Home desportu FFTL Hili Kim Shi-Hwan ba Treinador SelNas U-23

FFTL Hili Kim Shi-Hwan ba Treinador SelNas U-23

349
0
SHARE

By: Hortencio Sanches

THETIMORNEWS.com, DILI – Federasaun Futebol de Timor-Leste (FFTL) hili ona treinador klubu AD. SLB, Kim Shi Hwan hodi sai treinador Selesaun Nasional (SelNas) U-23 ne’ebe sei kompete iha AFC Championship U-23 no SEA Games 2017.

Treinador selesaun nasional U-23 Timor-Leste, Kim Shi Hwan hosi Koreia Sul ne’ebe FFTL hili ona koalia hela ba media iha konferensia imprensa, Sexta (05/05/2017), ih FFTL House Kampu Demokrasia Dili. Photo: TTN/Hortencio Sanches

“Mister Kim mak sei kaer selesaun U-23 ba joga iha AFC Championship ho SEA Games,” dehan Osorio Florindo, Prezidenti Interinu FFTL ba TTN, Sexta (05/05/2017), iha Edifisiu FFTL House, Kampu Demokrasia, Dili.

Ossorio esplika, eventu rua ne’ebe selnas U-23 ne’e sei partisipa mak ba joga iha Vietnam (AFC Championship) no Kuala Lumpur-Malaysia (SEA Games).

Dezisaun FFTL hili nia sai treinador selnas, Kim Shi Hwan senti orgullu bele hetan no la fasil hotu ba nia hodi asumi knar ne’e. Ho knar ne’ebe FFTL fo ba nia, nia sei esforsu hodi bele fo rezultadu diak.

“Hanesan Treinador husi ekipa Nasional nian, hau iha hanoin ona oinsa para bele lori ekipa nasional ida ne’e bele fo rezultadu diak no hau mos sei loke oportunidade ba maluk sira hotu ne’ebe hakarak fo sujestaun hodi ajuda hau dezenvolve futebol iha Timor – Leste,” dehan Kim ba jornalista sira iha konferensia imprensa, Sexta (05/05/2017), iha FFTL House Kampu Demokrasia, Dili.

Nia hatutan, ema hotu presija atu troka hanoin kona ba sistema futebol ne’ebe agora halao hela iha Timor – Leste.

“Ita hotu presija halo investe makas iha infrastrutura futebol nian tanba loron ba loron futebol iha mundu mudansa makas tanba ema iha liur halo investe makasa tebes iha infrastrutura entaun ita mos tenke tuir sistema (fluxu) ida ne’e,” tenik nia.

Atu halo dezenvolvimentu futebol iha tempu badak nia laran tuir nia, labele tanba Timor – Leste seidauk iha kondisaun ne’ebe mak diak tenke presiza fo treinu no eduka diak liu ba treinador sira atu nune’e bele hanorin jogador sira ho lolos no presiza kria kria tan fatin diak ba jogador sira.

“Jogador sira mos tenke disiplina tama treinu tuir oras barak liu tan tinke aprende mos husi nasaun dezenvolvidu sira nia sistema ne’ebe agora daudaun lao hela.

Nia hatutan ho esforsu de’it labele halo dezenvolvimentu iha nasaun ida ne’e, presiza mos halo investementu ida ba ida atu nune’e bele to ba faze ne’ebe mak Timor – Leste hakarak no fiar katak se ema hotu iha unidade ne’ebe mak diak hodi dezenvolve futebol iha rai ne’e loron ida sei sai Modernu hanesan mos nasaun seluk sira.

“Hau sei hakas an liu tan, atu fo treinu jogador sira ho diak hanesan durante ne’e hau hatudu ona no hau hatene katak hau laos perfeitu tanba ne’e hau husu mos ba maluk sira hotu, atu ita bele ajuda hau para bele lori futebol Timor – Leste nian ba oin,” dehan Kim.

Tuir orariu AFC nian iha 17 Jullu ba U- 23 nian no sei iha mos kompetisaun SEA Games hahu iha 19 Agostu tinan ne’e nia sei hili jogador husi Klubu 23 ne’ebe mak agora daudaun kompete hela iha Liga Futebol Amadora (LFA) atu bele ba tuir kompetisaun rua (2) ne’e.

Maske ekipa Nasional Timor – Leste nian ne’ebe mak agora nia atu kaer sei frakeza iha parte barak maibe nia husu ba maluk Timoroan hotu fo suporta nafatin ba nia no ekipa ne’e bele halo morin Timor nia naran.

Nune nia mos husu ba ofisial husi Liga Futebol Amadora (LFA) no treinador ekipa ida-idak atu fo lisensa ba jogador sira ne’ebe mak nia hili atu bele ba treinu iha Koreia durante loron 20, ida ne’e mos atu hasae kapasidade  jogador nian atu hodi bele haforsa mos ekipa ne’ebe mak sira joga ba.

Editór : João DA COSTA I COPYRIGHT @2017

 

LEAVE A REPLY

Please enter your comment!
Please enter your name here