Home internasional Timor-Leste Lakon Figura Referensia ba MVC Nia Mate

Timor-Leste Lakon Figura Referensia ba MVC Nia Mate

339
0
SHARE
Fotografia ikus matebian Mario Viegas Carrascalao wainhira simu medalla colar de Ordem Timor-Leste tau iha nia kaisaun sorin iha mate uma Terra Santa Dili. Photo: Gabinete Primeiru-Ministru

By: Fedelio RAMOS

THETIMOR-NEWS.com, Dili – Notisia mate Eng. Mario Viegas Carrascalão (MVC) tamba assidente trafegu iha area Ponte Kais Dili, hanesan soke bo’ot ba Timor-Leste, tamba lakon tan figura nasional ne’ebe hosi parte Primeir-Ministru (PM) Rui Maria de Araujo konsidera Timor-Leste lakon figura referensia diak ida.

PM Rui Maria de Araujo ho nia espeoza wainhira koalia ho matebian Mario Viegas Carrascalao nia espoza, Maria Helena iha mate uma Terra Santa, Dili. Photo: Gabinete PM

PM Rui haktuir lia hirak ne’e ba jornalista sira wainhira presta kondolénsia ba família MVC, Sabadu (20/05/17), iha Terra Santa Residence, Dili.

Tuir PM Rui hanesan Timoroan ema hotu lakon figura referénsia tanba durante tinan barak tebes halo esforsu maka’as ba timoroan sira atu bele hetan kondisaun vida ne’ebé di’ak liu.

“Eng Mario Viegas Carrascalão figura ida ne’ebé loke dalan ba prosesu libertasaun ninian e ao mesmo tempu halo sebrisu hodi hamosu kondiasaun atu populasaun bele moris di’ak liutan no loke dalan ba joven barak tebes iklui ha’u (Primeiru-Ministru) hetan bolsa estudu hodi eskola iha Indonézia, maski Eng Mario hatene jovens sira ne’e la gosta Indonéziu maibé objeitvu maka oinsa fó oportunidade ba joven timoroan sira hodi nune’e sira bele sai kuadrus ne’ebé di’ak atu bele dezenvolve Timor-Leste independentemente husi ninia estratejia polítika,” dehan PM Rui tuir publikasaun iha funpage Facebook Gabinete do Primeiro-Ministro ne’ebe publika iha Domingu (21/05/2017).

Xefi governu ne’e hateten, valor hirak ne’e timoroan tenke rekoñese, tenki iha humildade no modestia hodi rekoñese MVC ninia kontribiusaun ba politika Timor-Leste nian no ohin loron ema hamosu ema barak tebes ne’ebé asumi kargu iha orgaun soberania haat ne’e sai hanesan parte ida husi rezultadu MVC ninia esforsu ba prosesu libertasaun Timor-Leste nia Independénsia no ba timoroan nia moris di’ak.

Iha seremonia posse Prezidenti Republika, Francisco Guterres “Lu-olo”, xefi estadu foun ne’e mos antes hahu nia deskursu dahuluk nudar xefi estadu fo sentidu kondelensia ba familia MVC nudar homenazem espesial ba MVC ne’ebe fila hikas ona ba Kadunan Santu.

Matebian Mario Viegas Carrascalao ho ia espoza Maria Helena wainhira hasai foto ho eis Prezidenti republika Taur Matan Ruak hafoin simu kondekorasaun ba Colar de Ordem Timor-Leste, iha Palacio Prezidensial Aitarak Laran, Dili, 18 Maiu 2017. Photo Gabinete Presidencia Republica

Antes ne’e, loron ida antes nia mate, iha 18 Maiu 2017, MVC hetan kondekorasaun hosi estadu hodi simu medulla Colar Ordem de Timor-Leste ne’ebe fo hosi eis Prezidenti Republika, Taur Matan Ruak antes remata nia mandatu nudar xefi estadu.

“Enj. Mário Carrascalão hetan respeitu hosi Timoroan hotu-hotu no merese ita hotu nia rekoñesimentu,” dehan Taur Matan Ruak iha nia deskursu hafoin fo kondekorasaun, tuir komunikadu imprensa ne’ebe Gabinete Prezidenti Republika publika.

Eis PR Taur Matan Ruak hateten, nu’udar onra boot ida ba Prezidente Repúblika hodi, lori Estadu no povu Timor-Leste nia naran, fó kondekorasaun ba sira-ne’ebé fó sira-nia an tomak ba nasaun no povu Timor-Leste. Ita-nia istória nakonu ho ezemplu di’ak kona-ba apoiantes ne’ebé luta ba Moris-Di’ak no Justisa iha ita-nia rain doben no ba ita-nia povu doben Timor-Leste.

