Home nasional PR Lu-Olo Inagura Estatua Xavier do Amaral Nudar Proklamador no PR Dahuluk...

PR Lu-Olo Inagura Estatua Xavier do Amaral Nudar Proklamador no PR Dahuluk TL

393
0
SHARE
Estatua Proklamador no Prizidenti Republika dahuluk Timor-Leste nian, Francisco Xavier do Amaral ne'ebe inagura hosi Prezidenti Republika Francisco Guterres "Lu-Olo", Sabadu (20/05/2017), iha Rotunda Merkado Lama, Caicoli, Dili. Photo: TTN/Fidelio Ramos

By: Fidelio RAMOS

THETIMORNEWS.com, DILI – Maski uluk wainhira ukun I Governu Konstitusional, lideransa Partidu FRETILIN “la-kohi” rekonese Francisco Xavier do Amaral nudar proklamador no prezidenti republika dahuluk Timor-Leste nian, ikus eis Prezidenti Partidu FRETILIN, Francisco Guterres “Lu-Olo” atual Prezidenti Republika (PR) rekonese proklamador independensia Timor-Leste wainhira inagura estatua Franscisco Xavier do Amaral, Sabadu (20/05/2017).

Estatua Proklamador no Prizidenti Republika dahuluk Timor-Leste nian, Francisco Xavier do Amaral ne’ebe inagura hosi Prezidenti Republika Francisco Guterres “Lu-Olo”, Sabadu (20/05/2017), iha Rotunda Merkado Lama, Caicoli, Dili. Photo: TTN/Fidelio Ramos

Estatua Francisco Xavier do Amaral hari’i iha rotunda merkado lama Caicoli, Dili ho liman fuan ida los (parte liman fuan midar) hatudu ba oin no liman karuk kaer sutahan lulun.

Eis Komandante FALINTIL (Forsas Armadas Libertasaun Independenti Timor-Leste), atual Ministru Planeamentu Investimentu Estratejiku (MPIE), Kay Rala Xanana Gusmao iha nia deskursu hateten, Francisco Xavier do Amaral mak proklamador independensia Timor-Leste no Prezidenti Republika dahuluk Timor-Leste nian.

“Hau Hamrik iha ne’e hodi hamutuk ita nia aman (Francisco Xavier, red.) hodi presta omenagen ba proklamador no primeiru prezidenti republika timor-Leste,” dehan Xanana.

Nia esplika mos katak, iha 20 Maiu 1974, Francisco Xavier do Amaral hetan konfiansa hodi sai prezidenti Frente Revlucionariu Timor-Leste Independenti (FRETILIN) hodi hamutuk ho matenek nain sira lori Timor-Leste ba ukun rasik an.

“Iha 20 Maiu hili Xavier ba prezidenti FRETILIN, nia reprezenta povu tomak ba prosesu (luta) ukun rasik an,” dehan Xanana. “Ita tenki hakruk ba Xavier, Mari (Alkatiri), Horta, Mauhuno ho sel-seluk tan luta nain, tamba sira mak fundador”.

Nudar komandante iha luta libertasaun durante tempu colonial Indonesia, Xanana Gusmao mos kestiona kona ba loron proklamasaun independensia ne’ebe proklama iha 28 Novembru (1974), maibe nunka halo selebrasaun iha loron refere.

Seremonia inagurasaun estatua Proklamador Francisco Xavier do Amaral hahu ho hamulak hos ilia nain Turiskai sira fatin Francisco Xavier do Amaral moris no ikus PR Lu-Olo inagura ho asinatura iha plaka fatuk marmer iha estatua nia oin.

Seremonia inagurasaun ne’e hetan partisipasaun barak hosi komunikadi Kapital Dili no komunidade balun ne’ebe mai hosi rai moris Proklamador Francisco Xavier do Amaral.

Reprezentante husi familia Proklamador Francisco Xavier Amaral, Fernando Araujo hatete Timor Leste  nasaun ida ne’ebe kmanek mak  nia aswain sira ne’ebe luta ba ukun rasik an.

“Nasaun TL kmanek mak ita nia aswin sira, i ohin ita halibur hamutuk iha ne’e atu inagura ita nia estatua saudozu Francisco,” dehan hatete Fernando Araujo.

Proklamador Francisco Xavier do Amaral hanesan oan ikun hamutuk maun alin nain ne’en oan husi Afonso Mosquita no Aurea Rodrigues Perreira moris iha aldeia Raeleten, Suku Kaimaukik Postu Administartivu Turiskai,  Munisipiu Manufahi.

Saudozu ne’e iha tempu uluk nia hahu harii nia eskola ida  hodi sai hanesan mestri hodi  hanorin maluk timoroan sira.

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here