Home politik Deskursu Kompletu Prezidenti Partidu CNRT, Xanana Gusmao iha Abertura Kongressu Nasional Datoluk

Deskursu Kompletu Prezidenti Partidu CNRT, Xanana Gusmao iha Abertura Kongressu Nasional Datoluk

171
0
SHARE
Prezidenti CNRT, Kay Rala Xanana Gusmao. Photo: FB / Julio Goncalves

Caros Companheiros Congressistas

Caros Companheiros

            O Secretario-Geral

            O Presidente da CDN

            O Presidente da CPN

            Os Delegados dos Municipios

Ex.mos Senhores Convidados e Observadores

            da Direcao Central do Partido FRETILIN

            da Direcao Superior do Partido Democratico

            da Direccao Superior da Frente Mudanca

Ex.mos Senhores

            Representantes das Missoes Diplomaticas

            Representantes de Agencias Internacionais

            Representantes da Sociedade Civil e da Imprensa

Ho sentimentu ksolok nebé espesiál tebes, maka nudár Presidente Partido CNRT, ha’u hato’o boas-vindas kmanek ba Konvidadus no Observadores, nasionais no internasionais, bele mai abertura III Kongresu partidu nian, nebé, horiseik, dia 24 de Abril, halo nia tinan sanulu ba nia moris.

Ba kuadrus tomak partidu nian, iha fatin ida ne’e, ha’u nia apresu bot no klean ba imi nia esforsu politik makas, nebé halo iha ita nia sosiedade nia let, durante tinan sanulu, nudár partisipasaun bot tebes ba konstrusaun ita –nia estadu.

Hori uluk kedan, ha’u nia konviksaun duni katak, povu Timor-Leste hatudu ona ninia virtude, ka buat diak ruma, virtude ne’e maka ida deit – kbit atu, husi prosesu hotu nebé nia liu ona no ba tempu ida-idak nia prosesu sira ne’e nia laran, bele hala’o bei-beik análize kritika ba sa-ida maka nia halo tiha ona, lisoens sa-ida maka nia aprende husi errus ka susesus, nomos sa-ida maka nia tenke kurizi no tenke hadiak.

Ba prosesu hotu-hotu, atu polítiku ka sosiál ka ekonómiku, ninia dezenvolvimentu sempre dinámika, katak laiha prosesu ida nebé la’o los de’it, tanba prosesu ne’e nakonu ho kontradisoens, ka ita bolu dezafius ka difikuldades, ka problemas, nebé sai hanesan motor ba prosesu ne’e nia dezenvolvimentu rasik.

Prosesu hotu-hotu mos depende tebes ba fatores importantes rua, nebé ita bolu internu no esternu, no fatores rua ne’e maka sei fasilita ka sei impede prosesu ida atu bele moris, la’o no haboot-an. Fatór internu, nebé sai hanesan nia isin no ran, maka determina prosesu ne’e atu dezenvolve.

Fatór esternu, katak husi liur ba nia an-rasik, nebé halibur komponente ka elementus oin-oin, nebé mos ita bolu kondisionante de’it, bele, iha tempu konkretu balun ba prosesu ne’e, fo influensia maka’as ba dezenvolvimentu prosesu ne’e nian, influensia nebé bele pozitivu ka ajuda hakbit no haboot bele negativu ka difikulta no bele mos hamate.

Ha’u hahú ha’u-nia intervensaun hanesan ne’e, atu ita hotu bele kompreende tanba-sa maka, tinan 10 liuba, ita hari Partidu CNRT no atu, iha 2017, ita bele mos sukat no tetu Partidu ne’e, ohin loron, iha ninia saúde ka kondisaun psikolójiku no moral, iha ninia kapasidade polítika no iha ninia vontade atu haboot-an, hodi servi Nasaun no Povu diak liu.

Nune’e, iha debates nebé ita sei hala’o iha kongresu ne’e, maka ita sei buka atu kompreende fatór internu ba dezenvolvimentu Partidu nian rasik no fatores esternu nebé bele duni kontribui ka lae ba prosesu dezenvolvimentu Partidu nian.

