Home nasional PR “Loke Vaga” ba Nia Kandidatu Deputadu

PR “Loke Vaga” ba Nia Kandidatu Deputadu

66
0
SHARE

By: FIDELIO RAMOS

THETIMORNEWS.com, DILI – Wainhira maioria Partidu Politiku ne’ebe ejisti iha Timor-Leste laiha fatin ona ba ema seluk atu tuur iha sira nia lista kandidatu ba Membru Parlamentu Nasional (PN), Partidu Republikau (PR) mosu ho oinseluk, PR “loke vaga” ba nia kandidatu deputaduPN atu hamutuk ho partidu ne’e reprezenta iha uma fukun periodu 2017-2022.

“Vaga” Deputadu ne’ebe PR loke ne’e publika ona iha media imprimi balun desde semana rua liu ba.

Objektivu PR “loke vaga” ne’e atu konvida ema intelektual nune’e bele sai deputadu PR nian hodi lori aspirasaun povu koalia iha uma fukun PN.

“Ami presiza ema nain 10 atu kandidatu, mais kuandu sidadaun ne’e priense kriteria tuir buat ne’ebe ami anunsia, entaun ami bele desloka nia ba kompete iha Eleisaun Parlamentar sira ne’ebe ho tinan 17 ba leten, karik hakarak mai kandidatu iha  Partido Republikanu tenki ho  kapasidade,  ami nia partidu fo oportunidade ba ema hotu laos ba deit estrutura,”  dehan Vise Sekretariu Jeral asuntus administrasaun  operasaun PR, Venancio Saramento ba THETIMORNEWS iha Sede Nasional PR, Vila Verde, Dili, Kinta (18/05/2017).

Venacio esplika, misaun no vizaun husi PR nian mak hakarak oinsa povu nia moris atu sai diak hotu.

“Bainhira iha eleisaun, PR hetan konfiansa husi povu, ami hare liu ba prospieridade povu nian atu hadia no loke kampu traballu ba jovem sira atu hadiak ekonomia,” dehan Venancio.

PR hari’i iha tinan 2012 hosi Dr. João Mariano Saldanha ne’ebe to’o ohin loron kontinua asumi kargu nudar prezidenti partidu nian.

Ho Eleisaun Parlamentar tinan ne’e, hamutuk dala 3 ona partisipa iha Eleisaun Parlamentar (ElPar). Iha ElPar tinan 2007, PR hetan deit votos 4.408 ou 1.06%. Tuir fali iha ElPar 2012, PR nia votos tuun kuaze 138 votos hodi hetan deit votos 4,270 ou 0,91%.

ElPar 2017 sei halao iha 22 Jullu, tuir kalendariu STAE nain, hahu 20 Junu to’o 19 Jullu partidu politiku sira sei halao sira nia kampana politika hodi hato’o sira nia programa ba eleitor sira.

Dadauk ne’e hamutuk iha ona 31 partidu politiku ne’ebe sei kompete iha ElPar 22 Jullu, inkliu Bloku Unidade Popular (BUP) ne’ebe kompostu hosi partidu politiku 4 (PMD, PARENTIL, PLPA no PDRT).

Editóra: Agida DOS SANTOS I COPYRIGHT@2017

LEAVE A REPLY

Please enter your comment!
Please enter your name here