Ida-idak fó ninia kontribuisaun liuhosi meius ne’ebé de’it, hodi alkansa objetivus aas liu hosi ita-nia destinu nu’udar nasaun. Kualidade vida, edukasaun no moris-di’ak bele konsidera hanesan rai-bokur ne’ebé hamoris hanoin livre, kriatividade no kultura. Aspetu tolu ne’e mak ita-nia kilat durante ita-nia luta naruk ba libertasaun nasionál.

“Enj. Mário Carrascalão komprende no hatudu ba ita hotu katak luta libertasaun nia objetivu la’ós buka glória pesoál ka koletivu nian. Objetivu mak ema – hadi’ak sira-nia kondisaun moris, hadi’ak sira-nia nutrisaun, hadi’ak kondisaun ijiene, no fó asesu ba saúde no edukasaun. Só povu ida ne’ebé hetan kondisaun moris ne’ebé di’ak, ne’ebé iha asesu ba edukasaun no kultura, mak bele sobrevive no bele moris loloos iha liberdade,” dehan eis xefi estadu ne’e.

Ne’e duni, mezmu durante tempu okupasaun, Enj. Mário Carrascalão, nu’udar Governadór iha momentu ne’ebá, sempre defende Timor-Leste no Timoroan sira.

Nia nunka lakon esperansa ba pás, tanba ne’e maka nia promove konversasaun pás entre forsa okupante no gerrilleiru sira, aleinde luta ba kondisaun moris Timoroan sira-nian.

Edukasaun hetan progresu boot ida durante Sr. Enj. Mário Carrascalão nia tempu, liuliu edukasaun superiór liuhosi konstrusaun primeira universidade iha Timor-Leste. Através Enj. Mário Carrascalão, joven estudante barak hetan oportunidade atu bá estuda iha rai-li’ur no ohin balun figura naran-boot hosi ita-nia Estadu.

Territóriu nia abertura ba li’ur, ne’ebé promove hosi Sr. Enj. Mário Carrascalão, fó vizibilidade boot liu ba Timoroan sira-nia terus no mós ba aspirasaun povu nian ba luta ba libertasaun nasionál. Vizita istórika hosi Sua Santidade Amu-Papa João Paulo II fó aten-barani ba Timoroan sira no vizibilidade ba justisa hosi ita-nia luta. Ninia reasaun ba Masakre Santa Krús merese ita hotu nia rekoñesimentu.

Dezde tranzisaun ONU nian, Enj. Mário Viegas Carrascalão sai hanesan lian ida ne’ebé ativu hodi defende Timoroan sira. Nia hanesan figura importante ida iha Parlamentu Nasionál, Governu no iha nia moris síviku iha defeza ba sidadaun sira no mós iha luta hasoru problema boot liu ida iha ita-nia tempu, katak korrupsaun.

“Ha’u hein katak ita-nia ukun-na’in sira sei buka inspirasaun iha ninia ezemplu dedikasaun ba defeza Timoroan sira-nian, liuliu povu mukit no kbiit-laek sira,” dehan Taur Matan Ruak.

Tuir planu, estadu sei lori mate isin MVC hodi hakoi iha Jardim de Heroi hodi rekonese matebian nudar mos eroi ba Timor-Leste durante prosesu luta ba libertasaun nasional no durante prosesu ukun rasikan nian.

Fotografia ikus matebian Mario Viegas Carrascalao ho nia espoza Maria Helena ho nia oan Pedro Carrascalao. Photo: Facebook Pedro Carrascalao

Oan mane hosi matebian, Pedro Carrascalao ih ania akun Facebook sente lakon tebes ho matebian ne’ebe durante ne’e sai aman, belun no idol ba nia. Iha nia matan, matebian nudar protector povu Timor-Leste.

“Ne’e ita nia foto hamutuk ikus nian, hau senti lakon o, hau hadomi o pai. Hau sei kontinua o nia mehi,” hakerek Pedro Carrascalao iha nia akun Facebook hodi tau foto ikus nia ho MVC nudar nia aman.

MVC moris iha Uai-Talibu, Venilale, Autoridade Munisipiu Baucau, iha 12 Maiu 1937. Eis Segundu Vise Primeiru Ministru iha IV Governu KOnstitusional no eis Deputadu Assembleia Konstituante no Parlamentu Nasional (2002-2007) ne’e iha tempu Indonezia mos asumi kargu Governador wainhira nasaun ne’e tama parte nudar provinsia Indonesia ho naran Timor-Timur. Kargu nudar governandor provinsia nian, nia kaer hahu 18 Setembru 1983 to’o 18 Setembru 1992.

Iha 1993-1997, nia hetan konfiansa hosi eis Prezidenti Republika Indonesia, Soeharto hodi asumi kargu embaixador Indonesia nian ba Rumania. Ikus iha tinan 1998-1999 asumi kargu nudar membru Dewan Pertembangan Agung (DPA).

Editóra: Agida DOS SANTOS I COPYRIGHT@2017

 

LEAVE A REPLY

Please enter your comment!
Please enter your name here