Kompaneirus Kongresistas

Senoras no senores

Permite ha’u, kompaneirus no konvidadu sira, atu halo análize polítika ida kona-ba ita-nia Rain.

Ita hotu hatene, iha 20 de Maiu mai ne’e, ita halo tinan 15, iha nebé destinu Timor-Leste no ninia povu iha tomak iha ita-nia responsabilidade.

No ita sei selebra loron bot ida ne’e, ho tomada de pose ba Prezidente da Republika dahaat. Hodi partidu CNRT nia naran, ha’u felisita Dr. Francisco Guterres Lu-Olo no husu ba nia hala’o didiak ninia mandatu tinan lima no tane as valores konstitusionais, hodi hatudu ba ita-povu no ba mundu tomak katak Timor-Leste sai duni ona husi frazilidade no rezilensia, katak metin liután ona.

Ita bele hanoin katak, tanba estrutura superior ita-nia estadu nia funsiona hela, buat hotu-hotu la’o ho diak ona, ka, katak ita-nia estadu, estadu ida que forte ona. Laos simples hanesan ne’e, tanba, iha prosesus politikus, estruturas estadu nian bele mesak furak maibé fatór umanu importante teb-tebes, ne’e duni estrutura sira ne’e presiza tebes ajentes nebé bele, ho seriadade, ho étika no sentidu de estadu, halo estruturas sira ne’e funsiona atu kumpre duni objetivus nebé mai husi misaun ida-idak nian.

Iha ona segundu kongresu, iha 2011, partidu CNRT asume kedas ona kompromisus de asaun, katak, kompromisu atu hala’o, liu-liu iha apoiu ba dezempeñu nebé tenke diak liu iha setór justisa nian no ba reforma iha instituisoes estadu nian, nune’e mos atu hatur orden juridika nebé hasoru malu ho realidade konkretu no espesifika país nian no, ikus liu, atu ajuda povu no sosiedade atu entende didiak konseitu soberania, hodi nune’e Timoroan tomak bele hamutuk, ida de’it, iha batalla foun hodi defende soberania nasionál.

Bain-hira prosesu ida foin forma ka harii, hahú ne’e sempre kompleksu, difisil no, dala ruma, halo kanek no moras.

Iha tinan 2000, sosiedade Timorense nia isin-lolon, nebé nakles hela rohan ba rohan ho memórias husi konflitu ida naruk, hasoru todan bot ida, psikolójiku no polítika, husi funu nebé foin hotu, iha ninia esforsu estraordináriu nebé, husu ba hotu-hotu atu kura kanek sira nebé sei senti hela iha nia laran. Sosiedade Timoroan rasik mos hatán hodi hahú halo reflesaun onesta no seria, kona-ba sakrifisius nebé simu iha funu laran, nomos bain-hira hatudu apoiu bot tebetebes ida, ba knar nebé todan bain-hira estabelese komisaun akolhiamentu, verdade no rekonsiliasaun.

Ita hahú ita-nia prosesu demokrátiku ho elisoens dauluk, iha 2001, ba asembleia konstituante, ho partidu 12 nebé tur iha lejislatura parlamentu nasionál nian, iha ita-nia istória, hahú 2002 to’o 2007.

Iha kedas 2004, kompriensaun nebé lalos kona-ba demokrasia no direitu, halo ita la konsege evita pratika ka asoens nebé la kontrola ona, husi grupus balun iha ita-nia sosiedade laran, nebé ejize katak buat hotu-hotu tenke mosu kedan ona atu hatán ba ejijénsia nebé mai husi sira, nebé sente kata iha direitu liu, tanba sira maka terus liubá ukun-an ne’e.

Mentalidade nebé la los ne’e, hanesan fatór normal sosiedade nebé foin sai husi konflitu, hamosu oportunidade diak tebes ida ba atores husi rai liur, nebé, tempu nebé, namkari hela iha ita-nia, rai-laran, no halao hela influensia ba segmentu sosiedade nian nebé fraku ka vulneraveis, hodi, iha 2005, provoka manifestasoens kuaze lor-loron atu azije fali, hanesan prioridade nasionál ida, hanorin obrigatóriu relijiaun iha eskolas.

