Home nasional Kazu Pistola Ilegal iha Lospalos, Halo Ona Julgamentu

Kazu Pistola Ilegal iha Lospalos, Halo Ona Julgamentu

1180
0
SHARE

By: Hortencio SANCHES

THETIMOR-NEWS.com, DILI – Pistola Ilegal ne’ebe eis FALINTIL Rena Selak prende husi ema sivil iha futu manu fatin loron Segunda (19/06/2017) iha Munisipiu Lautem oras ne’e daudaun halao ona Julgamentu.

Lia hirak ne’e hato husi Komandante Jeral PNTL komisariu Julio Hornay hafoin hasoru malu ho Prezidente da Republika Fransisco Guterres Lu-Olo iha Palasiu Aitarak Laran Dili, Kinta (22/06/2017).

“Pistola ne’ebe mak ita nia veteranus prende husi joven balun iha futu manu fatin ne’e ita detekta ona katak pistola ne’e UN nian momentu ne’eba Polisia Nepal sira mak kaer,” dehan Komisariu Julio Hornay.

Tuir nia, Pistola refere deskonfia UN nian ne’ebe lakon iha tinan 2003 liu ba ne’ebe la konsege hetan to’o agora.

“Pistola ne’e dalaruma, Pistola UN nian ne’ebe lakon iha tinan 2003 buka la hetan, ita la hatene los maka ne’e ka ou lalos,” komisariu Julio dehan.

Nia sublina, kazu ne’e agora daudaun prosesu halo los hotu ona no tama ona iha prosesu kriminal.

“Kona ba kazu ne’e agora ita amankan ona, agora kazu ne’e tama ona iha prosesu kriminal horseik halo ona julgamentu,” dehan Komisariu Julio Hornay.

Komisariu Julio akresenta, Relasiona iha akontesimentu ne’e ema ida mate, maibe laos kauja husi Pistola ne’ebe mak veteranus Renan hadau.

“Iha momentu ne’eba ema ida mate duni iha fatin, maibe laos kauja husi pistola refere maibe tanba sira baku malu no tuda malu,” dehan nia.

Bianhira akontese problema iha fatin ne’eba PNTL Munisipiu Lautem konsege to kedan iha fatin refere hodi halo atuasaun no oras ne’e daudaun situasaun iha fatin refere lao kontroladu.

Iha parte balun deskonfia ema ne’ebe mak utiliza pistola ne’e intelijensia husi PNTL, maibe komisariu Julio desmente ba informarasaun ne’e.

 “Ema ne’e laos intelijen husi PNTL nia, Intelijen PNTL nian la uja atribuitu hanesan ne’e,” dehan nia.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here