Home desportu Rezigna An Hosi Prezidenti Cacusan, Maneco Sei Harii Klubu Foun

Rezigna An Hosi Prezidenti Cacusan, Maneco Sei Harii Klubu Foun

668
0
SHARE
Joao Maneco (fatu metan) Prezidenti Cacusan CF ne'ebe rezigna an hosi klubu refere hodi prepara an harii klubu foun relasiona ho problema interna ne'ebe akontese ba klubu Primeira Divisaun ne'e. Photo: Dok Cacusan.

By: Hortencio SANCHES

THETIMOR-NEWS.com, DILI  – Joao Maneco, Prezidenti Klubu Primeira Divisaun Liga Futebol Amadora (LFA), Cacusan CF officialmente deklara nia rezignasaun hosi kargu prezidenti klubu no deklara sei harii klubu foun fali.

Iha semana kotuk, Joao Maneco hatama karta rezignasaun hosi nia kargu numeru ida iha klubu Kapital Dili nian ne’e hosi Becora. Razaun nia rezigna an tamba problema nia hun maka “espulsa” ne’ebe nia halo ba eis treinador Vasco Fernandes nudar mos fundador Cacusan CF, ne’ebe “espulsa” ne’e hamosu deskontente ba Vasco no fundador ho estrutura balun.

“Asuntu nia hun hosi hau nia rezignasaun ne’e hanesan sira fundador la satisfas ho desijaun sira ne’ebe hau foti hapara sira nia kontratu, maibe ida ne’e laos desizaun ne’ebe mak hau nar-naran foti  lae, bazeia ba akordu ne’ebe mak ami halo ona katak se treinador ne’e kaer iha jogu primeira volta Cacusan tenke hetan 15% maibe la to’o, to’o  deit  4%,” dehan Maneco ba jornalista, Domingu (28/05/2017), iha Becora, Dili.

Razaun seluk nia mos foti dezisaun hodi rezigna an ne’e tamba kolen ona no tempu ba nia atu fo fali kargu ne’e ba estrtutura seluk ne’ebe merese asumi kargu ne’e.

“Hau hanoin sai ne’e  tanba hau sente kole demais liu, dala ruma hau  organiza tia buat barak iha klubu dalaruma sai fali treinador ba klubu, entaun hau sente kole liu,” dehan Maneco.

Iha parte seluk, eis treinador Cacusan CF, Vasco Fernandes lakohi fo nia komentariu relasiona ho rezignasaun Joao Maneco.

“Agora dadauk ne’e hau sedauk bele fo komentariu,” dehan Vasco Fernandes ba thetimornews.

Durante nia lideransa, Maneco hasai ona osan kuaze US$ 210,000 hodi investe ba Cacusan CF no osan foin mak (fila) tama US$ 35,000.

Iha nia lideransa, Maneco mos konsege lidera klubu Becora ne’e hodi promosaun ba Primeira Divisaun iha epoka 2017.

Iha epoka 2017, pozisaun Cacusan iha fatin terseiru ho pontu 11 (manan 2 ho empata 5) lakon pontu 4 ho Karketu Dili ne’ebe lidera klasifikasaun ho pontu 15 no tuir kedan AD. SLB ho pontu 13.

Pozisaun zona degradasaun okupa hosi Academica ho pontu 5 iha pozisaun 7 no Porto Taibessi ho pontu 4 iha pozisaun ikus liu.

Carsae iha pozisaun 4 ho pontu 10, AS. Ponta Leste iha pozisaun 5 ho pontu 9 no Zebra ho pontu 6 iha pozisaun 6.

Jogu Primeira Divisaun sei hahu hikas ba segunda volta iha 3 Junu 2017.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here