Hodi hare ba buat sira ne’e hotu, ita tenke dehan katak konsekuénsia ka impaktu nebé at tebetebes husi krize polítiku-militar, iha 2006, tanba deit desizaun nebé lalos husi ierarkia aas F-FDTL nian, ho ajentes rai-liur nia involvimentu, maka hatudu momos kedan vulnerabilidade bot tebes husi setores oin-oin iha ita-nia sosiedade laran.

Iha krize laran, sosiedade Timoroan, liu-liu iha setór polítiku, maka konsege hatudu kbiit atu hare didiak ba kauzas nebé hamosu dezastre polítiku-militar ne’e, hodi la konsege evita ka hamenus konsekuensiais nebé lamentaveis tebes to’o ema balun mate, barak lakon sira nia beins no rihun liu atus ida maka sai husi uma, ho nune’e destroi ka halakon tiha harmonia sosiál iha país.

Krize ne’e prova konkreta ida ba kbiit la’ek, husi ita rasik, atu kurize tiha errus nebé, ita hotu devia asume, hanesan koletivu ida nebé involve direita ka indireitamente iha krize ne’e, hodi husu fali komunidade internasionál atu interven, hodi hatudu tan fatór seluk iha ita-nia realidade, hanesan rai nebé foin sai husi konflitu – fatór ne’e maka dependénsia ka entrega fali intereses nasionais ba ema seluk nia liman.

Iha situasaun difisil kona-ba hahú prosesu ne’e, ho problemas ona, iha ita-nia kaer rasik kuda talin, ka independénsia loloos ba ita-nia hahalok no ita-nia knar, maka Timoroan balun hahú halibur hanoin no mobiliza esforsus atu, ikus mai, deside kria Kongresu Nasional ba Rekonstrusaun Timor nian, nudár partidu polítiku ida ho ninia persepsaun nebé klara kona-ba realidade pos-konflitu, ho kapasidade atu buka solusoes imediata ba problemas balun no ho vizaun nebé diak liu ba futur ita-nia rain nian.

Rekonstrusaun – la signifika los deit rekonstrusaun fízika país ne’e nian; rekonstrusaun signifika liu-liu definisaun ida nebé los kona-ba relasionamentu ka komportamentu foun ida iha tesidu sosiál ita-nian povu nian; rekonstrusaun mos signifika katak asume obrigasaun ida hodi muda mentalidade ema nian ba diak; rekonstrusaun signifika atu hari fila fali konfiansa no hadi’a kapasidade atu hanoin, hametin vontade atu halo ho diak no kompromisu atu hare ba futuru!

Ida ne’e maka baze fundamental hodi kria partidu polítiku, hanesan CNRT! Tanba moris husi povu nia terus nebé badak maibé todan ne’e, hanoin polítiku nebé sai hanesan mata dalan ba CNRT maka: “Liberta tiha ona Patria, agora tenki liberta povu”!

Tanba libertasaun patria ezije tiha ona ba povu sakrifisius nebé sura la hotu, kompromisu polítiku CNRT nian maka, sei la lori tan povu ne’e ba sakrifisius deznesesarius ka nebé loloos labele.

Nune’e, povu tomak labele haluha tiha krize ne’eba komando F-FDTL tempu nebé provoka, hodi nune’e ita hotu tenke impede bele akontese tan iha loron ikus, iha tempu badak ka tempu naruk, atu labele halo povu sofre dala ida tan. Partidu CNRT rasik sei matan mos, hodi antesipa labele mosu konflitu foun, liu-liu ho kilat, hodi estraga populasaun no populasaun nia soin, konflitu nebé sei enfrakese deit Estado independente RDTL!

Buat ida tan ha’u hakarak bolu atensaun, maka, tuir análize objetiva ba krize 2006, nebé veteranismu infantíl husi Timoroan balun provoka ne’e, ita mos hare fatór esterna (ka husi rai liur) maka aproveita liu hodi hamihis tiha ita-nia soberania. Loloos kedas hanesan iha tempu funu, nebé rai bot balun, hodi nega tiha valor nebé universais, konkorda fali ho ita nia povu nia terus no mate, atu hadau povu nia riku soin.

