisaun parlamentar daruak desde 2012, iha tinan 2017 hetan kadeira 5.

Hosi estatementu Sekretariu Jeral Partidu FRETILIN, Mari Alkatiri ba publiku, hato’o ona pozisaun partidu istoriku ne’e hakarak hamutuk det ho partidu CNRT hodi forma VII Governu Konstitusional.

Desde kaer nia soberanu rasik, Timor-Leste hamutuk iha ona governu dala hitu (konta ho agora ne’e). Governu dahuluk forma ho dala tolu hahu tinan 2002-2007. Governasaun ne’e ukun hosi Partidu FRETILIN ne’ebe iha Primeiru Governu Konstitusional lidera hosi Primeiru Ministru Mari ALkatiri ne’ebe ukun det to’o tinan 4, hafoin ejijensia povu Timor-Leste hosi nia tuun hosi governasaun. Hafoin rezigna an hosi kargu Primeiru Ministru, Ramos Horta neebe momentu ne’eba kaer kargu Ministru Negosiu Estranjeiru kontinua kaer pasta primeiru ministru no iha III Governu Konstitusional iha fulan ida ho balun det, Estanislau da Silva asumi fali kargu primeiru ministru.

Tama iha eleisaun parlamentar tinan 2007-2012, maski manan maioria Partidu FRETILIN lakon votos iha Parlamentu Nasional hodi simu governasaun ukun hosi Partidu CNRT ho nia aliansi parlamentar ho Partidu Democratico (PD), ASDT no PSD. IV Governu Konstitusional ne’ebe famous ho naran Governu AMP (Aliansi Maioria Parlamentar) xefia hosi Kay Rala Xanana Gusmão nudar nia primeiru ministru.

Iha tinan 2012-2017, Partidu CNRT sai partidu mais votadu ho kadeira 30 no kontinua bolu Partidu Democratico no Frente Mudanca hodi forma V Governu Konstitusional. Kay Rala Xanana Gusmão kontinua lidera nudar primeiru ministru to’o tinan 2015 rezigna an hosi nia kargu hodi kontinua hosi Rui Maria de Araujo nudar primeiru ministru ba VI Governu Konstitusional.

Editóra: Hortencio SANCHES I COPYRIGHT@2017

LEAVE A REPLY

Please enter your comment!
Please enter your name here