Home dezenvolvimentu CNRT Kontinua Hadia Povu Nia Moris

CNRT Kontinua Hadia Povu Nia Moris

139
0
SHARE
Militante no Simpatizante Partidu CNRT Munisipiu Aileu antusiasmu rona komprimisiu politiku Partidu CNRT nian ne'ebe hatoo hosi Prezidenti Partidu CNRT,Kay Rala Xanana Gusmao iha Kampu Futebol Aileu, Domingu (25/06/2017). Photo: Media CNRT

By: Hortencio SANCHES

THETIMOR-NEWS.com, AILEU – Partidu Congresso Nasional Reconstrução de Timor – Leste (CNRT) liu husi nia lideransa Prezidente Kay Rala Xanana Gusmão hatete, estratezia CNRT atu lori povu ba naroman no muda povu nia moris.

Prezidenti Partidu CNRT, Kay Rala Xanana Gusmao wainhira hato’o nia komprimisiu politiku iha kampana ne’ebe halao iha Same, Munisipiu Manufahi, Sexta (23/06/2017). Photo: Media CNRT

Tamba ne’e, wainhira kaer tan governu iha tinan 5 tuir mai, nia sei la tuur nonok det iha fatin, maibe sei lai vizita munisipiu hotu atu kontrola dezenvolvimentu munisipiu ida-idak nian.

“Kuandu CNRT kaer Governu iha tinan 5 nia laran, hau sei la tur nonok de’it iha fatin, maibe hau sei lao tun ba munisipiu hotu atu kontrola. Ida ne’e mak estratejia CNRT nian atu nune’e bele lais lori povu ne’e ba moris diak no dezenvolvimentu iha munisipiu sira bele lao ba oin,” Kay Rala Xanana Gusmão hato’o lia hirak ne’e perante Kampana Partidu CNRT iha Kampu Futebol Aileu Vila, Munisipiu Aileu, Domingu (25/06/2017).

Eis Komandante da luta ne’e hatutan, antes nia husik mundu ne’e Povu Timor – Leste hotu tenke moris diak no nasaun tenke mudansa.

“Bainhira aban bairua maromak bolu hau karik imi sira ne’e tenke hetan diak hotu ona atu nune’e hau bele toba hamnasa,” dehan Fundador nasaun Timor-Leste ne’e.

Hare’e ba potensi Munisipiu Aileu nian, liliu iha area Turismu no Agrikultura, Kay Rala Xanana Gusmao husu ba Aileu oan sira tenke badinas no labele baruk wainhira CNRT kontinua lidera tan governasaun no implementa nia programa dezemvolvimentu nian.

“CNRT mai atu hato’o nia komprimisiu ba rai ida ne’e, laos mai atu halo promesa, CNRT atu lori povu no rai ida ne’e ba oin,” dehan Kay Rala Xanana Gusmão.

Militante no Simpatizante Partidu CNRT Munisipiu Aileu prontu lori Partidu CNRT manan maioria iha Munisipiu AIleu hanesan Eleisaun Parlamentar tinan 2012. Photo: Media CNRT

Iha fatin hanesan kordenador Munisipiu Aileu, Rogerio hatete, vitoria maioria ne’ebe Partidu CNRT hetan iha Eleisaun Parlamentar iha tinan 2012 sei repete hikas iha Eleisaun Parlamentar tinan 2017.

“Ita Munisipiu Aileu agora kampaina iha fatin tolu (3) ne’e tanba saida, tanba hare ba rezultadu ne’ebe mak iha 2012 hatudu, hau fiar katak iha tinan ida ne’e CNRT sei manan maioria tan iha Munisipiu Aileu,” dehan Rogerio.

Kampana Partidu CNRT iha Munisipiu Aileu sei halao tan dala ida iha Ai Kurus, Postu Administrativu Remexiu iha 29 Junu 2017. Antes ne’e, Partidu CNRT mos halao kampana iha Suku Lequitura.

Kampana Partidu CNRT iha Munisipiu Aileu hetan partisipasaun maximu hosi nia militante sira ne’ebe “invade” Kampu Futebol Aileu ho kamizola koor azul.

Kampana iha Kampu Futebol Aileu nudar kampana ba dala lima Partidu ho numeru sorteiu 7 ne’e iha Munisipiu hat (Covalima, Ainaro, no Manufahi).

Partidu CNRT sei kontinua nia kampana iha Gleno, Autoridade Munisipiu Ermera iha 26 Junu 2017.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here