Iha kontestu istóriku 2006 nian, maka CNRT, hanesan partidu polítiku, mosu atu bele partisipa ativamente iha partisipa ativamente iha Rekonstrusaun país no ba libertasaun povu! Kuandu temi hakarak “Liberta povu”, ne’e katak iha duni ona” Vizaun ida ba longu prazu”, hodi bele orienta povu ne’e ba dalan nebé nia bele hatán loloos ba ninia nesesidade tomak!

Tanba atu “Liberta povu” ezije, uluk liu, “Konesimentu profundu ka klean ba realidade sosiál no ekonómika povu ne’e nian”, hodi bele formula ka hasai dalan ida, objetivu no realista, hodi muda neineik povu nia kondisaun moris.

Nune’e “Liberta Povu” labele sai “slogan” baratu ida, tanba so bele mai husi “vizaun nebé klara kona-ba prioridades país nian no nesesidades bazikas populasaun tomak nian”.

Kompaneirus

Senoras no Senores

Tinan sanulu ona maka partidu halo parte iha governus oin-oin nebé mosu. CNRT lakohi bolu ba nia an rasik papél boot ruma, karik iha mudansas balun ne’ebé akontese tiha ona iha ita-nia Rain, tanba CNRT konsiente tebes katak, se laiha partisipasaun, direta ka indireta, husi sidadaun hotu-hotu, ita lakonsege hetan rezultadus diak sira ne’e, no CNRT mos hatene katak dezenvolvimentu Rai ida nian, ne’e knar ida ba médiu no longu prazu, tanba laiha dezenvolvimentu maka mosu iha tempu badak tinan sanulu deit. Iha mundu, la iha país ida bele halo iha tempu badak, husi Amerika ba Europa, husi Asia ba Afrika.

Uluk liu, maka ita hatudu konsege duni hatur estabilidade iha Rai-laran, no fatór ida ne’e importante tebes duni, tanba, se laiha estabilidade, la iha seguransa, no la iha harmonia sosiál e, liu-liu, la iha estabilidade polítika.

Tuir mai, la justu se la iha kedas ema ida rekoñese katak infrastrutura bázika balun, nebé iha ona, benefisia daudauk ita nia povu, hodi fo konfiansa boot liu kona-ba futuru.

Bain-hira koalia kona-ba dezenvolvimentu, ita koalia kona-ba areas lubuk ida, iha nebé esforsu husi sei deit maka kaer Governu, tenke bazeia ba definisaun nebé koreta, ka prioridades, atu husi solusaun gradual iha area ida ka areas balun bele kria kondisoens diak liután atu implementa area sira seluk.

Kaer ukun laos atu halo deit! Kaer ukun ezije liu-liu koñesimentu nebé los kona-ba realidade, ezije análize nebé diak kona-ba sa-ida maka prinsipál bele fo benefísiu ba hotu, nomos ezije katak hahalok nebé hasai tenke konsistente ho mos ezije esforsu atu kurize.

Justu tebe-tebes atu rekoñese katak, hahú kedas 2009, Komunidade Internasional hatudu konfiansa boot tebes ba atus ka hahalok husi Governu no mos mosu daudauk fiar husi investidores estranjeirus.

CNRT sei la buka atu hasai lista boot ida, hodi husu ba nia an-rasik papél nebé relevante iha korresaun gradual no beibeik husi autores oin-oin ba dezenvolvimentu nasionál, liu-liu kona-ba setór privadu, nebé hahú ho kbiit laek tebes no ladún responsavel, hodi hetan no asume konsiénsia diak liután kona-ba ninia parte iha responsabilidade atu harii sosiedade no harii ita-nia Rain.

Nudár parte ida ba iha Governus nebé mosu iha tinan hirak ne’e, CNRT sempre haka’as-an atu buka define pratikas lolos ba administrasaun publika ida ke tenke diak no, maski rekoñese avansus boot iha departamentus Estadu nian balun, konkorda mos katak buat barak se iha atu hadi’a.

