Home nasional Servisu Tinan 1 ba Estadu, Governu PLP Sei Konsidera Nudar Veteranus

Servisu Tinan 1 ba Estadu, Governu PLP Sei Konsidera Nudar Veteranus

172
0
SHARE
Prezidente PLP, Taur Matan Ruak fo hela edukasaun votantes ba elitor ne'ebe hakarak vota PLP iha Leorema Munisipiu Liquica. Photo TTN/Hortencio Sanches.

By: Hortencio SANCHES

THETIMOR-NEWS.com, LEOREMA – Partidu Libertasaun Popular (PLP) iha nia kampana politika promote katak wainhira lidera VII Governu Konstitusional, ba ema ne’ebe deit mak servisu ba estadu durante tinan ida konsidera ona nia nudar veteranus.

Tamba ne’e, iha Eleisaun Parlamentar nian mak povu tau duni fiar ba PLP, atu reforsa titlu veteran, governu PLP sei muda Lei Veteranu nian.

“Bainhira PLP manan ita hakarak muda no hadia lei veteranus nian, atu nune’e ema ne’ebe servisu durasaun kleur ba estadu tenke sai ona veteranus,” dehan Taur iha nia komisiu politiku ba militante PLP, iha Suku Leorema, Postu Administrativu Bazartete, Munisipiu Liquisa, Sabadu (01/07/2017).

Taur kompara, iha Australia no Estadu Unidos Amerika, bainhira nia ema sira servisu ba estadu fulan nen (6) ona, estadu konsidera ona nudar veteranus.

“Amerika ema sira servisu ba estadu fulan 6 sai ona Veteranus maibe Timor servisu tinan 10 maibe la sai Veteranus.  Australia nia ema sira servisu fulan 6 de’it estadu rekoinese ona sai veteranus, ne’e duni povu fo fiar mai PLP kaer ukun sei muda lei ne’e,” dehan Taur.

Bazeia ba programa PLP nian, in prinsipiu governasaun PLP sei fahe oportunidade hanesan. “PLP nia hakarak povu no ema hotu tenke moris hanesan, kiak-kiak hotu Riku-Riku hotu fahe oportunidade hanesan.”

Taur sublina tan, bainhira PLP manan sei aruma restu mortais hirak ne’ebe sei namkari hela iha Timor laran hodi tau hamutuk fatin ida.

“Bainhira ita manan ita sei aruma saudozu sira ne’ebe fo an ba rai ne’e nia libertasaun oras ne’e sei namkari hela iha Timor laran seidauk aruma hotu tenke aruma hotu iha fatin ida de’it,” Taur Promete.

Nia hatutan, laos hare ba planu hirak ne’e de’it maibe sei tau atensaun mos ba joven sira hodi fo edukasaun ne’ebe diak atu nune’e labele iha tan konflitus.

Tuir nia durante ne’e estadu sempre dun Joven sira ba arte marsiais hodi lori Polisia duni ba mai, maibe PLP hetan konfiansa sei rezolve problema hirak ne’e.

Nune’e mos nia garantia katak PLP sei tau inportansia no valoriza lei tradisional forte iha Timor – Leste.

“Lei tradisional tenke eziste forte atu bele prevene konflitus ba joven sira. PLP hakarak valoriza fila fali lei tradisional hanesan tara bandu atu nune’e bele hamenus konflitus iha ita nia rain liu-liu joven sira,” dehan Taur.

Nia hatutan, lei tradisional aplika duni iha Timor – Leste problema kiik iha Munisipiu sei la lori ba Tribunal.

Tuir nia, lei tradisional importante liu lei ne’ebe kastigu iha komarka tanba ema barak mak agora la tauk komarka.

“Tanba sa mak ita hakarak aplika lei ne’e tanba ema barak agora la tauk ona komarka Bekora no Glenu tanba ba iha ne’eba han toba deit, maibe lei kultura moruk tebes tanba lia nain sira fo malisan bele kona kedas,” nia dehan.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here