Nune’e, CNRT fo atensaun maka’as ba rezultadu ba sensus nebé, tempu ba tempu, hatudu loloos dadus nebé krediveis kona-ba ita-nia sosiedade nia moris.

CNRT la afirma katak buat hotu diak ona, maibé CNRT mos labele dehan katak buat hotu at nafatin ka seidauk halo buat ida iha Rai ida ne’e, ka buat hotu nebé halo ona la fo liu benefísiu ba ita-nia povu.

CNRT la simu prinsipiu nebé sala hodi tau Rai hotu-hotu iha kaut ida deit, hodi sukat sira tomak ho sasukat hanesan, hodi la konsidera diferensa boot entre Rai dezenvolvidu ida, ho tinan atus ba atus ona, ho fali Rai foun ida ho deit tinan 15.

CNRT defende prinsipiu katak Timoroan sira tenke sai atór ba ninia polítika rasik e lalika ona hakru’uk demais ba relatorios internasionais, nebé dehan deit ka repete hela deit buat hanesan ba Rai hotu-hotu nebé seidauk dezenvolvidos, husi padraun ida deit kona-ba solusaun hanesan ba Rai hotu-hotu, hodi la ajusta ba realidade ka espesifisidade Rai ida-idak nian.

Ita mos sei debate materias sira ne’e iha Kongresu laran, hodi ita hotu bele hetan hanoin diak ba sa-ida maka bele halo iha loron ikus.

Kompaneirus Kongresista

Senoras no Senores

Permite ha’u atu lori ita boot sira hateke oituan ba mundu.

Mundu ida nebé ita bolu globalizadu ne’e, ohin loron, enfrenta momentus difisies liu iha Istoria moderna. Funu, konflitus iha Rai ida-idak nia uma-laran no atus extremistas, bombas ho terrorismu maka sai notísia loro-loron nian. Sa-ida maka ita hare maka: rasizmu, xenofóbia katak hakribi ema husi Rai-seluk, diskriminasaun, dezesperu, raiva ka hirus maka’as, odio no hakarak halo vingansa ka hatán kedas ho atus violénsia! Buat ne’e hotu nebé hatudu sentimentu, ka hanoin ka hahalok, at liu nebé umanidade bele iha, ida ne’e hotu sai deit hanesan reflex ka rezultadu ba politikas nebé sala, husi sentrus bo-boot nebé hasai desizaun ba mundu.

Klima nakonu ho insertezas politikas maka la’o hela iha Europa, hodi hatudu katak povus, husi rai ida-idak, la fiar tiha ona sistema nebé hatur buat hotu-hotu no mos la fiar liután ba retorika ka liafuan mamuk nebé la konsege hamenus problemas iha mundu. Ekonomia, iha Europa rasik, nebé la konsege evita katak sira nia ema barak tebes moris iha kondisaun at ba bei-beik, ekonomia ida nebé hasoru mosu krize konfiansa entre potensias bo-bot sira, hatudu deit ba ita, iha Timor-Leste, katak ita tenke realista kona-ba ita-nia prosesu dezenvolvimentu rasik.

Iha kontinente Amerikanu, difikuldades ekonomikas nebé fo dalan ba problemas sosiais no politikas, iha Rai bara-barak, fo hanoin deit mai ita, Timoroan sira, katak iha mundu nebé nakonu ho dezafius oin-oin, ita, Timoroan, maka tenke hamriik hodi sama metin ita nia rai leten, atu, nune’e, ita labele monu ba tentasaun atu mehi aas liu, hodi buka hanoin katak buat hotu-hotu bele mosu derepenti deit ka bele halo milagres iha rai ida ne’e.

Iha médiu oriente, hahú kedas ho invazaun ba Irake tinan sanulu resin liubá, maka ita bele hare nakfera ona ho funu mesak bo-bot deit, iha nebé potensias bo-bot, tantu rejionais komu mundiais, la konsege subar sira nia hakarak atu manán funu, liu deit husi kbiit militár, hodi nune’e impoin sira nia intereses, la hare ba terus husi millioens ema sivis nebé inosentes.

Iha Afrika, kontinente ida nebé hamlaha, moris at no moras sai deit hanesan problema kiik, tanba iha ne’eba paizes barak maka hetan problemas ho konflitu etnikus ho relijiozus. Ha’u to’o ona iha Rai balun, nebé ukun-an liu ona tinan 40, balun liu ona tinan 50, maibé Estadu rasik seidauk ka la funsiona, ho problemas politikus, sosiais no ekonomikus nebé grave tebes, no iha nebé direitus humanus la iha no mos valores demokratikus no justisa nian mos la iha.

Ásia kontinente ida nebé Rai ida-ida la hanesan ho Rai ida seluk, iha kultura, iha lian, no ho passado civilizasaun ida-idak nian nebé marka ka identifika Povu ida-idak. Diferensa kulturál ne’e maka sai orgulhu boot ba Povu ida-idak, maski Rai hotu-hotu la iha grau dezenvolvimentu nebé hanesan. Los duni katak Rai balun enfrenta problemas konkretus ida-idak nian, Asia sei sai hanesan kontinente ida nebé kalmu liu no bele atrai atensaun diak liu, husi liur. Los mos katak iha problemas ho eskala mundiál ona no ita hotu hein katak husi partes hotu-hotu bele laran-malirin, nudár dalan diak liu atu bele mantein paz.

Kompaneirus

Senoras no senores

Ita-nia I lejislatura hahú ho partidus politikus 12 nebé hetan asentu parlamentár hahú husi 2002 to’o 2007. Iha II lejislatura, númeru partidus politikus iha parlamentu nasionál tun tiha ba 8, no iha III lejislatura, husi 2012 to’o 2017, partidus politikus 4 deit maka hetan reprezentatividades iha Parlamentu.

Ita mos hare, iha tinan hirak ne’e nia laran, katak husi ita nia sosiedade iha vontade boot tebes atu harii tan partidus foun. Husi sorin ida, ita bele dehan karik iha duni ansia atu partisipa iha konsolidasaun demokrasia iha ita-nia Rain. Iha pontu de vista polítiku, ita la konsege hare partidus foun bara-barak hanesan nesesidade ida atu fo resposta nebé diak ba konstrusaun Estadu. Liu-liu ba partidus oan sira nebé lori fali ha’u nia naran ba habosok povu, katak Maun Boot mak haruka!

Husi análize, nebé karik subjetivista duni, bain-hira ita koalia kona-ba partidus politikus, ita bele hanoin katak Povu ida ne’e afirma tiha ona, katak hatudu tiha ona, ninia konsiénsia demokrátika, tanba rezultadu to’o agora maka eleitores sira la hare ba númeru partidus polítikus hanesan prosesu demokrátiku nebé mai fahe povu ho hanoin oin-oin, maibé eleitores sira hare liu ba kualidade hanoin no kapasidade organizativa husi partidus.

Ida ne’e signifika ka bele hatudu katak povu sei hare ba programas dezenvolvimentu nebé partidu sira hakarak no sei la monu ba promesas fura-furak atu muda ka transforma, husi kalan ba loron, kondisoens moris hotu-hotu nian no dala ida deit.

Ohin, ita hahú ita nia servisu kona-ba III Kongresu Partidu nian. Tema ba kongresu ne’e maka: “Konsolida Partidu, hodi Servi diak liu!”. Liafuan ka hanoin “Konsolida”, ne’e katak sa? Konsolida la signifika, uluk no ikus liu, atu kaer metin no aumenta númeru simpatizantes, maibé hanoin “Konsolida Partidu” signifika liuliu aumenta kapasidade partidu nian atu entende didiak asuntus ita-nia Rai nian.

Tanba ne’e, maka importante tebe-tebes atu hatene kona-ba papél ka knar saida maka partidu tenke kaer, iha ita nia Estadu nebé ita hotu hakarak Estadu modernu ida.

Papél ka knar partidu polítiku nian, iha Timor-Leste, iha relasaun ho konstrusaun Estadu, katak knar ne’e mosu husi kapasidade Partidu nia atu tane ho diak aspirasaun Povu nian, nebé hein ka ezije atu hetan resposta nebé diak, liu husi solusoens nebé adekuadas ba realidade no ba nesesidades país nian nudár Estadu.

Papél partidu nian ida seluk, iha sosiedade hanesan ita-nian nebé seidauk dezenvolvidas, koalai kona-ba kapasidade partidu atu formula ka hanoin, análize no trasa dalan lós ida ba dezenvolvimentu sósiu-ekonomiku, liu husi planeamentu nebé integradu hodi hare ba futuru.

Atu ne’e bele akontese, fundamental tebes ba partidu atu eduka-an rasik no, husi ne’e, bele eduka mos sosiedade tomak, liuliu, kamada matenek na’in iha sosiedade laran. Bain-hira koalia kona-ba ‘eduka an-rasik’, ne’e signifika katak partidu tenke kapasita-an atu halo análize nebé objetivas, kapasita-an atu hasai opinioens nebé ho lójika no atu fo sai konkluzoens nebé bele orienta Partidu atu toma desizoens, hodi benefisia povu no país ne’e.

Ho relasaun ba povu tomak em jerál, Partidu iha obrigasaun atu, uluk liu, hato’o informasaun ba Povu ho onestidade kona-ba verdade ba faktus nebé mosu, no nunka bele manipula povu nia sentimentu nem bele promete katak ba problemas kompleksus mos solusaun iha tiha ona, bele rezolve hotu.

No importante mos maka Partidu tenke hatene rona povu nia hanoin, ne’e katak Partidu tenke aprende koñese didiak elementus sosiais no kulturais nebé iha hela iha ita-nia povu nia let, hodi bele hatene populasoens sira-nia aspirasaun. So nune’e mak Partidu bele orienta aspirasoens sira ne’e ba objetivu ida nebé luan liu, no objetivu ne’e maka povu rasik nia moris diak no nia oan ho bei-oan sira nia moris diak.

Materias importantes tebetebes hanesan ne’e mak sei sai mos temba de debate iha kongresu ne’e, nudár preparasaun Partidu nian ba siklu polítiku foun nebé besik ona.

Companeirus

Senoras no Senores sira

Atu Partidu bele hetan kbit ida ne’e, mak Kongresu ida ne’e tenki kria, iha Partidu laran, Departamentus Investigasaun tuir mai ne’e: – Politika no Instituisoens Estadu nian; – Seguransa no Relasoens Internasionais; – Ekonomia no Finansas.

Departamentu ba Politika no Instituisoens Estado iha nia knar atu halo análize nebé ho kuidadu tebes kona-ba polítika iha ita-nia Rain no sei fo mos atensaun ba instituisoens oin-oin Estado nian, hodi nune’e bele akompaña evolusaun setores sira ne’e ho ninia konsolidasaun. Analize nebé halo beibeik sei ajuda Partidu atu hatán ba politikas nebé realístias no konsistentes hodi nune’e bele asegura katak ita-nia Estado tomak sai daudauk ho diak husi frazilidade ba ambiente Estado demokrátiku no soberanu ida nebé metin.

Departamentu Seguransa no Relasoens Internasionais sei iha misaun atu halo estudu profundu iha deit setór defeza, seguransa no Imigrasaun, tanba áreas sira ne’e maka sai sensíveis tebes ba soberania ita-nia Estado nian. Nune’e mos, Departamentu ida ne’e sei buka akompaña mundu nia lala’ok no, husi rejiaun nebé ita pertense, ba rejioens sira seluk iha mundu rai-klaran, akompaña no análiza desizoens husi potensias bobot no mos situasoens oin-oin nebé afeta hela kontinentes oin-oin, hodi ajuda Partidu atu, ho ninia konviksaun rasik, hetan, tetu no sukat opinioens nebé tenke tane ás liu intereses Povu Timor-Leste inan du ke interesses husi fali liur.

Departamentu Ekonomiku no Finansas sei hetan misaun atu mos hala’o estudu permanente no profundu kona-ba ekonomia iha ita nia Rai-Laran, ninia potensiál ba investimentu públiku no privadu, ninia kbiit atu hatama reseitas ba Estado, relasoins nebé tenke hala’o ho Instituisoens Finanseiras husi Rai Seluk, ninia oportunidades ba merkadu rejionál no internasionál, oinsá bele dudu setór produtivu iha ita-nia Rain, hodi fo benefísiu ba ita nia Povu.

Ho hakru’uk tebe-tebes ba opinioens mesak matenek husi expert, nasionais no internasionais, Partidu CNRT tem que pró-ativu liután iha hanoin no, liuliu, iha análize ba konjunturas polítika no sósiu-ekonomikas nebé mosu iha ita-nia Pais, atu evita dependénsia ba hanoin teorikus nebé, dala barak, la ajusta ba ita-nia Realidade. Departamentus tolu ne’e maka sei sai hanesan “Think-Thank” Partidu nian, hodi nune’e CNRT bele kontinua sai nafatin Partidu nebé prontu atu servi no atu servi diak liu tan!

CNRT maka Partidu ida nebé sei enkoraja kresimentu nebé forte husi setór privadu iha Pais ne’e, setór privadu ida ke tenki responsavel no tenke hatudu espíritu empreendedor hodi la haluha atu defende interesses sidadaun timoroan nian. Nune’e, maka, iha ne’e, ha’u lansa apelu ida ba Banku Sentrál Timor-Leste atu prosesa lalais lisensamentu ba investidores nebé husu atu harii 3A Banco de Timor, hodi Pais ida ne’e bele oferese kondisoens finanseiras diak liu tan ba kriasaun empregu, husi setór privadu, nomos hodi ita bele hare ba dook liu to’o rejiaun nebé besik ita.

Kongesu ida ne’e mos sei fo oportunidade atu assuntus sira mosu atu debate.

Kompaneirus

Senoras no Senores

Atu hakotu, CNRT sei kaer metin nafatin ninia polítika atu promove paz iha mundu no rekonsiliasaun entre grupus etnikus ka relijiosus no mos rekonsiliasaun entre Povus no armonia entre sivilizasoens. Grupo nebé hotu hatene ona, g7+, mak sai mos hanesan plataforma ida ba polítika ida ne’e no CNRT sei kontinua ativu iha apoiu ba Rai sira nebé sei frajeis, iha konflitu laran ka sai ona husi konflitu.

CNRT mos sei kontinua ho polítika atu buka adezaun Timor-Leste nian ba ASEAN hanesan oportunidade ba ita nia Pais atu bele hakat áreas oin-oin, iha nebé karik Timor-Leste bele dezempeña papél importante ruma.

CNRT sei kontinua ho polítika boa-viziñansa no kooperasaun ho paises hotu-hotu, husi Asia to’o Pasifiku, no sei respeita asuntus internus país ida-idak nian, hodi husu mos atu relasoins ho Timor-Leste bele hatudu boa-fe ka laran mos no ho prinsipiu hotu-hotu hanesan.

CNRT mos sei kontinua ho polítika relasoens espesiais ho Paizes CPLP nian, no sei fo apoiu tomak ba esforsu sa-ida deit maka mosu atu promove lasus ekonomikus diak liu iha CPLP nia laran, ho Rai sira nebé ita iha relasoins istorikas no kulturais.

CNRT, Partidu ida nebé sei defende maka’as nesesidade diálogu entre sivilizasoens no entre rejimes, tanba so diálogu ne’be honestu, humilde, no franku, bele hatudu dalan ba paz. Tanba, to’o ohin loron, sa-ida mak ita hare maka politikas kona-ba ameasa malu deit, soran malu deit, nebé so bele prodús trajédia boot tebe-tebes ba Humanidade tomak.

Distintus Konvidadus no Observadores

Senoras no Senores sira

Dala ida tan no hodi Congressistas tomak sira-nia naran, ha’u hakarak hato’o ami-nia agradesimentu ba Ita Boot sira-nia laran luak tebes, hodi fo honra ba ami ho Ita Boot sira-nia prezensa ilustre.

Nune’e, ha’u deklara solenamente katak ha’u loke III Kongresu Partidu CNRT nian!

Dili, 28 de Abril de 2017

KAY RALA XANANA GUSMAO

LEAVE A REPLY

Please enter your comment!
Please enter your name here